ଭାରତର ପ୍ରଧାନମନ୍ତ୍ରୀଙ୍କ ମାଲେସିଆ ଗସ୍ତ ଅବସରରେ ଭାରତ-ମାଲେସିଆ ମିଳିତ ବିବୃତି

ନୂଆଦିଲ୍ଲୀ: ମାଲେସିଆର ପ୍ରଧାନମନ୍ତ୍ରୀ ମହାମହିମ ଦାତୋ ସେରି ଅନୱାର ଇବ୍ରାହିମଙ୍କ ନିମନ୍ତ୍ରଣ କ୍ରମେ ଭାରତ ଗଣତନ୍ତ୍ରର ପ୍ରଧାନମନ୍ତ୍ରୀ ମହାମହୀମ ଶ୍ରୀ ନରେନ୍ଦ୍ର ମୋଦୀ ଫେବୃଆରୀ ୭ ରୁ ୮ ତାରିଖ ୨୦୨୬ ପର୍ଯ୍ୟନ୍ତ ମାଲେସିଆକୁ ଏକ ସରକାରୀ ଗସ୍ତ କରିଛନ୍ତି। ଏହି ଗସ୍ତ ଦୁଇ ଦେଶ ମଧ୍ୟରେ ଥିବା ସଭ୍ୟତାଗତ ସମ୍ପର୍କ ଉପରେ ଆଧାରିତ ଗଭୀର ବନ୍ଧୁତା ଏବଂ ସ୍ଥାୟୀ ଜନସମ୍ପର୍କକୁ ପ୍ରତିଫଳିତ କରିବା ସହ ଏହା ଭାରତ-ମାଲେସିଆ ବ୍ୟାପକ ରଣନୈତିକ ସହଭାଗିତାକୁ ଆହୁରି ମଜବୁତ ଏବଂ ସମ୍ପ୍ରସାରିତ କରିବା ପାଇଁ ଦୁଇ ନେତାଙ୍କ ମିଳିତ ପ୍ରତିବଦ୍ଧତାକୁ ପୁନଃ ନିଶ୍ଚିତ କରିଛି।
୧୯୫୭ ମସିହାରେ କୂଟନୈତିକ ସମ୍ପର୍କ ସ୍ଥାପନ ହେବା ପରଠାରୁ, ମାଲେସିଆ ଏବଂ ଭାରତ ପାରସ୍ପରିକ ସମ୍ମାନ ଏବଂ ସମାନ ବିଚାରଧାରା ଉପରେ ଆଧାରିତ ଏକ ସହଭାଗିତା ଗଠନ କରିଛନ୍ତି, ଯାହା ଅଗଷ୍ଟ ୨୦୨୪ରେ ଏକ ବ୍ୟାପକ ରଣନୈତିକ ସହଭାଗିତା (ସିଏସ୍ପି) କୁ ଉନ୍ନୀତ ହୋଇଥିଲା।
ଗସ୍ତ ସମୟରେ, ପୁତ୍ରଜାୟାସ୍ଥିତ ପରଦାନା ପୁତ୍ରା କମ୍ପ୍ଲେକ୍ସଠାରେ ପ୍ରଧାନମନ୍ତ୍ରୀ ମୋଦୀଙ୍କୁ ଏକ ଆନୁଷ୍ଠାନିକ ସ୍ୱାଗତ ସମ୍ବର୍ଦ୍ଧନା ପ୍ରଦାନ କରାଯାଇଥିଲା। ଏହାପରେ ୮ ଫେବୃଆରୀ ୨୦୨୬ରେ ନେତୃବୃନ୍ଦ ଆନୁଷ୍ଠାନିକ ଦ୍ୱିପାକ୍ଷିକ ବୈଠକ କରିଥିଲେ ଏବଂ ସିଏସପିକୁ ଦୋହରାଇଥିଲେ। ଦୁଇ ଦେଶର ପ୍ରଧାନମନ୍ତ୍ରୀ ଏକ ସୌହାର୍ଦ୍ଦ୍ୟପୂର୍ଣ୍ଣ ବାତାବରଣରେ ବ୍ୟାପକ ତଥା ଫଳପ୍ରଦ ଆଲୋଚନା କରିଛନ୍ତି, ଯେଉଁଥିରେ ରାଜନୈତିକ ସମ୍ପୃକ୍ତି, ପ୍ରତିରକ୍ଷା ଏବଂ ସୁରକ୍ଷା ସହଯୋଗ, ସାମୁଦ୍ରିକ ସହଯୋଗ, ବାଣିଜ୍ୟ ଏବଂ ପୁଞ୍ଜିନିବେଶ, ଡିଜିଟାଲ୍ ଅର୍ଥନୀତି, ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା, ଶକ୍ତି, କୃଷି, ସ୍ୱାସ୍ଥ୍ୟ, ଶିକ୍ଷା, ସଂସ୍କୃତି, ପର୍ଯ୍ୟଟନ, ଯୁବ ବିନିମୟ ଏବଂ ଜନସମ୍ପର୍କ ସମେତ ଦ୍ୱିପାକ୍ଷିକ ସମ୍ପର୍କର ସମସ୍ତ ଦିଗ ଅନ୍ତର୍ଭୁକ୍ତ ରହିଥିଲା। ଏହା ବ୍ୟତୀତ ପାରସ୍ପରିକ ସ୍ୱାର୍ଥ ସମ୍ବଳିତ ଆଞ୍ଚଳିକ ଏବଂ ବିଶ୍ୱସ୍ତରୀୟ ଘଟଣାକ୍ରମ ଉପରେ ମଧ୍ୟ ଆଲୋଚନା ହୋଇଥିଲା। ମାଲେସିଆର ପ୍ରଧାନମନ୍ତ୍ରୀ ଅନୱାର ଇବ୍ରାହିମ ମଧ୍ୟ ଭାରତର ପ୍ରଧାନମନ୍ତ୍ରୀ ମୋଦୀଙ୍କ ସମ୍ମାନାର୍ଥେ ଏକ ସରକାରୀ ମଧ୍ୟାହ୍ନ ଭୋଜନର ଆୟୋଜନ କରିଥିଲେ। ସେମାନେ ଅନୁଷ୍ଠାନିକ ସହଯୋଗକୁ ଆହୁରି ମଜବୁତ କରିବା ଦିଗରେ ଅନେକ ଦ୍ୱିପାକ୍ଷିକ ବୁଝାମଣା ଓ ଦଲିଲ ଆଦାନପ୍ରଦାନର ସାକ୍ଷୀ ରହିଥିଲେ।
ଦୁଇ ଦେଶ ମଧ୍ୟରେ ଥିବା ଗଭୀର ଐତିହାସିକ ସମ୍ପର୍କ, ହଜାର ହଜାର ବର୍ଷର ପୁରୁଣା ଯୋଗାଯୋଗ, ସମାନ ସାଂସ୍କୃତିକ ଐତିହ୍ୟ ଏବଂ ଗଣତାନ୍ତ୍ରିକ ମୂଲ୍ୟବୋଧ ଏବଂ ମାଲେସିଆରେ ଥିବା ଏକ ସକ୍ରିୟ ଭାରତୀୟ ସମ୍ପ୍ରଦାୟ ଦ୍ୱିପାକ୍ଷିକ ସମ୍ପର୍କ ପାଇଁ ଏକ ଅନନ୍ୟ, ଶକ୍ତିଶାଳୀ ଏବଂ ସ୍ଥାୟୀ ଭିତ୍ତିଭୂମି ଗଠନ କରେ ଏବଂ ଏହାର ବହୁମୁଖୀ ଚରିତ୍ରକୁ ସମୃଦ୍ଧ କରିବା ଜାରି ରଖିଛି ବୋଲି ଦୁଇ ନେତା ଦୋହରାଇଥିଲେ।
ରାଜନୈତିକ ସହଯୋଗ
ଉଚ୍ଚସ୍ତରୀୟ ଗସ୍ତ ସମେତ ନିୟମିତ ସଂଳାପ ଏବଂ ଆଦାନପ୍ରଦାନ ଦ୍ୱିପାକ୍ଷିକ ସହଯୋଗର ବିଭିନ୍ନ କ୍ଷେତ୍ରରେ ପାରସ୍ପରିକ ବୁଝାମଣା ଏବଂ ସମନ୍ୱୟକୁ ମଜବୁତ କରିଛି ବୋଲି ଉଭୟ ନେତା ସହମତ ହୋଇଥିଲେ। ପାରସ୍ପରିକ ସ୍ୱାର୍ଥର ଦ୍ୱିପାକ୍ଷିକ ଏବଂ ବହୁପକ୍ଷୀୟ ପ୍ରସଙ୍ଗରେ ସମ୍ପୃକ୍ତି ବଜାୟ ରଖିବାର ଗୁରୁତ୍ୱକୁ ସେମାନେ ପୁନଃ ନିଶ୍ଚିତ କରିଥିଲେ। ଏହି ସମ୍ପର୍କରେ, ବିଦେଶ କାର୍ଯ୍ୟାଳୟ ପରାମର୍ଶ (FOC) ଏବଂ ଯୁଗ୍ମ କମିଶନ ବୈଠକ (JCM) ମାଲେସିଆ-ଭାରତ ସମ୍ପର୍କକୁ ଆଧାର ଦେଉଥିବା ପ୍ରମୁଖ ପ୍ଲାଟଫର୍ମ ହୋଇ ରହିଛି।
ସଂସଦୀୟ ଗଣତନ୍ତ୍ର ପ୍ରତି ସେମାନଙ୍କର ମିଳିତ ପ୍ରତିବଦ୍ଧତା ଦ୍ୱାରା ଅନୁପ୍ରାଣିତ ହୋଇ, ଉଭୟ ନେତା ବର୍ଦ୍ଧିତ ସଂସଦୀୟ ସହଯୋଗ ଏବଂ ଆଦାନପ୍ରଦାନକୁ ପ୍ରୋତ୍ସାହିତ କରିଥିଲେ ଏବଂ ଉଲ୍ଲେଖ କରିଥିଲେ ଯେ ଏଭଳି ସମ୍ପୃକ୍ତି ଆନୁଷ୍ଠାନିକ ସମ୍ପର୍କକୁ ମଜବୁତ କରିଛି ଏବଂ ପାରସ୍ପରିକ ବୁଝାମଣାକୁ ଗଭୀର କରିଛି। ସେମାନେ ମାଲେସିଆର ପ୍ରତିନିଧି ସଭାର ବାଚସ୍ପତି ତାନ୍ ଶ୍ରୀ ଦାତୋ ଡକ୍ଟର ଜୋହାରୀ ଅବଦୁଲଙ୍କ ଜାନୁଆରୀ ୧୩ରୁ ୧୬ ପର୍ଯ୍ୟନ୍ତ କମନୱେଲଥ ବାଚସ୍ପତି ଏବଂ ପିଠାସୀନ ଅଧିକାରୀମାନଙ୍କ ୨୮ତମ ସମ୍ମିଳନୀ (CSPOC) ପାଇଁ ଭାରତ ଗସ୍ତ; ଏଥିସହ ସେପ୍ଟେମ୍ବର ୨୦୨୫ରେ ଆସିଆନ ଆନ୍ତଃ-ସଂସଦୀୟ ସଭାର (AIPA) ୪୬ତମ ସାଧାରଣ ସଭା ପାଇଁ ଭାରତୀୟ ସଂସଦୀୟ ପ୍ରତିନିଧି ଦଳର ମାଲେସିଆ ଗସ୍ତ; ଏବଂ ୩୧ ମଇ – ୦୩ ଜୁନ୍ ୨୦୨୫ ପର୍ଯ୍ୟନ୍ତ ସର୍ବଦଳୀୟ ସଂସଦୀୟ ପ୍ରତିନିଧି ଦଳର ମାଲେସିଆ ଗସ୍ତରେ ସନ୍ତୋଷ ବ୍ୟକ୍ତ କରିଥିଲେ।
ବାଣିଜ୍ୟ ଏବଂ ପୁଞ୍ଜିନିବେଶ ସହଯୋଗ
ଭାରତକୁ ଏକ ଗୁରୁତ୍ୱପୂର୍ଣ୍ଣ ବିଶ୍ୱ ଅର୍ଥନୈତିକ ସହଭାଗୀ ଭାବରେ ସ୍ୱୀକାର କରି ମାଲେସିଆ ଦ୍ୱିପାକ୍ଷିକ ବାଣିଜ୍ୟର ଅଭିବୃଦ୍ଧିକୁ ପ୍ରଶଂସା କରିଛି। ଉଭୟ ନେତା ଗୁରୁତ୍ୱାରୋପ କରିଥିଲେ ଯେ ଏହି ସହଭାଗିତା ପାରସ୍ପରିକ ମୂଲ୍ୟ ଏବଂ ରଣନୈତିକ ସମନ୍ୱୟର ଏକ ଅଂଶ ବିଶେଷ। ସନ୍ତୁଳିତ ସହଯୋଗର ଭାବନାରେ, ଉଭୟ ନେତା ବାଣିଜ୍ୟ ସୁବିଧା ବୃଦ୍ଧି କରିବାକୁ ସହମତ ହେବା ସହ ସେମିକଣ୍ଡକ୍ଟର, ଡିଜିଟାଲ୍ ଅର୍ଥନୀତି ଏବଂ ଶିଳ୍ପ ସହଯୋଗ ସମେତ ବିଭିନ୍ନ କ୍ଷେତ୍ରରେ ସମ୍ପ୍ରସାରିତ ସମ୍ଭାବନାକୁ ଅନୁସନ୍ଧାନ କରିବା ଲାଗି ଏକମତ ହୋଇଛନ୍ତି।
ଦୁଇ ନେତା ମାଲେସିଆ-ଭାରତ ବ୍ୟାପକ ଅର୍ଥନୈତିକ ସହଯୋଗ ଚୁକ୍ତି (MICECA) ଏବଂ ଆସିଆନ-ଭାରତ ସାମଗ୍ରୀ ବାଣିଜ୍ୟ ଚୁକ୍ତିର (AITIGA) ଗୁରୁତ୍ୱ ଉପରେ ଆଲୋକପାତ କରିଥିଲେ। ଏହାକୁ ପାରସ୍ପରିକ ଲାଭଦାୟକ, ବାଣିଜ୍ୟ ସୁବିଧାଜନକ ଏବଂ ସାମ୍ପ୍ରତିକ ବିଶ୍ୱ ବାଣିଜ୍ୟ ପ୍ରଥା ସହିତ ପ୍ରାସଙ୍ଗିକ କରିବା ପାଇଁ ଏଆଇଟିଆଇଜିଏ (AITIGA) ର ଚାଲିଥିବା ସମୀକ୍ଷାକୁ ଉଭୟ ନେତା ସ୍ୱାଗତ କରିଥିଲେ। ଉଭୟ ନେତା ଅର୍ଥନୈତିକ ସମ୍ପର୍କକୁ ଗଭୀର କରିବାର ସମ୍ଭାବନା ପାଇଁ ଏମଆଇସିଇସିଏ (MICECA) କୁ ମଧ୍ୟ ପ୍ରଶଂସା କରିଥିଲେ ଏବଂ ଏହାର ସର୍ବାଧିକ ବ୍ୟବହାରକୁ ପ୍ରୋତ୍ସାହିତ କରିଥିଲେ।
ଦୁଇ ପ୍ରଧାନମନ୍ତ୍ରୀ ବଢୁଥିବା ଦ୍ୱିପାକ୍ଷିକ ପୁଞ୍ଜିନିବେଶକୁ ସ୍ୱାଗତ କରିଥିଲେ ଏବଂ ଭିତ୍ତିଭୂମି, ଶକ୍ତି, ଅକ୍ଷୟ ଶକ୍ତି, ଉନ୍ନତ ଉତ୍ପାଦନ, ସେମିକଣ୍ଡକ୍ଟର, ସ୍ୱାସ୍ଥ୍ୟସେବା, ଡିଜିଟାଲ୍ ଅର୍ଥନୀତି, ଫିନଟେକ୍, ଷ୍ଟାର୍ଟଅପ୍, ଆର୍ଟିଫିସିଆଲ୍ ଇଣ୍ଟେଲିଜେନ୍ସ, ଆତିଥ୍ୟ, ଗ୍ରୀନ୍ ଟେକ୍ନୋଲୋଜି ଏବଂ ଅନ୍ୟାନ୍ୟ ଉଚ୍ଚ ମୂଲ୍ୟର କ୍ଷେତ୍ର ସମେତ ଅଗ୍ରାଧିକାର ପ୍ରାପ୍ତ କ୍ଷେତ୍ରଗୁଡିକରେ ଅଧିକ ସହଯୋଗ ଏବଂ ପୁଞ୍ଜିନିବେଶକୁ ପ୍ରୋତ୍ସାହିତ କରିଥିଲେ। ପ୍ରଧାନମନ୍ତ୍ରୀ ମୋଦୀ ମାଲେସିଆ କମ୍ପାନୀଗୁଡିକ ପାଇଁ ଭାରତର ଭୂମିକାକୁ ଏକ ପ୍ରମୁଖ ପୁଞ୍ଜିନିବେଶ ଗନ୍ତବ୍ୟସ୍ଥଳ ଭାବରେ ଉଲ୍ଲେଖ କରିଥିବାବେଳେ ପ୍ରଧାନମନ୍ତ୍ରୀ ଅନୱାର ଇବ୍ରାହିମ ଭାରତୀୟ ଉତ୍ପାଦନ ଏବଂ ପ୍ରଯୁକ୍ତିବିଦ୍ୟା ସଂସ୍ଥାଗୁଡ଼ିକର ଗୁରୁତ୍ୱପୂର୍ଣ୍ଣ ଉପସ୍ଥିତିକୁ ସ୍ୱାଗତ କରିଥିଲେ, ଯାହା ମାଲେସିଆରେ ଉଚ୍ଚ-କୁଶଳୀ ନିଯୁକ୍ତି ସୃଷ୍ଟିରେ ଅବଦାନ ଦେଇଛି।
ଦୁଇ ପ୍ରଧାନମନ୍ତ୍ରୀ ୭ ଫେବୃଆରୀ ୨୦୨୬ ଦିନ କୁଆଲାଲାମ୍ପୁରରେ ଭାରତ-ମାଲେସିଆ ସିଇଓ (CEO) ଫୋରମର ଦଶମ ବୈଠକ ଆୟୋଜନକୁ ସ୍ୱାଗତ କରିଥିଲେ। ନେତାମାନେ ସିଇଓ ଫୋରମର ଫଳାଫଳ ପୃଷ୍ଠାଗୁଡ଼ିକୁ ମଧ୍ୟ ଧ୍ୟାନ ଦେଇଥିଲେ ଏବଂ ଆଶା ପ୍ରକାଶ କରିଥିଲେ ଯେ ଏହି ଫୋରମ ଦୁଇ ଦେଶ ମଧ୍ୟରେ ବାଣିଜ୍ୟ ଏବଂ ପୁଞ୍ଜିନିବେଶ ସମ୍ପର୍କକୁ ଆହୁରି ମଜବୁତ କରିବା ପାଇଁ ଉଦ୍ଦିଷ୍ଟ ପ୍ରୟାସକୁ ପରିପୂରକ କରିବ।
ଦ୍ୱିପାକ୍ଷିକ ବାଣିଜ୍ୟ ଏବଂ ପୁଞ୍ଜିନିବେଶରେ ସ୍ଥାନୀୟ ମୁଦ୍ରା କାରବାର ବ୍ୟବହାରକୁ ପ୍ରୋତ୍ସାହିତ କରିବା ପାଇଁ ଭାରତୀୟ ରିଜର୍ଭ ବ୍ୟାଙ୍କ ଏବଂ ବ୍ୟାଙ୍କ ନେଗାରା ମାଲେସିଆ ମଧ୍ୟରେ ଜାରି ରହିଥିବା ସହଯୋଗକୁ ଉଭୟ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ ଏବଂ ଉଭୟ ପକ୍ଷର ଶିଳ୍ପଗୁଡ଼ିକୁ ସ୍ଥାନୀୟ ମୁଦ୍ରା ଅର୍ଥାତ୍ ଭାରତୀୟ ଟଙ୍କା ଏବଂ ମାଲେସିଆ ରିଙ୍ଗିଟରେ ବାଣିଜ୍ୟର ଇନଭଏସିଂ ଏବଂ ସେଟଲମେଣ୍ଟକୁ ଆହୁରି ସହଜ କରିବା ପାଇଁ ପ୍ରୋତ୍ସାହିତ କରିଥିଲେ।
ଉଭୟ ପ୍ରଧାନମନ୍ତ୍ରୀ ସ୍ୱୀକାର କରିଥିଲେ ଯେ ଯୋଗାଯୋଗ ହେଉଛି ବର୍ଦ୍ଧିତ ଅର୍ଥନୈତିକ ସହଯୋଗ ପାଇଁ ଏକ ପ୍ରମୁଖ ନିର୍ଦ୍ଧାରକ ଏବଂ ସହାୟକ। ଏହି ସମ୍ପର୍କରେ, ସେମାନେ ଦେଶଗୁଡିକ ମଧ୍ୟରେ ବଢୁଥିବା ବିମାନ ଏବଂ ସାମୁଦ୍ରିକ ଯୋଗାଯୋଗକୁ ପ୍ରଶଂସା କରିଥିଲେ ଏବଂ ଏହାକୁ ଆହୁରି ମଜବୁତ କରିବାକୁ ସହମତ ହୋଇଥିଲେ।
ଖାଦ୍ୟ ନିରାପତ୍ତା ଏବଂ କୃଷି-ଉତ୍ପାଦ ସହଯୋଗ
ଉଭୟ ନେତା ଖାଦ୍ୟ ନିରାପତ୍ତା ଏବଂ ପୋଷଣ କ୍ଷେତ୍ରରେ ସହଯୋଗକୁ ଗଭୀର କରିବା ପାଇଁ ସହମତ ହୋଇଥିଲେ। ବିଶେଷ କରି ପ୍ରତ୍ୟେକ ଦେଶର ଘରୋଇ ନୀତିକୁ ସମ୍ମାନ ଦେବା ସହିତ ମୂଳ ଦ୍ରବ୍ୟର ବାଣିଜ୍ୟ କ୍ଷେତ୍ରରେ ଏହି ନୀତିକୁ କାର୍ଯ୍ୟକାରୀ କରିବାକୁ ଗୁରୁତ୍ୱ ଦେଇଥିଲେ। ନିଜ ନିଜ ଜନସାଧାରଣଙ୍କ ଖାଦ୍ୟ ନିରାପତ୍ତା ଏବଂ ପୋଷଣ ଆବଶ୍ୟକତାକୁ ସୁରକ୍ଷିତ ରଖିବା ପାଇଁ ସେମାନେ ସ୍ଥିର, ନମନୀୟ ଏବଂ ସ୍ଥାୟୀ ଯୋଗାଣ ଶୃଙ୍ଖଳା ସୁନିଶ୍ଚିତ କରିବାର ଗୁରୁତ୍ୱ ଉପରେ ଆଲୋକପାତ କରିଥିଲେ। କୃଷି ଉତ୍ପାଦନ ଏବଂ ବାଣିଜ୍ୟରେ ସମ୍ଭାବ୍ୟ ବାଧାବିଘ୍ନକୁ ପୂର୍ବାନୁମାନ କରିବା ଏବଂ ପ୍ରଶମିତ କରିବା ପାଇଁ ନେତାମାନେ ନିୟମିତ ସଂଳାପ, ସୂଚନା ଆଦାନପ୍ରଦାନ ଏବଂ ସହଯୋଗୀ ପଦକ୍ଷେପଗୁଡ଼ିକୁ ପ୍ରୋତ୍ସାହିତ କରିଥିଲେ।
ପ୍ରଧାନମନ୍ତ୍ରୀ ଅନୱାର ଇବ୍ରାହିମ ମଧ୍ୟ ସ୍ଥାୟୀ ପାମ୍ ଅଏଲର ଏକ ନିର୍ଭରଯୋଗ୍ୟ ଯୋଗାଣକାରୀ ଭାବରେ ରହିବା ପାଇଁ ମାଲେସିଆର ପ୍ରତିବଦ୍ଧତାକୁ ପୁନଃ ନିଶ୍ଚିତ କରିଥିଲେ। ଏହି ସନ୍ଦର୍ଭରେ, ଦୁଇ ନେତା ପାମ୍ ଚାଷରେ ଗଭୀର ସହଯୋଗ ପାଇଁ ପ୍ରୋତ୍ସାହିତ କରିଥିଲେ। ଏଥିସହ, ଉଭୟ ପକ୍ଷ ପାମ୍ ଅଏଲର ଭ୍ୟାଲୁ ଚେନ୍ ବିକାଶ ପାଇଁ ମଧ୍ୟ ସହମତ ହୋଇଥିଲେ, ଯେଉଁଥିରେ ଡାଉନଷ୍ଟ୍ରିମ୍ ଏବଂ ଉଚ୍ଚ ମୂଲ୍ୟଯୁକ୍ତ ପାମ୍-ଆଧାରିତ ଉତ୍ପାଦ ଅନ୍ତର୍ଭୁକ୍ତ। ବଜାର ପ୍ରବେଶ ପ୍ରସଙ୍ଗର ସମୟାନୁବର୍ତ୍ତୀ ସମାଧାନ ପାଇଁ ସଂରଚିତ ସମ୍ପୃକ୍ତି ଉପରେ ମଧ୍ୟ ଉଭୟ ପକ୍ଷ ସହମତ ହୋଇଥିଲେ।
ଡିଜିଟାଲ ଏବଂ ଆର୍ଥିକ ସହଯୋଗ
ଦୁଇ ଦେଶର ପ୍ରଧାନମନ୍ତ୍ରୀ ମାଲେସିଆ-ଭାରତ ଡିଜିଟାଲ୍ କାଉନସିଲ୍ (MIDC) ର ଆନୁଷ୍ଠାନିକ ଗଠନକୁ ପ୍ରଶଂସା କରିଥିଲେ ଏବଂ ଡିଜିଟାଲ୍ ସହଯୋଗକୁ ଆଗକୁ ବଢାଇବା, ନବସୃଜନକୁ ପ୍ରୋତ୍ସାହିତ କରିବା ତଥା ଫିନଟେକ୍, ଇ-ଗଭର୍ଣ୍ଣାନ୍ସ, ସାଇବର ସୁରକ୍ଷା, ଆର୍ଟିଫିସିଆଲ୍ ଇଣ୍ଟେଲିଜେନ୍ସ, ଡିଜିଟାଲ୍ ପବ୍ଲିକ୍ ଇନଫ୍ରାଷ୍ଟ୍ରକ୍ଚର (DPI) ଏବଂ ଉଦୀୟମାନ ପ୍ରଯୁକ୍ତିବିଦ୍ୟା ଭଳି କ୍ଷେତ୍ରରେ ସହଯୋଗୀ ପ୍ରକଳ୍ପଗୁଡ଼ିକୁ ଅନୁସନ୍ଧାନ କରିବା ପାଇଁ ଏକ ପ୍ରମୁଖ ପ୍ଲାଟଫର୍ମ ଭାବରେ ଏହାର ସମ୍ଭାବନାକୁ ସ୍ୱୀକାର କରିଥିଲେ। ଉଭୟ ନେତା ଗୁରୁତ୍ୱାରୋପ କରିଥିଲେ ଯେ ଏମ୍ଆଇଡିସି ଦ୍ୱିପାକ୍ଷିକ ଡିଜିଟାଲ୍ ସମ୍ପୃକ୍ତିକୁ ମଜବୁତ କରିବା ଏବଂ ଦୁଇ ଦେଶର ଡିଜିଟାଲ୍ ରୂପାନ୍ତରଣ କାର୍ଯ୍ୟସୂଚୀକୁ ସହଯୋଗ କରିବା ଦିଗରେ ଏକ ରଣନୈତିକ ବ୍ୟବସ୍ଥା ଭାବେ କାର୍ଯ୍ୟ କରିବ।
ଉଭୟ ନେତା ଏନପିସିଆଇ ଇଣ୍ଟରନ୍ୟାସନାଲ୍ ଲିମିଟେଡ୍ (NIPL) ଏବଂ ପେ-ନେଟ୍ ମାଲେସିଆ ମଧ୍ୟରେ ଦ୍ୱିପାକ୍ଷିକ ପେମେଣ୍ଟ ଲିଙ୍କେଜ୍ ସ୍ଥାପନ ପାଇଁ ସହଯୋଗକୁ ସ୍ୱାଗତ କରିଥିଲେ। ସେମାନେ ଉଲ୍ଲେଖ କରିଥିଲେ ଯେ ଏହି ଏକୀକରଣ ବ୍ୟବସାୟ କରିବାର ସହଜତାକୁ ଯଥେଷ୍ଟ ବୃଦ୍ଧି କରିବ ଏବଂ ପର୍ଯ୍ୟଟକ, ଛାତ୍ର ଓ କ୍ଷୁଦ୍ର ବ୍ୟବସାୟୀଙ୍କ ପାଇଁ ନିରବଚ୍ଛିନ୍ନ, ସ୍ୱଳ୍ପ ମୂଲ୍ୟର ରେମିଟାନ୍ସ ଏବଂ ପେମେଣ୍ଟ ସମାଧାନ ପ୍ରଦାନ କରିବ, ଯାହାଦ୍ୱାରା ମାଲେସିଆ ଏବଂ ଭାରତ ମଧ୍ୟରେ ଅର୍ଥନୈତିକ ଏବଂ ଜନସମ୍ପର୍କ ଅଧିକ ନିବିଡ଼ ହେବ।
ଶକ୍ତି ଏବଂ ସେମିକଣ୍ଡକ୍ଟର ସହଯୋଗ
ଶକ୍ତି କ୍ଷେତ୍ରରେ ସହଯୋଗ ପାଇଁ ଦୁଇ ଦେଶର ପ୍ରଧାନମନ୍ତ୍ରୀ ଗୁରୁତ୍ୱପୂର୍ଣ୍ଣ ଅଗ୍ରଗତିକୁ ଉଲ୍ଲେଖ କରିଥିଲେ। ଭାରତର ଅକ୍ଷୟ ଶକ୍ତି ଏବଂ ଗ୍ରୀନ୍ ହାଇଡ୍ରୋଜେନ୍ କ୍ଷେତ୍ରରେ ପେଟ୍ରୋନାସ୍ (PETRONAS) ଏବଂ ଜେନଟାରୀ (Gentari) ଦ୍ୱାରା କରାଯାଇଥିବା ବିଭିନ୍ନ ବିଷୟକୁ ଉଲ୍ଲେଖ କରିଥିଲେ। ଏହି ସମ୍ପର୍କରେ, ଉଭୟ ନେତା ବୃହତ ସୌର ଶକ୍ତି ପ୍ରକଳ୍ପରେ ଅଧିକ ସହଯୋଗ ପାଇଁ ବିଶାଳ ସମ୍ଭାବନା ଉପରେ ଗୁରୁତ୍ୱାରୋପ କରିଥିଲେ। ଏହା ସ୍ୱଚ୍ଛ ଶକ୍ତି ସମାଧାନ ପ୍ରକଳ୍ପ ପରିଚାଳନା ଏବଂ ପାରସ୍ପରିକ ନେଟ୍-ଜିରୋ ଲକ୍ଷ୍ୟ ହାସଲ କରିବା ପାଇଁ ମାଲେସିଆର ଅଭିଜ୍ଞତାକୁ ବ୍ୟବହାର କରିବ। ଅନ୍ତର୍ଜାତୀୟ ସୌର ମେଣ୍ଟ ପ୍ରତିଷ୍ଠା କରିବାରେ ଭାରତର ପଦକ୍ଷେପକୁ ମାଲେସିଆ ପ୍ରଶଂସା କରିଛି।
ନେତାମାନେ ବିଶ୍ୱ ପ୍ରଯୁକ୍ତିବିଦ୍ୟା କ୍ଷେତ୍ରରେ ସେମିକଣ୍ଡକ୍ଟର ଶିଳ୍ପର ରଣନୈତିକ ଗୁରୁତ୍ୱକୁ ସ୍ୱୀକାର କରିଥିଲେ ଏବଂ ଏହି କ୍ଷେତ୍ରରେ ଦ୍ୱିପାକ୍ଷିକ ସମନ୍ୱୟକୁ ମଜବୁତ କରିବାର ପାରସ୍ପରିକ ଲାଭ ଉପରେ ଗୁରୁତ୍ୱାରୋପ କରିଥିଲେ। ଏକ ନମନୀୟ ଏବଂ ପ୍ରତିଯୋଗିତାମୂଳକ ଇକୋସିଷ୍ଟମ୍ ଗଠନ ପାଇଁ ବୈଷୟିକ ନବସୃଜନ, କର୍ମଚାରୀ ବିକାଶ ଏବଂ ଯୋଗାଣ ଶୃଙ୍ଖଳା ସ୍ଥିରତା ଉପରେ ଧ୍ୟାନ ଦେଇ ସେମିକଣ୍ଡକ୍ଟର ଭ୍ୟାଲୁ ଚେନ୍କୁ ମଜବୁତ କରିବା ପାଇଁ ସହଯୋଗକୁ ଗଭୀର କରିବା ଉପରେ ସେମାନେ ଗୁରୁତ୍ୱ ଦେଇଥିଲେ। ଦୁଇ ଦେଶର ପ୍ରଧାନମନ୍ତ୍ରୀ ଆଇଆଇଟି-ମାଡ୍ରାସ ଗ୍ଲୋବାଲ ଏବଂ ଆଡଭାନ୍ସଡ୍ ସେମିକଣ୍ଡକ୍ଟର ଏକାଡେମୀ ଅଫ୍ ମାଲେସିଆ ମଧ୍ୟରେ ଥିବା ସହଯୋଗ ଏବଂ ଇଣ୍ଡିଆନ ଇଲେକ୍ଟ୍ରୋନିକ୍ସ ଆଣ୍ଡ ସେମିକଣ୍ଡକ୍ଟର ଆସୋସିଏସନ (IESA) ଏବଂ ମାଲେସିଆ ସେମିକଣ୍ଡକ୍ଟର ଇଣ୍ଡଷ୍ଟ୍ରି ଆସୋସିଏସନ (MSIA) ମଧ୍ୟରେ ଭାଗିଦାରୀକୁ ପ୍ରଶଂସା କରିଥିଲେ।
ପ୍ରତିରକ୍ଷା ଏବଂ ସୁରକ୍ଷା ସହଯୋଗ
ମାଲେସିଆ ଏବଂ ଭାରତ ମଧ୍ୟରେ ସୁଦୃଢ଼ ପ୍ରତିରକ୍ଷା ସମ୍ପର୍କ ନେଇ ଦୁଇ ଦେଶର ପ୍ରଧାନମନ୍ତ୍ରୀ ସନ୍ତୋଷ ପ୍ରକାଶ କରିଛନ୍ତି। ଏହି କ୍ଷେତ୍ରରେ ନିୟମିତ ଆଦାନପ୍ରଦାନ, ବିଶେଷଜ୍ଞଙ୍କ ଗସ୍ତ, କର୍ମଚାରୀ ସ୍ତରୀୟ ଆଲୋଚନା, ଅଭ୍ୟାସ, ପ୍ରଶିକ୍ଷଣ ପାଠ୍ୟକ୍ରମ ଏବଂ ପ୍ରତିରକ୍ଷା ଶିଳ୍ପ ସହଯୋଗକୁ ଗୁରୁତ୍ୱ ପ୍ରଦାନ କରାଯାଇଛି। ଉଭୟ ନେତା ମାଲେସିଆ-ଭାରତ ପ୍ରତିରକ୍ଷା ସହଯୋଗ କମିଟି (ମିଡକମ) ଏବଂ ଏହାର ଉପ-କମିଟିଗୁଡ଼ିକର ସଫଳ ଫଳାଫଳକୁ ସ୍ୱାଗତ କରିଥିଲେ, ଯେଉଁଥିରେ ଏକ ରଣନୈତିକ ବ୍ୟାପାର କାର୍ଯ୍ୟକାରୀ ଗୋଷ୍ଠୀ (SAWG) ଏବଂ Su-30 ଫୋରମ ପ୍ରତିଷ୍ଠା ପାଇଁ କାର୍ଯ୍ୟସୂଚୀ ଅନ୍ତର୍ଭୁକ୍ତ ରହିଛି।
ଉଭୟ ନେତା ଆସିଆନ୍ ପ୍ରତିରକ୍ଷା ମନ୍ତ୍ରୀମାନଙ୍କ ବୈଠକ ପ୍ଲସ୍ (ADMM-Plus) ଢାଞ୍ଚାରେ ଭାରତର ନିରନ୍ତର ସମ୍ପୃକ୍ତିକୁ ପ୍ରଶଂସା କରିବା ସହ ୨୦୨୪-୨୦୨୭ ଅବଧି ପାଇଁ ଆତଙ୍କବାଦ ବିରୋଧୀ କାର୍ଯ୍ୟକାରୀ ଗୋଷ୍ଠୀର ମାଲେସିଆ ସହିତ ସହ-ଅଧ୍ୟକ୍ଷତାକୁ ସ୍ୱାଗତ କରିଥିଲେ। ଭାରତ ଏବଂ ମାଲେସିଆ ଦ୍ୱାରା ସହ-ଅଧ୍ୟକ୍ଷତା ଏବଂ ୨୦୨୬ ରେ ମାଲେସିଆ ଦ୍ୱାରା ଆୟୋଜିତ ହେବାକୁ ଥିବା ଆଗାମୀ ଏକ୍ସପର୍ଟ ୱାର୍କିଂ ଗ୍ରୁପ୍ ଅନ୍ କାଉଣ୍ଟର ଟେରରିଜିମ୍ ଟେବୁଲ୍-ଟପ୍ ଏକ୍ସରସାଇଜ୍ରେ (EWG CT TTX) ଅଂଶଗ୍ରହଣ କରିବାକୁ ନେତାମାନେ ସମସ୍ତ ADMM-Plus ସଦସ୍ୟମାନଙ୍କୁ ନିମନ୍ତ୍ରଣ କରିଥିଲେ।
ଏରୋ ଇଣ୍ଡିଆ ୨୦୨୫ ଏବଂ ଲଙ୍କାୱି ଅନ୍ତର୍ଜାତୀୟ ସାମୁଦ୍ରିକ ଏବଂ ଏରୋସ୍ପେସ୍ ପ୍ରଦର୍ଶନୀ (LIMA 2025) ସମେତ ପ୍ରତିରକ୍ଷା ପ୍ରଦର୍ଶନୀରେ ସେମାନଙ୍କର ପ୍ରତିରକ୍ଷା ପ୍ରତିନିଧି ଦଳ ଏବଂ କମ୍ପାନୀଗୁଡ଼ିକର ନିୟମିତ ଅଂଶଗ୍ରହଣକୁ ମଧ୍ୟ ନେତାମାନେ ଧ୍ୟାନ ଦେଇଥିଲେ।
ଭାରତର ରାଜସ୍ଥାନରେ ୦୫-୧୮ ଡିସେମ୍ବର ୨୦୨୫ ମଧ୍ୟରେ ଭାରତୀୟ ସେନା ଏବଂ ରୟାଲ ମାଲେସିଆ ସେନା ମଧ୍ୟରେ ଅନୁଷ୍ଠିତ ଭାରତ-ମାଲେସିଆ ଯୁଗ୍ମ ସାମରିକ ଅଭ୍ୟାସ, ‘ହରିମାଉ ଶକ୍ତି’ର ପଞ୍ଚମ ସଂସ୍କରଣର ସଫଳ ଆୟୋଜନ ପାଇଁ ଉଭୟ ନେତା ସନ୍ତୋଷ ପ୍ରକାଶ କରିଥିଲେ।
ଦୁଇ ଦେଶର ପ୍ରଧାନମନ୍ତ୍ରୀ ନିୟମିତ ସଦଭାବନା ଏବଂ କାର୍ଯ୍ୟକ୍ଷମ ନିୟୋଜନ ସମେତ ଭାରତ ଏବଂ ମାଲେସିଆ ମଧ୍ୟରେ ବଢୁଥିବା ସାମୁଦ୍ରିକ ସହଯୋଗକୁ ପ୍ରୋତ୍ସାହିତ କରିଥିଲେ। ଏହି ସମ୍ପର୍କରେ, ସେମାନେ ଅକ୍ଟୋବର ୨୦୨୫ରେ ମାଲେସିଆର କେମାମାନକୁ ଆଇଏନଏସ ସହ୍ୟାଦ୍ରିର ଗସ୍ତ ଏବଂ ଜୁଲାଇ ୨୦୨୫ ରେ ମାଲେସିଆର ପୋର୍ଟ କ୍ଲାଙ୍ଗକୁ ହାଇଡ୍ରୋଗ୍ରାଫିକ ଜାହାଜ ଆଇଏନଏସ ସନ୍ଧ୍ୟାୟକର ଗସ୍ତକୁ ପ୍ରଶଂସା କରିଥିଲେ। ନେତାମାନେ ଦୁଇ ଦେଶ ମଧ୍ୟରେ ନିୟମିତ ନୌସେନା ସମ୍ପର୍କକୁ ମଧ୍ୟ ସ୍ୱାଗତ କରିଥିଲେ, ଯେଉଁଥିରେ ‘ସମୁଦ୍ର ଲକ୍ଷ୍ମଣ’, ‘ମିଲନ’ (MILAN) ଏବଂ ଆସିଆନ-ଭାରତ ସାମୁଦ୍ରିକ ଅଭ୍ୟାସ (AIME) ଭଳି ଦ୍ୱିପାକ୍ଷିକ ଏବଂ ବହୁପକ୍ଷୀୟ ନୌସେନା ଅଭ୍ୟାସ ଅନ୍ତର୍ଭୁକ୍ତ।
ଉଭୟ ନେତା ଦୁଇ ଦେଶ ମଧ୍ୟରେ ସୁରକ୍ଷା ପ୍ରସଙ୍ଗରେ ସହଯୋଗ ଏବଂ ପାରସ୍ପରିକ ସହାୟତା ଉପରେ ଆଲୋଚନା କରିବା ପାଇଁ ଉଦଘାଟନୀ ମାଲେସିଆ-ଭାରତ ସୁରକ୍ଷା ଅଧୀନରେ ମାଲେସିଆ ସରକାର ଏବଂ ଭାରତ ସରକାରଙ୍କ ମଧ୍ୟରେ ସହଯୋଗ ସ୍ଥାପନ ନେଇ ମଧ୍ୟ ସନ୍ତୋଷ ପ୍ରକାଶ କରିଥିଲେ।
ଦୁଇ ପ୍ରଧାନମନ୍ତ୍ରୀ ସୀମାପାର ଆତଙ୍କବାଦ ସମେତ ସମସ୍ତ ପ୍ରକାରର ଆତଙ୍କବାଦକୁ ସ୍ପଷ୍ଟ ଏବଂ ଦୃଢ଼ ଭାବରେ ନିନ୍ଦା କରିଥିଲେ। ସେମାନେ ଆତଙ୍କବାଦ ପ୍ରତି ଶୂନ୍ୟ ସହନଶୀଳତା ଏବଂ ବ୍ୟାପକ ତଥା ନିରନ୍ତର ଭାବରେ ଆତଙ୍କବାଦର ମୁକାବିଲା ପାଇଁ ମିଳିତ ଅନ୍ତର୍ଜାତୀୟ ପ୍ରୟାସ ପାଇଁ ଆହ୍ୱାନ କରିଥିଲେ। ସୂଚନା ଏବଂ ଜ୍ଞାନ ଆଦାନପ୍ରଦାନ, ସର୍ବୋତ୍ତମ ଅଭ୍ୟାସର ବିନିମୟ ଏବଂ ଦକ୍ଷତା ବୃଦ୍ଧି ମାଧ୍ୟମରେ କଟ୍ଟରପନ୍ଥୀ ଏବଂ ହିଂସାତ୍ମକ ଚରମପନ୍ଥୀଙ୍କୁ ପ୍ରତିହତ କରିବା; ଆତଙ୍କବାଦୀ ପାଣ୍ଠି ଯୋଗାଣର ମୁକାବିଲା କରିବା; ଆତଙ୍କବାଦୀ କାର୍ଯ୍ୟ ପାଇଁ ନୂତନ ଏବଂ ଉଦୀୟମାନ ପ୍ରଯୁକ୍ତିର ବ୍ୟବହାରକୁ ରୋକିବା ପାଇଁ ସେମାନେ ସହମତ ହୋଇଥିଲେ। ଆତଙ୍କବାଦ ଏବଂ ଆନ୍ତଃରାଷ୍ଟ୍ରୀୟ ସଂଗଠିତ ଅପରାଧ ମଧ୍ୟରେ ସମ୍ପର୍କକୁ ସ୍ୱୀକାର କରି ଦୁଇ ନେତା ସୂଚନା ଏବଂ ସର୍ବୋତ୍ତମ ଅଭ୍ୟାସର ଆଦାନପ୍ରଦାନ ମାଧ୍ୟମରେ ଆନ୍ତଃରାଷ୍ଟ୍ରୀୟ ସଂଗଠିତ ଅପରାଧ କ୍ଷେତ୍ରରେ ସହଯୋଗ କରିବାକୁ ସହମତ ହୋଇଥିଲେ। ଦୁଇ ନେତା ଜାତିସଂଘ ଏବଂ ଏଫ୍ଏଟିଏଫ୍ ସମେତ ଆତଙ୍କବାଦର ମୁକାବିଲା କରିବାରେ ଦ୍ୱିପାକ୍ଷିକ ଏବଂ ବହୁପକ୍ଷୀୟ ସହଯୋଗକୁ ମଜବୁତ କରିବା ପାଇଁ ପ୍ରତିବଦ୍ଧତା ପୁନଃ ନିଶ୍ଚିତ କରିଥିଲେ।
ଶିକ୍ଷା ଏବଂ ଦକ୍ଷତା ବିକାଶ
ଉଭୟ ଭାରତ ଓ ମାଲେସିଆରେ ଉଭୟ ଦେଶର ବହୁ ସଂଖ୍ୟକ ଛାତ୍ରଛାତ୍ରୀଙ୍କ ଉପସ୍ଥିତି ଏବଂ ମାଲେସିଆ ବୈଷୟିକ ସହଯୋଗ କାର୍ଯ୍ୟକ୍ରମ (MTCP) ଏବଂ ଭାରତୀୟ ବୈଷୟିକ ଏବଂ ଅର୍ଥନୈତିକ ସହଯୋଗ କାର୍ଯ୍ୟକ୍ରମ (ITEC) ଅଧୀନରେ ଚାଲିଥିବା କାର୍ଯ୍ୟକ୍ରମଗୁଡ଼ିକ ବିଷୟରେ ଉଲ୍ଲେଖ କରିଥିଲେ। ସେମାନେ ଦୁଇ ପକ୍ଷକୁ ଶିକ୍ଷାନୁଷ୍ଠାନଗୁଡ଼ିକ ମଧ୍ୟରେ ଅଧିକ ଛାତ୍ର ଏବଂ ଅଧ୍ୟାପକ ବିନିମୟ ଏବଂ ସହଯୋଗ ପାଇଁ ପ୍ରୋତ୍ସାହିତ କରିଥିଲେ। ପ୍ରଧାନମନ୍ତ୍ରୀ ମୋଦୀ ମଧ୍ୟ ମାଲେସିଆର ଛାତ୍ରଛାତ୍ରୀଙ୍କୁ ‘ଷ୍ଟଡି ଇନ୍ ଇଣ୍ଡିଆ’ କାର୍ଯ୍ୟକ୍ରମ ଅଧୀନରେ ଭାରତ ଦ୍ୱାରା ପ୍ରଦାନ କରାଯାଉଥିବା ସୁଯୋଗର ଲାଭ ଉଠାଇବାକୁ ନିମନ୍ତ୍ରଣ କରିଥିଲେ।
ନେତାମାନେ ଦୁଇ ଦେଶର ବିକାଶଶୀଳ ଆବଶ୍ୟକତା ସହିତ ସମାନ୍ତରାଳ ଏକ ଦକ୍ଷ କର୍ମଜୀବୀ ବିକାଶ ପାଇଁ ବୈଷୟିକ ଏବଂ ବୃତ୍ତିଗତ ଶିକ୍ଷା ଏବଂ ପ୍ରଶିକ୍ଷଣ (TVET) କ୍ଷେତ୍ରରେ ସହଯୋଗ ବୃଦ୍ଧି କରିବାର ଗୁରୁତ୍ୱ ଉପରେ ମଧ୍ୟ ଆଲୋକପାତ କରିଥିଲେ। ବୃତ୍ତିଗତ ପ୍ରଶିକ୍ଷଣକୁ ମଜବୁତ କରିବା, ନିଯୁକ୍ତିକ୍ଷମତାକୁ ପ୍ରୋତ୍ସାହିତ କରିବା ଏବଂ ଦକ୍ଷତା ବିକାଶ ମାଧ୍ୟମରେ ସ୍ଥାୟୀ ଅର୍ଥନୈତିକ ଅଭିବୃଦ୍ଧିକୁ ସମର୍ଥନ କରିବା ପାଇଁ ସେମାନେ ମିଳିତ ପଦକ୍ଷେପ, ଜ୍ଞାନର ଆଦାନପ୍ରଦାନ ଏବଂ ବିନିମୟ କାର୍ଯ୍ୟକ୍ରମଗୁଡ଼ିକୁ ପ୍ରୋତ୍ସାହିତ କରିଥିଲେ।
ସଂସଦୀୟ, ପର୍ଯ୍ୟଟନ ଏବଂ ଜନସମ୍ପର୍କ
ସୁଦୃଢ଼ ଜନସମ୍ପର୍କକୁ ଦୃଷ୍ଟିରେ ରଖି ଦୁଇ ପ୍ରଧାନମନ୍ତ୍ରୀ ଦୁଇ ଦେଶ ମଧ୍ୟରେ ଶ୍ରମିକ ଏବଂ ପେସାଦାରମାନଙ୍କ ଗମନାଗମନକୁ ଆହୁରି ସରଳ କରିବା ପାଇଁ ସହମତ ହୋଇଥିଲେ।
ନେତାମାନେ ପର୍ଯ୍ୟଟନକୁ ଦ୍ୱିପାକ୍ଷିକ ସହଯୋଗର ଏକ ପ୍ରମୁଖ ସ୍ତମ୍ଭ ଏବଂ ମାଲେସିଆ ଏବଂ ଭାରତ ମଧ୍ୟରେ ଜନସମ୍ପର୍କର ଏକ ଗୁରୁତ୍ୱପୂର୍ଣ୍ଣ ଚାଳକ ଭାବରେ ପୁନଃ ନିଶ୍ଚିତ କରିଥିଲେ। ଏହି ସମ୍ପର୍କରେ, ଭାରତ ‘ଭିଜିଟ୍ ମାଲେସିଆ ୨୦୨୬’ ଅଭିଯାନକୁ ସ୍ୱାଗତ କରିଥିବାବେଳେ ମାଲେସିଆ ‘ଅତୁଲ୍ୟ ଭାରତ’ ପର୍ଯ୍ୟଟନ ଅଭିଯାନକୁ ପ୍ରଶଂସା କରିଛି। ଅର୍ଥନୈତିକ ଅଭିବୃଦ୍ଧି ଏବଂ ପାରସ୍ପରିକ ବୁଝାମଣାକୁ ସମର୍ଥନ କରିବାରେ ସ୍ଥାୟୀ ଏବଂ ସମାବେଶୀ ପର୍ଯ୍ୟଟନର ଗୁରୁତ୍ୱ ଉପରେ ଉଭୟ ପକ୍ଷ ଗୁରୁତ୍ୱାରୋପ କରିଥିଲେ। ପର୍ଯ୍ୟଟନ ସହଯୋଗକୁ ଆହୁରି ଗଭୀର କରିବା ଏବଂ ଦୁଇ ଦେଶ ମଧ୍ୟରେ ପର୍ଯ୍ୟଟକଙ୍କ ଯାତାୟାତ ବୃଦ୍ଧି କରିବା ପାଇଁ ଉଭୟ ନେତା ସେମାନଙ୍କର ମିଳିତ ପ୍ରତିବଦ୍ଧତା ବ୍ୟକ୍ତ କରିଥିଲେ।
ଉଜ୍ଜ୍ୱଳ ଜନସମ୍ପର୍କକୁ ସ୍ୱୀକାର କରି ନେତାମାନେ ପ୍ରଚଳିତ ଭିସା ଉଦାରୀକରଣକୁ ସ୍ୱାଗତ କରିଥିଲେ, ଯାହା ପର୍ଯ୍ୟଟକଙ୍କ ଆଗମନ ଏବଂ ବ୍ୟବସାୟିକ ଗସ୍ତକୁ ବୃଦ୍ଧି କରିଛି।
ଉଭୟ ନେତା ପାରସ୍ପରିକ ବିଶ୍ୱାସ, ପାରସ୍ପରିକ ଲାଭ ଏବଂ ବିଜୟ-ବିଜୟ ସହଯୋଗର ଭାବନାରେ ମାଲେସିଆ ଏବଂ ଭାରତ ମଧ୍ୟରେ ବିମାନ ଯୋଗାଯୋଗକୁ ମଜବୁତ କରିବା ପାଇଁ ସେମାନଙ୍କର ପ୍ରତିବଦ୍ଧତା ପୁନଃ ନିଶ୍ଚିତ କରିଥିଲେ। ଯାତ୍ରୀଙ୍କ ଚାହିଦାରେ କ୍ରମାଗତ ଅଭିବୃଦ୍ଧି ଏବଂ ପର୍ଯ୍ୟଟନ, ବାଣିଜ୍ୟ ଏବଂ ଜନସମ୍ପର୍କ ବିନିମୟ ପାଇଁ ଉନ୍ନତ ଯୋଗାଯୋଗର ଗୁରୁତ୍ୱକୁ ସ୍ୱୀକାର କରି ଉଭୟ ସରକାର ବେସାମରିକ ବିମାନ ଚଳାଚଳ କ୍ଷେତ୍ରରେ ସହଯୋଗକୁ ଆହୁରି ଗଭୀର କରିବାକୁ ସହମତ ହୋଇଥିଲେ।
ଏହି ପ୍ରସଙ୍ଗରେ, ମାଲେସିଆ ପକ୍ଷ ବର୍ତ୍ତମାନର ବିମାନ ଚଳାଚଳ ଅଧିକାରକୁ ଆହୁରି ବୃଦ୍ଧି କରିବାକୁ ପ୍ରସ୍ତାବ ଦେଇଥିଲେ। ଭାରତୀୟ ପକ୍ଷ ଏହି ଅନୁରୋଧକୁ ଧ୍ୟାନରେ ରଖିଥିଲେ।
ଦୁଇ ନେତା କୁଆଲାଲାମ୍ପୁରର ପ୍ରତିଷ୍ଠିତ ୟୁନିଭରସିଟି ମାଲାୟାଠାରେ ଥିରୁଭାଲୁଭର ଚେୟାର ଅଫ୍ ଇଣ୍ଡିଆନ୍ ଷ୍ଟଡିଜ୍ର କାର୍ଯ୍ୟକାରିତାକୁ ପ୍ରଶଂସା କରିଥିଲେ ଏବଂ ୟୁନିଭରସିଟି ମାଲାୟାରେ ଥିରୁଭାଲୁଭର ସେଣ୍ଟର ପ୍ରତିଷ୍ଠାକୁ ସ୍ୱାଗତ କରିଥିଲେ। ମାଲେସିଆ ନାଗରିକଙ୍କ ପାଇଁ ଥିରୁଭାଲୁଭର ବୃତ୍ତି ଘୋଷଣାକୁ ପ୍ରଧାନମନ୍ତ୍ରୀ ଅନୱାର ସ୍ୱାଗତ କରିଥିଲେ।
ସ୍ୱାସ୍ଥ୍ୟସେବା ସହଯୋଗ
ଉଭୟ ନେତା ସ୍ୱାସ୍ଥ୍ୟସେବା ଏବଂ ପାରମ୍ପରିକ ଚିକିତ୍ସା କ୍ଷେତ୍ରରେ ସହଭାଗିତାକୁ ଦୋହରାଇଥିଲେ। ସମଗ୍ର ଅଞ୍ଚଳରେ ଗୁରୁତ୍ୱପୂର୍ଣ୍ଣ ଚିକିତ୍ସା ଆବଶ୍ୟକତାକୁ ସମାଧାନ କରିବା ପାଇଁ ସ୍ୱାସ୍ଥ୍ୟ ସମ୍ବନ୍ଧୀୟ ପଦକ୍ଷେପଗୁଡ଼ିକୁ ଅନୁସନ୍ଧାନ କରିବା ପାଇଁ ଉଭୟ ନେତା ପ୍ରତିଶ୍ରୁତିବଦ୍ଧ ହୋଇଥିଲେ।
ଇଣ୍ଡିଆନ୍ ଟେକ୍ନିକାଲ୍ ଆଣ୍ଡ ଇକୋନୋମିକ କୋଅପରେସନ୍ କାର୍ଯ୍ୟକ୍ରମ ଅଧୀନରେ ଭବିଷ୍ୟତରେ ମାଲେସିଆରେ ପାରମ୍ପରିକ ଭାରତୀୟ ଚିକିତ୍ସା ବିଶେଷଜ୍ଞଙ୍କ ନିୟୋଜନ ସକ୍ଷମ କରିବା ପାଇଁ ଆବଶ୍ୟକ ବ୍ୟବସ୍ଥା କରିବାକୁ ମାଲେସିଆ ପ୍ରତିବଦ୍ଧ ରହିଛି ଏବଂ ଭାରତ ସହିତ ସକ୍ରିୟ ପରାମର୍ଶ କରୁଛି। ଏହା ମନୋନୀତ ସ୍ୱାସ୍ଥ୍ୟ ମନ୍ତ୍ରଣାଳୟର ଡାକ୍ତରଖାନାଗୁଡ଼ିକରେ ଟିଆଇଏମ ସେବା ପୁନରାରମ୍ଭକୁ ସହଜ କରିବ, ଯାହା ଆମେ ଏକ ସମନ୍ୱିତ ଏବଂ ସାମଗ୍ରିକ ଚିକିତ୍ସା ମଡେଲ ଆଡକୁ ଅଗ୍ରସର ହେବା ସହିତ ଆଲୋପାଥିକ ଚିକିତ୍ସାର ପରିପୂରକ ହେବ।
ଉଭୟ ପ୍ରଧାନମନ୍ତ୍ରୀ ସୁଲଭ ସ୍ୱାସ୍ଥ୍ୟସେବା ଏବଂ ଔଷଧ କ୍ଷେତ୍ରରେ ଚାଲିଥିବା ଦ୍ୱିପାକ୍ଷିକ ସହଯୋଗ ବିଷୟରେ ଉଲ୍ଲେଖ କରିଥିଲେ ଏବଂ ଔଷଧ ନିୟନ୍ତ୍ରଣ, ଫାର୍ମାକୋପିଆର ସ୍ୱୀକୃତି ଏବଂ ନର୍ସିଂ ସେବାର ସ୍ୱୀକୃତି କ୍ଷେତ୍ରରେ ସହଯୋଗ ଉପରେ ଉଭୟ ପକ୍ଷର ଆଲୋଚନାକୁ ସ୍ୱାଗତ କରିଥିଲେ।
ଦୁଇ ନେତା ଅକ୍ଟୋବର ୨୦୨୫ ରେ ଭାରତର ସେଣ୍ଟ୍ରାଲ କାଉନସିଲ୍ ଫର ରିସର୍ଚ୍ଚ ଇନ୍ ହୋମିଓପାଥି ଏବଂ ମାଲେସିଆର ୟୁନିଭରସିଟି ଅଫ୍ ସାଇବରଜାୟା ମଧ୍ୟରେ ବୁଝାମଣାପତ୍ର ସ୍ୱାକ୍ଷରିତ ହେବାକୁ ସ୍ୱାଗତ କରିଥିଲେ, ଯାହା ହୋମିଓପାଥିରେ ଗବେଷଣା ସହଯୋଗ, ପ୍ରଶିକ୍ଷଣ ଏବଂ ଏକାଡେମିକ୍ ବିନିମୟକୁ ପ୍ରୋତ୍ସାହିତ କରେ।
ସ୍ଥାୟୀ ବିକାଶ କ୍ଷେତ୍ରରେ ସହଯୋଗ
ଦୁଇ ଦେଶର ନେତା ଜୈବ ବିବିଧତା ସଂରକ୍ଷଣ ପ୍ରତି ସେମାନଙ୍କର ମିଳିତ ଉତ୍ସର୍ଗୀକୃତ ଭାବନା ଉପରେ ଗୁରୁତ୍ୱାରୋପ କରିଥିଲେ ଏବଂ ଅନ୍ତର୍ଜାତୀୟ ବିଗ୍ କ୍ୟାଟ୍ ଆଲାଏନ୍ସ (IBCA) ର ପ୍ରତିଷ୍ଠାତା ସଦସ୍ୟ ଭାବରେ ମାଲେସିଆର ଭୂମିକାକୁ ଆଲୋକପାତ କରିଥିଲେ। ଗବେଷଣା ଏବଂ ବିକାଶ, ଦକ୍ଷତା ବୃଦ୍ଧି, ପ୍ରଯୁକ୍ତିବିଦ୍ୟା ହସ୍ତାନ୍ତର ଏବଂ ସର୍ବୋତ୍ତମ ଅଭ୍ୟାସର ଆଦାନପ୍ରଦାନ ଭଳି କ୍ଷେତ୍ରରେ ବର୍ଦ୍ଧିତ ଦ୍ୱିପାକ୍ଷିକ ସହଯୋଗ ମାଧ୍ୟମରେ ମାଲେସିଆ ଏବଂ ଭାରତ ସମେତ ବିଶ୍ୱର ବିରାଟ ବଗ (Big Cat) ପ୍ରଜାତିଗୁଡ଼ିକର ସୁରକ୍ଷା ଏବଂ ସଂରକ୍ଷଣ ପାଇଁ ଉଭୟ ନେତା ସେମାନଙ୍କର ପ୍ରତିବଦ୍ଧତା ପୁନଃ ନିଶ୍ଚିତ କରିଥିଲେ।
ପ୍ରାକୃତିକ ଏବଂ ମାନବକୃତ ବିପର୍ଯ୍ୟୟ ପ୍ରତି ଉଭୟ ଦେଶର ସମ୍ବେଦନଶୀଳତାକୁ ସ୍ୱୀକାର କରି ନେତାମାନେ ବିପର୍ଯ୍ୟୟ ସହଯୋଗକୁ ମଜବୁତ କରିବା ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ଏଥିରେ ବିଶେଷଜ୍ଞତା ବାଣ୍ଟିବା, ବିପର୍ଯ୍ୟୟ ପରିଚାଳନା ଏବଂ ସନ୍ଧାନ ଓ ଉଦ୍ଧାର କୌଶଳରେ କର୍ମଚାରୀଙ୍କ ପ୍ରଶିକ୍ଷଣ ଏବଂ ମିଳିତ ଅଭ୍ୟାସ ପରିଚାଳନା ଅନ୍ତର୍ଭୁକ୍ତ। ଉଭୟ ଦେଶର ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କ ମଧ୍ୟରେ ବିପର୍ଯ୍ୟୟ ପରିଚାଳନା ସହଯୋଗ ସମ୍ପର୍କିତ ବୁଝାମଣାପତ୍ର ଅଧୀନରେ ଏଭଳି ପ୍ରୟାସ ଜାରି ରହିବ। ବିପର୍ଯ୍ୟୟ ବିପଦ ହ୍ରାସ ଏବଂ ସହନଶୀଳତା କ୍ଷେତ୍ରରେ ଅନ୍ତର୍ଜାତୀୟ ସହଯୋଗକୁ ପ୍ରୋତ୍ସାହିତ କରିବାରେ ବିପର୍ଯ୍ୟୟ ପ୍ରତିରୋଧୀ ଭିତ୍ତିଭୂମି ପାଇଁ ମେଣ୍ଟ ସମେତ ପ୍ରାସଙ୍ଗିକ ଆଞ୍ଚଳିକ ଏବଂ ଅନ୍ତର୍ଜାତୀୟ ପଦକ୍ଷେପର ଗୁରୁତ୍ୱକୁ ନେତାମାନେ ସ୍ୱୀକାର କରିଥିଲେ।
ଆଞ୍ଚଳିକ ଏବଂ ବହୁପକ୍ଷୀୟ ସହଯୋଗ
ନେତାମାନେ ଜରୁରୀ ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗରେ ମତାମତ ଆଦାନପ୍ରଦାନ କରିଥିଲେ। ସେମାନେ ସଂଳାପ ଏବଂ କୂଟନୀତି ମାଧ୍ୟମରେ ବିବାଦର ଶାନ୍ତିପୂର୍ଣ୍ଣ ସମାଧାନର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।
ମାଲେସିଆ ଭାରତର ୨୦୨୬ ବ୍ରିକ୍ସ ଅଧ୍ୟକ୍ଷତାକୁ ସ୍ୱାଗତ କରିଥିବାବେଳେ ଭାରତ ବ୍ରିକ୍ସ ଅଂଶୀଦାର ଦେଶ ଭାବରେ ମାଲେସିଆର ଭୂମିକାକୁ ସମର୍ଥନ କରିବା ପାଇଁ ନିଜର ପ୍ରତିବଦ୍ଧତା ଦୋହରାଇଥିଲା। ବ୍ରିକ୍ସର ସଦସ୍ୟ ହେବା ପାଇଁ ମାଲେସିଆର ଆକାଂକ୍ଷାକୁ ମଧ୍ୟ ଧ୍ୟାନ ଦେଇଥିଲା। ଉଭୟ ନେତା ଏହି ସହଯୋଗକୁ ଏକ ଅଧିକ ସନ୍ତୁଳିତ ଏବଂ ପ୍ରତିନିଧିତ୍ୱମୂଳକ ଆନ୍ତର୍ଜାତୀୟ ବ୍ୟବସ୍ଥା ଦିଗରେ ଏକ ରଣନୈତିକ ମାଇଲଖୁଣ୍ଟ ଭାବରେ ସ୍ୱୀକାର କରିଥିଲେ। ଉଭୟ ନେତା ମଧ୍ୟ ମତ ବ୍ୟକ୍ତ କରିଥିଲେ ଯେ ଏଭଳି ସମ୍ପୃକ୍ତି ଅର୍ଥନୀତିଗୁଡ଼ିକ ପାଇଁ ସମାନ ବିଶ୍ୱ ଶାସନ ଏବଂ ସ୍ଥାୟୀ ବିକାଶରେ ଗଠନମୂଳକ ଅବଦାନ ଦେବା ପାଇଁ ଗୁରୁତ୍ୱପୂର୍ଣ୍ଣ ପ୍ଲାଟଫର୍ମ ପ୍ରଦାନ କରେ।
ଜାତିସଂଘ ସମେତ ବହୁପକ୍ଷୀୟ ମଞ୍ଚରେ ସହଯୋଗକୁ ମଜବୁତ କରିବା ଏବଂ ଅନ୍ତର୍ଜାତୀୟ ଅନୁଷ୍ଠାନଗୁଡ଼ିକର ସଂସ୍କାରକୁ ସମର୍ଥନ କରିବା ପାଇଁ ଦୁଇ ପ୍ରଧାନମନ୍ତ୍ରୀ ସହମତ ହୋଇଥିଲେ। ସେମାନେ ସମସାମୟିକ ବାସ୍ତବତାକୁ ପ୍ରତିଫଳିତ କରୁଥିବା ବହୁପକ୍ଷବାଦକୁ ବୃଦ୍ଧି କରିବା ପାଇଁ ମିଳିତ ଭାବେ କାର୍ଯ୍ୟ କରିବାକୁ ପ୍ରତିଶ୍ରୁତି ଦେଇଥିଲେ ଯାହାଦ୍ୱାରା ୟୁଏନଏସସି ସମେତ ଅନ୍ତର୍ଜାତୀୟ ସଂଗଠନଗୁଡ଼ିକୁ ଅଧିକ ପ୍ରତିନିଧିତ୍ୱମୂଳକ କରାଯାଇପାରିବ। ବହୁପକ୍ଷୀୟ ମଞ୍ଚଗୁଡ଼ିକରେ ପାରସ୍ପରିକ ସମର୍ଥନର ଦୃଢ଼ ଭାବନାକୁ ପ୍ରତିଫଳିତ କରି ଦୁଇ ନେତା ବିଭିନ୍ନ ଅନ୍ତର୍ଜାତୀୟ ପ୍ରାର୍ଥୀତ୍ୱ ପାଇଁ ପାରସ୍ପରିକ ସମର୍ଥନ ଉପରେ ଆଲୋଚନା କରିଥିଲେ। ଏକ ସଂସ୍କାରିତ ୟୁଏନଏସସିରେ ଭାରତର ସ୍ଥାୟୀ ସଦସ୍ୟତା ପାଇଁ ମାଲେସିଆର ସମର୍ଥନକୁ ଭାରତ ଗଭୀର ପ୍ରଶଂସା କରିଛି।
ଦୁଇ ନେତା ଦୁର୍ନୀତିର ମୁକାବିଲା ଏବଂ ପ୍ରତିରୋଧ କ୍ଷେତ୍ରରେ ସହଯୋଗ ସମ୍ପର୍କିତ ବୁଝାମଣାପତ୍ର; ବିପର୍ଯ୍ୟୟ ପରିଚାଳନା ସମ୍ପର୍କିତ ବୁଝାମଣା; ମାଲେସିଆରେ ବୀମାଭୁକ୍ତ ବ୍ୟକ୍ତି ଭାବରେ ଭାରତୀୟ ନାଗରିକଙ୍କ ପାଇଁ ସାମାଜିକ ସୁରକ୍ଷା କାର୍ଯ୍ୟକ୍ରମ ଏବଂ କାର୍ଯ୍ୟକଳାପକୁ ପ୍ରୋତ୍ସାହିତ କରିବା କ୍ଷେତ୍ରରେ ସହଯୋଗ ସମ୍ପର୍କିତ ବୁଝାମଣାପତ୍ର; ଏବଂ ଅଡିଓ-ଭିଜୁଆଲ୍ କୋ-ପ୍ରଡକ୍ସନ୍ ସମ୍ପର୍କିତ ଚୁକ୍ତିନାମା ସ୍ୱାକ୍ଷରିତ ହେବାକୁ ସ୍ୱାଗତ କରିଥିଲେ। ଦୁଇ ପ୍ରଧାନମନ୍ତ୍ରୀ ମାଲେସିଆ ଏବଂ ଭାରତ ମଧ୍ୟରେ ସେମିକଣ୍ଡକ୍ଟର; ସ୍ୱାସ୍ଥ୍ୟସେବା; ଜାତୀୟ ସୁରକ୍ଷା; ଏବଂ ବୃତ୍ତିଗତ ଶିକ୍ଷା ଓ ପ୍ରଶିକ୍ଷଣ ସହଯୋଗ ଉପରେ ‘ଏକ୍ସଚେଞ୍ଜ୍ ଅଫ୍ ନୋଟସ୍’ର ମଧ୍ୟ ସାକ୍ଷୀ ରହିଥିଲେ। ଏଥିସହ,ଉଭୟ ନେତା ଜାତିସଂଘ ଶାନ୍ତିରକ୍ଷା ସହଯୋଗ ସମ୍ପର୍କିତ ବୁଝାମଣାର ନବୀକରଣ ଉପରେ ‘ଏକ୍ସଚେଞ୍ଜ୍ ଅଫ୍ ଲେଟର୍ସ’ ଏବଂ ଅନ୍ତର୍ଜାତୀୟ ବିଗ୍ କ୍ୟାଟ୍ସ ଆଲାଏନ୍ସ ର ଫ୍ରେମୱାର୍କ ଚୁକ୍ତିନାମାକୁ ମାଲେସିଆ ଦ୍ୱାରା ଅନୁମୋଦନ କରାଯିବା ବିଷୟରେ ଉଲ୍ଲେଖ କରିଥିଲେ।
ଦୁଇ ନେତା ଜାତିସଂଘ ସାମୁଦ୍ରିକ ଆଇନ ସମ୍ମିଳନୀ (UNCLOS) ୧୯୮୨ରେ ପ୍ରତିଫଳିତ ଅନ୍ତର୍ଜାତୀୟ ଆଇନର ନୀତିଗୁଡ଼ିକ ଉପରେ ଆଧାରିତ ଜଳପଥ ପରିଚାଳନା ଏବଂ ବିମାନ ଚଳାଚଳର ସ୍ୱାଧୀନତା ଏବଂ ବାଧାହୀନ ବୈଧ ବାଣିଜ୍ୟକୁ ସମ୍ମାନ ଦେବା ପାଇଁ ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ। ଦୁଇ ନେତା UNCLOS ୧୯୮୨ ସମେତ ଅନ୍ତର୍ଜାତୀୟ ଆଇନର ସର୍ବମାନ୍ୟ ସ୍ୱୀକୃତିପ୍ରାପ୍ତ ନୀତି ଅନୁଯାୟୀ ଶାନ୍ତିପୂର୍ଣ୍ଣ ଉପାୟରେ ବିବାଦର ସମାଧାନ କରିବାକୁ ସମସ୍ତ ପକ୍ଷକୁ ଅନୁରୋଧ କରିଥିଲେ।
ପ୍ରଧାନମନ୍ତ୍ରୀ ଅନୱାର ଇବ୍ରାହିମ ଏସିଆନ୍ ଏକତା ଏବଂ ଏସିଆନ୍ କେନ୍ଦ୍ରୀୟତା ପାଇଁ ଭାରତର ପୂର୍ଣ୍ଣ ଏବଂ ନିରନ୍ତର ସମର୍ଥନକୁ ସ୍ୱାଗତ କରିଥିଲେ। ପ୍ରଧାନମନ୍ତ୍ରୀ ମୋଦୀ ୨୦୨୫ ରେ ଏସିଆନର ସଫଳ ଅଧ୍ୟକ୍ଷତା ପାଇଁ ମାଲେସିଆକୁ ପ୍ରଶଂସା କରିଥିଲେ ଏବଂ ଏସିଆନ୍-ଭାରତ ବ୍ୟାପକ ରଣନୈତିକ ସହଭାଗିତାକୁ ମିଳିତ ଭାବେ ମଜବୁତ କରିବାରେ ସମର୍ଥନ ପାଇଁ ମାଲେସିଆ ଏବଂ ଅନ୍ୟ ଏସିଆନ୍ ସଦସ୍ୟ ଦେଶଗୁଡ଼ିକୁ ଧନ୍ୟବାଦ ଜଣାଇଥିଲେ।
ଉଭୟ ନେତା ଏକ ମୁକ୍ତ, ଖୋଲା, ନିୟମ-ଆଧାରିତ, ଶାନ୍ତିପୂର୍ଣ୍ଣ ଏବଂ ସମୃଦ୍ଧ ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳକୁ ପ୍ରୋତ୍ସାହିତ କରିବା ପାଇଁ ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ। ଏଓଆଇପି ଏବଂ ଭାରତର ଇଣ୍ଡୋ-ପାସିଫିକ୍ ଓସେନ୍ସ ଇନିସିଏଟିଭ୍ (IPOI) ମଧ୍ୟରେ ବର୍ଦ୍ଧିତ ସହଯୋଗ ମାଧ୍ୟମରେ ‘ଅଞ୍ଚଳରେ ଶାନ୍ତି, ସ୍ଥିରତା ଏବଂ ସମୃଦ୍ଧି ପାଇଁ ଇଣ୍ଡୋ-ପାସିଫିକ୍ ଉପରେ ଆସିଆନ୍ ଆଉଟଲୁକ୍ (AOIP) ଉପରେ ସହଯୋଗ ସମ୍ପର୍କିତ ଆସିଆନ୍-ଭାରତ ମିଳିତ ବିବୃତି’ କାର୍ଯ୍ୟକାରୀ କରିବା ପାଇଁ ପ୍ରୟାସକୁ ଗଭୀର କରିବାକୁ ଉଭୟ ପକ୍ଷ ସ୍ୱାଗତ କରିଥିଲେ, ଯେଉଁଥିରେ ଆଓଆଇପିର ସହଯୋଗ କ୍ଷେତ୍ରଗୁଡ଼ିକୁ କାର୍ଯ୍ୟକାରୀ କରିବା ପାଇଁ ନିର୍ଦ୍ଦିଷ୍ଟ ପଦକ୍ଷେପଗୁଡ଼ିକ ଅନ୍ତର୍ଭୁକ୍ତ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗସ୍ତ ସମୟରେ ତାଙ୍କୁ ଏବଂ ତାଙ୍କ ପ୍ରତିନିଧି ଦଳକୁ ପ୍ରଦାନ କରାଯାଇଥିବା ଉଷ୍ମ ସ୍ୱାଗତ ଏବଂ ଭବ୍ୟ ଆତିଥ୍ୟ ପାଇଁ ପ୍ରଧାନମନ୍ତ୍ରୀ ଅନୱାର ଇବ୍ରାହିମ ଏବଂ ମାଲେସିଆର ଜନସାଧାରଣଙ୍କ ପ୍ରତି ଗଭୀର କୃତଜ୍ଞତା ଜଣାଇଥିଲେ। ପ୍ରଧାନମନ୍ତ୍ରୀ ମୋଦୀ ନିକଟ ଭବିଷ୍ୟତରେ ଭାରତ ଗସ୍ତ କରିବା ପାଇଁ ପ୍ରଧାନମନ୍ତ୍ରୀ ଅନୱାର ଇବ୍ରାହିମଙ୍କୁ ସୌହାର୍ଦ୍ଦ୍ୟପୂର୍ଣ୍ଣ ନିମନ୍ତ୍ରଣ ଜଣାଇଥିଲେ।