ଜମ୍ମୁକାଶ୍ମୀରକୁ ନେଇ କେନ୍ଦ୍ର ମନ୍ତ୍ରୀଙ୍କ ବଡ ବୟାନ

ନୂଆଦିଲ୍ଲୀ : ଜମ୍ମୁ ଏବଂ କାଶ୍ମୀରକୁ ରାଜ୍ୟ ମାନ୍ୟତାକୁ ନେଇ ଏକ ବଡ଼ ସୂଚନା ଏବେ ସାମ୍ନାକୁ ଆସିଛି। କେନ୍ଦ୍ର ଆଇନ ଏବଂ ନ୍ୟାୟ ରାଷ୍ଟ୍ରମନ୍ତ୍ରୀ ଅର୍ଜୁନ ରାମ ମେଘୱାଲ ମଙ୍ଗଳବାର ଏକ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି। ସେ କହିଛନ୍ତି ଯେ, ଆପଣ ଖୁବ୍ ଶୀଘ୍ର ଏକ ନିଷ୍ପତ୍ତି ଶୁଣିବେ । ଅର୍ଜୁନ ମେଘୱାଲ କହିଛନ୍ତି ଯେ, ଜମ୍ମୁ ଏବଂ କାଶ୍ମୀରକୁ ଖୁବ୍ ଶୀଘ୍ର ରାଜ୍ୟ ମାନ୍ୟତା ଦିଆଯିବ। ସେ ଏହା ମଧ୍ୟ କହିଛନ୍ତି ଯେ, ଜମ୍ମୁ ଏବଂ କାଶ୍ମୀରର ରାଜ୍ୟ ମାନ୍ୟତା ଏକ ସମ୍ବେଦନଶୀଳ ପ୍ରସଙ୍ଗ। ଶ୍ରୀନଗରରେ ଏକ କାର୍ଯ୍ୟକ୍ରମ ସମୟରେ ସାମ୍ବାଦିକ ମାନଙ୍କ ସହ କଥାବାର୍ତ୍ତା ସମୟରେ ଅର୍ଜୁନ ରାମ ମେଘୱାଲ କେନ୍ଦ୍ର ସରକାରଙ୍କ ପ୍ରତିଶ୍ରୁତିକୁ ପୁନରାବୃତ୍ତି କରି କହିଛନ୍ତି, “ଆମର ଗୃହମନ୍ତ୍ରୀ ଲୋକସଭାରେ ପୂର୍ବରୁ ପ୍ରତିଶ୍ରୁତି ଦେଇସାରିଛନ୍ତି ଯେ ଉପଯୁକ୍ତ ପ୍ରକ୍ରିୟା ଅନୁସରଣ କରାଯିବ, ଏବଂ ଲୋକମାନେ ସେମାନଙ୍କର ଅଧିକାର ପାଇବେ।” ନିଷ୍ପତ୍ତିର ସମୟ ବିଷୟରେ ସେ କହିଛନ୍ତି, “ମୁଁ ଭାବୁଛି ଆପଣ ଖୁବ୍ ଶୀଘ୍ର ଏହି ବିଷୟରେ ନିଷ୍ପତ୍ତି ଶୁଣିବେ। ସୂଚନାଯୋଗ୍ୟ ଯେ ଅଗଷ୍ଟ ୨୦୧୯ରେ, ଭାରତ ସରକାର ସମ୍ବିଧାନର ଧାରା ୩୭୦ ଅନୁଯାୟୀ ଏହି ଅଞ୍ଚଳର ସ୍ୱତନ୍ତ୍ର ମାନ୍ୟତା ପ୍ରତ୍ୟାହାର କରିଥିଲେ ଏବଂ ରାଜ୍ୟକୁ ଦୁଇଟି କେନ୍ଦ୍ରଶାସିତ ଅଞ୍ଚଳ, ଜମ୍ମୁ ଏବଂ କାଶ୍ମୀର ଏବଂ ଲଦାଖରେ ବିଭକ୍ତ କରିଥିଲେ।