ଆଇଜଲ: ମିଜୋରାମ ବିଧାନସଭାରେ ବିରୋଧୀ ସଦସ୍ୟଙ୍କ ବିରୋଧ ମଧ୍ୟରେ ରାଜ୍ୟରେ ଭିକ୍ଷାବୃତ୍ତି ନିଷିଦ୍ଧ କରିବା ପାଇଁ ଏକ ବିଲ୍ ଗୃହୀତ ହୋଇଛି। ବୁଧବାର ଦିନ ଗୃହରେ ‘ମିଜୋରାମ ଭିକ୍ଷା ନିଷେଧ’ ବିଲ୍, ୨୦୨୫ ଉପସ୍ଥାପନ କରି ରାଜ୍ୟ ସମାଜ କଲ୍ୟାଣ ମନ୍ତ୍ରୀ ଲାଲରିନପୁଇ କହିଛନ୍ତି ଯେ ଏହାର ଲକ୍ଷ୍ୟ କେବଳ ଭିକ୍ଷାବୃତ୍ତି ନିଷେଧ କରିବା ନୁହେଁ ବରଂ ଭିକ୍ଷାକାରୀମାନଙ୍କୁ ସ୍ଥାୟୀ ଜୀବିକା ନିର୍ବାହର ବିକଳ୍ପ ପ୍ରଦାନ କରି ସେମାନଙ୍କୁ ସାହାଯ୍ୟ ଏବଂ ପୁନର୍ବାସ କରିବା। ମିଜୋରାମରେ ବଢ଼ୁଥିବା ଭିକ୍ଷାବୃତ୍ତି ଉପରେ ଚିନ୍ତା ପ୍ରକାଶ କରି ସେ କହିଛନ୍ତି ଯେ ଆମ ରାଜ୍ୟ ବହୁତ ଭାଗ୍ୟବାନ, ଏଠାକାର ସାମାଜିକ ଗଠନ, ଚର୍ଚ୍ଚ ଏବଂ ଏନଜିଓର ଅଂଶଗ୍ରହଣରେ ରାଜ୍ୟରେ କାର୍ଯ୍ୟକାରୀ ହେଉଥିବା କଲ୍ୟାଣକାରୀ ଯୋଜନା ଯୋଗୁଁ ରାଜ୍ୟରେ ଭିକ୍ଷାବୃତ୍ତିକାରୀଙ୍କ ସଂଖ୍ୟା ବହୁତ କମ୍।
ସେ କହିଛନ୍ତି ଯେ ସାଇରାଙ୍ଗ-ସିହମୁଆଇ ରେଳ ଷ୍ଟେସନ ଖୋଲିବା ପରେ, ଅନ୍ୟ ରାଜ୍ୟରୁ ମିଜୋରାମକୁ ଭିକାରୀ ଆସିବାର ସମ୍ଭାବନା ବୃଦ୍ଧି ପାଇବ। ଏହି ରେଳ ଲାଇନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସେପ୍ଟେମ୍ବର ୧୩ରେ ଉଦଘାଟନ କରିବେ। ଲାଲରିନପୁଇ କହିଛନ୍ତି, “ସରକାର ବିଶ୍ୱାସ କରନ୍ତି ଯେ ଉପଯୁକ୍ତ ନିୟାମକ ଢାଞ୍ଚା ମାଧ୍ୟମରେ ଏହା ରାଜ୍ୟକୁ ଭିକାରୀ ମୁକ୍ତ ରଖିପାରିବ।” ମନ୍ତ୍ରୀ କହିଛନ୍ତି ଯେ ସରକାର ଏକ ରାଜ୍ୟସ୍ତରୀୟ ‘ରିଲିଫ୍ ବୋର୍ଡ’ ସ୍ଥାପନ କରିବେ ଯାହା ଭିକାରୀଙ୍କୁ ଅସ୍ଥାୟୀ ଭାବରେ ରଖିବା ପାଇଁ ‘ଗ୍ରହଣ’ କେନ୍ଦ୍ର ସ୍ଥାପନ କରିବ। ସେ କହିଛନ୍ତି ଯେ ଭିକାରୀମାନଙ୍କୁ ପ୍ରଥମେ ‘ଗ୍ରହଣ’ କେନ୍ଦ୍ରରେ ରଖାଯିବ ଏବଂ ୨୪ ଘଣ୍ଟା ମଧ୍ୟରେ ସେମାନଙ୍କ ଜନ୍ମସ୍ଥାନ କିମ୍ବା ରାଜ୍ୟକୁ ପଠାଯିବ।
ମନ୍ତ୍ରୀ କହିଛନ୍ତି ଯେ ସମାଜ କଲ୍ୟାଣ ବିଭାଗ ଦ୍ୱାରା କରାଯାଇଥିବା ଏକ ସର୍ଭେ ଅନୁଯାୟୀ, ରାଜ୍ୟ ରାଜଧାନୀ ଆଇଜଲରେ ସ୍ଥାନୀୟ ବାସିନ୍ଦାଙ୍କ ସମେତ ୩୦ରୁ ଅଧିକ ଭିକାରୀ ଅଛନ୍ତି। ମିଜୋ ନ୍ୟାସନାଲ୍ ଫ୍ରଣ୍ଟ (ଏମ୍ଏନ୍ଏଫ୍) ନେତା ଲାଲଛାନ୍ଦମା ରାଲଟେଙ୍କ ସମେତ ବିରୋଧୀ ସଦସ୍ୟମାନେ କହିଛନ୍ତି ଯେ ଏହି ବିଲ୍ ଖ୍ରୀଷ୍ଟିଆନିଟି ପାଇଁ କ୍ଷତିକାରକ ଏବଂ ଏହା ରାଜ୍ୟର ପ୍ରତିଷ୍ଠାକୁ କ୍ଷୁର୍ଣ୍ଣ କରିବ। ବିଧାନସଭାରେ ଦୀର୍ଘ ଆଲୋଚନା ପରେ ବିଲ୍ ପାସ୍ ହୋଇଥିଲା, ଯେଉଁଥିରେ ଲାଲଡୁହୋମାଙ୍କ ସମେତ ୧୩ ଜଣ ସଦସ୍ୟ ଅଂଶଗ୍ରହଣ କରିଥିଲେ।
