ଭୁବନେଶ୍ୱର: ଇଣ୍ଡିଆନଆଏଲ ଇନ୍ଧନ ଷ୍ଟେସନ ସ୍ଥାପନ କରିବାରେ ସାହାଯ୍ୟ କରିବାର ପ୍ରତିଶୃତି ଦେଇ ଜଣେ ବ୍ୟକ୍ତିଙ୍କୁ ୨୦ ଲକ୍ଷ ଟଙ୍କା ଠକି ନେବା ଅଭିଯୋଗରେ ଭୁବନେଶ୍ୱରର ସାଇବର ଅପରାଧ ଏବଂ ଅର୍ଥନୈତିକ ଅପରାଧ ପୋଲିସ ଜଣେ ସାଇବର ଠକକୁ ଗିରଫ କରିଛି । ଭୁବନେଶ୍ୱର ଡିସିପି ଜଗମୋହନ ମୀନା କହିଛନ୍ତି ଯେ ବିହାରର ୱାରିସାଲିଗଞ୍ଜ ଥାନା ଅନ୍ତର୍ଗତ ଅପସହର ଗ୍ରାମର ବାସିନ୍ଦା ସତୀଶ କୁମାର ଭୁବନେଶ୍ୱରର ପଳାଶୁଣିର ବାସିନ୍ଦା ସାରଦା ପ୍ରସନ୍ନ ରାଉତରାୟଙ୍କଠାରୁ ଇଣ୍ଡିଆନଅଏଲ ଇନ୍ଧନ ଷ୍ଟେସନ ସ୍ଥାପନ କରିବାର ପ୍ରତିଶୃତି ଦେଇ ୨୦ ଲକ୍ଷ ଟଙ୍କାର ଚେକ ନେଇଥିଲେ । ପରେ ସେ ନିଜ ଜନ୍ମସ୍ଥାନକୁ ପଳାଇଯାଇଥିଲେ ।
ସେ ଏକ ଠକେଇର ଶିକାର ହୋଇଥିବା ଜାଣିବା ପରେ, ସାରଦା ଭୁବନେଶ୍ୱରର ସାଇବର ପୋଲିସ ଷ୍ଟେସନରେ ଏକ ଅଭିଯୋଗ ଦାଖଲ କରିଥିଲୋ ଯାହା ଆଧାରରେ ଭୁବନେଶ୍ୱର ପୋଲିସ ଏବଂ ଅର୍ଥନୈତିକ ଅପରାଧ ପୋଲିସ ଅପରାଧର ତଦନ୍ତ ଆରମ୍ଭ କରିଥିଲେ । ସବ୍ ଇନ୍ସପେକ୍ଟର ଶୁଭଶ୍ରୀ ନାୟକଙ୍କ ନେତୃତ୍ୱରେ ଏକ ସ୍ୱତନ୍ତ୍ର ସାଇବର ପୋଲିସ ଦଳ ଗଠନ କରାଯାଇଥିଲା। ଅଭିଯୁକ୍ତଙ୍କ ବିବରଣୀ ଟ୍ରାକ୍ କରିବା ପରେ, ସ୍ୱତନ୍ତ୍ର ଦଳ ବିହାର ଗସ୍ତ କରିଥିଲା ଏବଂ ବିହାର ଟେକ୍ନିକାଲ୍ ଇନ୍ସପେକ୍ଟର ବଲବୀର ସିଂହ ଏବଂ ତାଙ୍କର ୪୦ ଜଣିଆ ସ୍କ୍ବାଡ୍ ସମନ୍ୱୟରେ ଏକ ଚଢାଉ କରିଥିଲା। ଛଅ ଦିନର ଅପରେସନ ପରେ, ଦଳ ସତୀଶ କୁମାରଙ୍କୁ ଗିରଫ କରିଥିଲା ଏବଂ ତାଙ୍କ ନିକଟରୁ ଛଅଟି ମୋବାଇଲ୍ ଫୋନ୍, ବ୍ୟାଙ୍କ ପାସବୁକ୍, ସିମ୍ କାର୍ଡ ଏବଂ ଲାପଟପ୍ ଜବତ କରିଥିଲା। ଅଧିକ ତଥ୍ୟ ପାଇଁ ତଦନ୍ତ ଚାଲିଛି।
