ନୂଆଦିଲ୍ଲୀ: ଇଣ୍ଡିଗୋ ବିମାନକୁ ବୋମା ଧମକ। ଦିଲ୍ଲୀରୁ ବାଗଡୋଗରା ଯାଉଥିବା ଇଣ୍ଡିଗୋ ଏଟାରଲାଇନ୍ସର ଏକ ବିମାନକୁ ବୋମା ଧମକ ମିଳିଛି। ବୋମା ଧମକ ମିଳିବା ପରେ ସୁରକ୍ଷା ପ୍ରୋଟୋକଲ ଅନୁସରଣ କରି, ବିମାନଟିକୁ ତୁରନ୍ତ ଲକ୍ଷ୍ନୌର ଚୌଧୁରୀ ଚରଣ ସିଂହ ଅନ୍ତର୍ଜାତୀୟ ବିମାନବନ୍ଦରରେ ଜରୁରୀକାଳୀନ ଅବତରଣ କରାଯାଇଛି। ସୂଚନା ଅନୁସାରେ, ଆଜି ସକାଳ ପ୍ରାୟ ୮:୪୬ ସମୟରେ, ଏୟାର ଟ୍ରାଫିକ୍ କଣ୍ଟ୍ରୋଲ (ଏଟିସି) ସୂଚନା ପାଇଥିଲା ଯେ ଇଣ୍ଡିଗୋ ବିମାନ ନମ୍ବର ୬ଇ-୬୬୫୦ରେ ବୋମା ଥିବା ସନ୍ଦେହ କରାଯାଉଛି। ସୂଚନା ପାଇବା ପରେ ଲକ୍ଷ୍ନୌ ବିମାନବନ୍ଦରରେ ସତର୍କ ସୂଚନା ଘୋଷଣା କରାଯାଇଥିଲା। ବିମାନଟି ସକାଳ ୯:୧୭ରେ ଲକ୍ଷ୍ନୌ ବିମାନବନ୍ଦରରେ ସୁରକ୍ଷିତ ଭାବରେ ଅବତରଣ କରିଥିଲା। ଅବତରଣ ପରେ ତୁରନ୍ତ, ବିମାନକୁ ମୁଖ୍ୟ ରନୱେରୁ ବାହାର କରି ଏକ ଆଇସୋଲେସନ୍ ୱେକୁ ସ୍ଥାନାନ୍ତର କରାଯାଇଥିଲା।
ତଦନ୍ତରୁ ଜଣାପଡ଼ିଲା ଯେ ଶୌଚାଳୟରେ ମିଳିଥିବା ଏକ ଟିସୁ ଯୋଗୁଁ ଆତଙ୍କ ସୃଷ୍ଟି ହୋଇଥିଲା। ଟିସୁରେ ଏକ ହାତଲେଖା ନୋଟ ଥିଲା। ନୋଟରେ ଲେଖାଥିଲା, “ବିମାନ ଉପରେ ବୋମା।” ନୋଟଟି ଦେଖିବା ପରେ, କ୍ରୁ ସଦସ୍ୟମାନେ ତୁରନ୍ତ ପାଇଲଟଙ୍କୁ ଜଣାଇଥିଲେ ଏବଂ ସତର୍କତାମୂଳକ ପଦକ୍ଷେପ ସ୍ୱରୂପ ଜରୁରୀକାଳୀନ ଅବତରଣ କରିବାକୁ ନିଷ୍ପତ୍ତି ନିଆଯାଇଥିଲା। ବିମାନଟିରେ ମୋଟ ୨୨୨ ଜଣ ବୟସ୍କ ଯାତ୍ରୀ ଏବଂ ଆଠ ଜଣ ଶିଶୁ ଥିଲେ। ଏହା ବ୍ୟତୀତ, ଦୁଇଜଣ ପାଇଲଟ୍ ଏବଂ ପାଞ୍ଚ ଜଣ କ୍ରୁ ସଦସ୍ୟ (ମୋଟ ୨୩୭ ଜଣ) ଥିଲେ। କର୍ତ୍ତୃପକ୍ଷ ନିଶ୍ଚିତ କରିଛନ୍ତି ଯେ ସମସ୍ତ ଯାତ୍ରୀ ଏବଂ କ୍ରୁ ସଦସ୍ୟଙ୍କୁ ସୁରକ୍ଷିତ ଭାବରେ ସ୍ଥାନାନ୍ତର କରାଯାଇଛି ଏବଂ ସେମାନେ ସୁରକ୍ଷିତ ଅଛନ୍ତି।
ଏସିପି ରଜନୀଶ ବର୍ମା ଏବଂ ବିମାନବନ୍ଦର ସୁରକ୍ଷା ଅଧିକାରୀଙ୍କ ଅନୁଯାୟୀ, ବୋମା ନିଷ୍କ୍ରିୟକାରୀ ଦଳ (ବିଡିଡିଏସ୍), ସ୍ଥାନୀୟ ପୋଲିସ ଏବଂ ବିମାନବନ୍ଦର ସୁରକ୍ଷା ଏଜେନ୍ସିଗୁଡ଼ିକ ଘଟଣାସ୍ଥଳରେ ପହଞ୍ଚିଛନ୍ତି। ବିମାନ ଏବଂ ଯାତ୍ରୀମାନଙ୍କ ଲଗେଜଗୁଡ଼ିକର ପୁଙ୍ଖାନୁପୁଙ୍ଖ ଯାଞ୍ଚ କରାଯାଉଛି। ବର୍ତ୍ତମାନ ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣରେ ଅଛି ଏବଂ ଆଇନ ଶୃଙ୍ଖଳା ସ୍ୱାଭାବିକ ଅଛି। ସୁରକ୍ଷା ଏଜେନ୍ସିଗୁଡ଼ିକ ତଦନ୍ତ କରୁଛନ୍ତି। ଟିସୁ ନୋଟ୍ କିଏ ଏବଂ କେଉଁ ଉଦ୍ଦେଶ୍ୟରେ ଲେଖିଛି ତାହା ଜାଣିବା ପାଇଁ ପ୍ରୟାସ କରାଯାଉଛି। ସମ୍ପୂର୍ଣ୍ଣ ତଦନ୍ତ ସମାପ୍ତ ନହେବା ପର୍ଯ୍ୟନ୍ତ ବିମାନକୁ ଏକ ଆଇସୋଲେସନ ୱେରେ ରଖାଯିବ। ବିମାନବନ୍ଦରରେ ଯାତ୍ରୀମାନଙ୍କ ପାଇଁ ଜଳପାନ ଏବଂ ପରବର୍ତ୍ତୀ ଯାତ୍ରା ପାଇଁ ବିକଳ୍ପ ବ୍ୟବସ୍ଥା ବିଷୟରେ ବିଚାର କରାଯାଉଛି।
