ଗୁଜୁରାଟ: ଦିନକୁ ଦିନ ବୁଲା କୁକୁରଙ୍କ ଆତଙ୍କ ବୃଦ୍ଧି ପାଇବାରେ ଲାଗିଛି । ଗୁଜୁରାଟର ଛୋଟା ଉଦୟପୁରର ଧନପୁର ଅଞ୍ଚଳରେ ଏକ ବୁଲା କୁକୁର ତିନି ବର୍ଷର ଶିଶୁକୁ ହତ୍ୟା କରିଛି। ସୂଚନା ଅନୁସାରେ, ଶିଶୁଟି ସନ୍ଧ୍ୟାରେ ଘର ବାହାରେ ଖେଳୁଥିବା ସମୟରେ ହଠାତ ଏକ ବୁଲା କୁକୁର ଆସି ତା ଉପରେ ଆକ୍ରମଣ କରିଥିଲା। କୁକୁରଟି ଶିଶୁଟିର ବେକକୁ କାମୁଡି ନେଇ ଗୋଟିଏ ନାଳ ଆଡକୁ ଚାଲିଯାଉଥିଲା। ଛୁଆଟିର ଚିତ୍କାର ଶୁଣି ପାଖରେ ଥିବା ଲୋକମାନେ ଘଟଣାସ୍ଥଳକୁ ଦୌଡ଼ି ଆସି କୁକୁରଠାରୁ ତାକୁ ଉଦ୍ଧାର କଲେ। ଗୁରୁତର ଆହତ ଶିଶୁଟିକୁ ତୁରନ୍ତ ଡାକ୍ତରଖାନା ନିଆଯାଇଥିଲା, କିନ୍ତୁ ଚିକିତ୍ସା ସମୟରେ ହିଁ ତାର ମୃତ୍ୟୁ ଘଟିଥିଲା।
ଏହି ଘଟଣାକୁ ନେଇ ଗ୍ରାମବାସୀ କ୍ରୋଧ ପ୍ରକାଶ କରି କହିଛନ୍ତି ଯେ, ଗତ କିଛି ଦିନ ଧରି ବୁଲା କୁକୁରଙ୍କ ଆତଙ୍କ ବୃଦ୍ଧି ପାଉଛି। ଦିନ ହେଉ କି ରାତି, ରାସ୍ତାରେ ବୁଲୁଥିବା କୁକୁରମାନେ ସମସ୍ତଙ୍କୁ ଆକ୍ରମଣ କରୁଛନ୍ତି। ପୂର୍ବରୁ ଅନେକ ଲୋକ ଆହତ ହୋଇଛନ୍ତି, କିନ୍ତୁ ପ୍ରଶାସନ ଏବଂ ପୌରପାଳିକା ପକ୍ଷରୁ ଏପର୍ଯ୍ୟନ୍ତ କୌଣସି ଠୋସ୍ ପଦକ୍ଷେପ ନିଆଯାଇ ନାହିଁ। ଏହି ଘଟଣା ପରେ ଗାଁ ଲୋକେ ରାଗିଯାଇ ପ୍ରଶାସନଠାରୁ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରୁଛନ୍ତି।
