ହିମାଚଳ: ପ୍ରବଳ ମୌସୁମୀ ବର୍ଷା ହିମାଚଳ ପ୍ରଦେଶରେ ସାଧାରଣ ଜୀବନଯାତ୍ରାକୁ ବ୍ୟାହତ କରିଛି। ରାଜ୍ୟ ଜରୁରୀକାଳୀନ କାର୍ଯ୍ୟ କେନ୍ଦ୍ର ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଜୁନ୍ ୨୦ରେ ମୌସୁମୀ ଆସିବା ପରଠାରୁ ଜୁନ୍ ୨୭ ପର୍ଯ୍ୟନ୍ତ ହିମାଚଳରେ ୩୧ ଜଣଙ୍କର ମୃତ୍ୟୁ ହୋଇଛି। ୪ ଜଣ ନିଖୋଜ ଅଛନ୍ତି, ଯେତେବେଳେ ୬୬ ଜଣ ଆହତ ହୋଇଛନ୍ତି। ଏଥିରେ ସାପ କାମୁଡ଼ା, ବୁଡ଼ି ଯିବା, ସଡ଼କ ଦୁର୍ଘଟଣା ଏବଂ ପାଣିରେ ଭାସି ଯାଇଥିବା ଲୋକଙ୍କ ସଂଖ୍ୟା ଅନ୍ତର୍ଭୁକ୍ତ।
ପ୍ରବଳ ବର୍ଷା ଯୋଗୁଁ ରାଜ୍ୟରେ ଗୋଟିଏ ସପ୍ତାହ ମଧ୍ୟରେ ୨୯.୧୬ କୋଟି ଟଙ୍କାର କ୍ଷତି ହୋଇଛି। ପବ୍ଲିକ୍ ୱର୍କସ୍ ବିଭାଗ (ପିଡବ୍ଲୁଡି) ସର୍ବାଧିକ ୨ କୋଟି ୭୪୩.୪୦ ଲକ୍ଷ ଟଙ୍କାର କ୍ଷତି ସହିଛି। ୬ଟି ଘର ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ବେଳେ ୮ଟି କ୍ଷତିଗ୍ରସ୍ତ ହୋଇଛି। ୭ଟି ଦୋକାନ ଏବଂ ୮ଟି ଗୋ ଆଶ୍ରୟସ୍ଥଳ ମଧ୍ୟ ପାଣିରେ ବୁଡ଼ି ଯାଇଛି। ୩୭ଟି ପଶୁ ଏବଂ ପକ୍ଷୀ ମଧ୍ୟ ଭାସି ଯାଇଛନ୍ତି।
ରାଜ୍ୟର ୫୩ଟି ରାସ୍ତା ଯାତାୟାତ ପାଇଁ ବନ୍ଦ କରାଯାଇଛି। ଏହା ସହିତ, ୧୩୫ଟି ବିଦ୍ୟୁତ୍ ଟ୍ରାନ୍ସଫର୍ମର ଏବଂ ୧୪୭ଟି ପାନୀୟ ଜଳ ଯୋଜନା ବନ୍ଦ ହୋଇଯିବା ଯୋଗୁଁ ହଜାର ହଜାର ଲୋକଙ୍କ ଦୈନନ୍ଦିନ ଜୀବନଯାତ୍ରା ପ୍ରଭାବିତ ହେଉଛି। ରାଜ୍ୟରେ ସର୍ବାଧିକ କ୍ଷତି କୁଲୁ ଜିଲ୍ଲାରେ ରେକର୍ଡ କରାଯାଇଛି, ଯେଉଁଠାରେ ୨୩ଟି ରାସ୍ତା ବନ୍ଦ ରହିଛି।
ନିର୍ମାଣ୍ଡ ଏବଂ ଆନି ସବ-ଡିଭିଜନରେ ଜଳ ଯୋଗାଣ ଏବଂ ବିଦ୍ୟୁତ୍ ବ୍ୟବସ୍ଥା ଗୁରୁତର ଭାବରେ ଭୁଶୁଡ଼ି ପଡ଼ିଛି। ଜିଲ୍ଲାରେ ୭୪ଟି ଟ୍ରାନ୍ସଫର୍ମର ଏବଂ ୧୧୮ଟି ପାନୀୟ ଜଳ ଯୋଜନା କାମ କରୁନାହିଁ। ମଣ୍ଡି ଜିଲ୍ଲାରେ ୧୬ଟି ରାସ୍ତା ବନ୍ଦ ଅଛି ଏବଂ ୫୯ଟି ଟ୍ରାନ୍ସଫର୍ମର କାମ କରୁନାହିଁ। କିନ୍ନୌରରେ ୩୩ଟି ପାନୀୟ ଜଳ ଯୋଜନା ପ୍ରଭାବିତ ହୋଇଛି।
ପାଣିପାଗ ବିଭାଗ ଜୁଲାଇ ୩ ପର୍ଯ୍ୟନ୍ତ ପ୍ରବଳ ବର୍ଷା ହେବ ବୋଲି ପୂର୍ବାନୁମାନ କରିଛି। ପ୍ରବଳ ବର୍ଷା ସମ୍ଭାବନାକୁ ଦୃଷ୍ଟିରେ ରଖି ବିଶେଷକରି ଜୁନ ୨୯ ରେ ଅରେଞ୍ଜ ଆଲର୍ଟ ଘୋଷଣା କରାଯାଇଛି। ଆଗାମୀ ୨୪ ଘଣ୍ଟା ମଧ୍ୟରେ ସିମଲା ଏବଂ ସିରମୌର ଜିଲ୍ଲାରେ ବନ୍ୟା ଆଶଙ୍କା ନେଇ ସତର୍କତା ଜାରି କରାଯାଇଛି ଏବଂ ଲୋକମାନଙ୍କୁ ନଦୀ ଏବଂ ନାଳଠାରୁ ଦୂରେଇ ରହିବା ଏବଂ ସତର୍କ ରହିବାକୁ ପରାମର୍ଶ ଦିଆଯାଇଛି।
