୪୧.୭୫ ଲକ୍ଷ ଛାତ୍ରଛାତ୍ରୀ ପାଉଛନ୍ତି ମଧ୍ୟାହ୍ନ ଭୋଜନ: ମନ୍ତ୍ରୀ

ଭୁବନେଶ୍ୱର: ପ୍ରତି ଛାତ୍ରଛାତ୍ରୀଙ୍କ ଖାଦ୍ୟର ମୂଲ୍ୟ କେନ୍ଦ୍ର ସରକାରଙ୍କ ଦ୍ୱାରା ନିର୍ଣ୍ଣୟ କରାଯାଉଛି। ରାଜ୍ୟ ସରକାର ସ୍ଥିର ଖର୍ଚ୍ଚର ନିଜର ଅଂଶ ପ୍ରଦାନ କରୁଛନ୍ତି। ନିଜସ୍ୱ ବଜେଟରୁ ଅତିରିକ୍ତ ଖାଦ୍ୟ ଖର୍ଚ୍ଚ ଯୋଗାଇ ଦେଉଛନ୍ତି। ରାଜ୍ୟର ସରକାରୀ ଏବଂ ସରକାରୀ ସହାୟତା ପ୍ରାପ୍ତ ବିଦ୍ୟାଳୟଗୁଡ଼ିକରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ମୋଟ ୪୧,୭୪,୯୧୫ ଜଣ ଛାତ୍ରଛାତ୍ରୀ ବର୍ତ୍ତମାନ ପ୍ରଧାନମନ୍ତ୍ରୀ ପୋଷଣ ମଧ୍ୟାହ୍ନ ଭୋଜନ ଯୋଜନାରେ ଉପକୃତ ହେଉଛନ୍ତି। ଶୁକ୍ରବାର ବିଧାନସଭାରେ ବିଜେଡି ବିଧାୟକ ଚକ୍ରମଣି କହଁରଙ୍କ ଏକ ପ୍ରଶ୍ନର ଲିଖିତ ଉତ୍ତରରେ ସ୍କୁଲ ଏବଂ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଏହି ସୂଚନା ଦେଇଛନ୍ତି। ମନ୍ତ୍ରୀ କହିଛନ୍ତି ଯେ, ବର୍ତ୍ତମାନ ପ୍ରତ୍ୟେକ ଛାତ୍ରଛାତ୍ରୀଙ୍କ ପାଇଁ ବିଦ୍ୟାଳୟଗୁଡ଼ିକୁ ଯୋଗାଇ ଦିଆଯାଉଥିବା ଖାଦ୍ୟର ମୂଲ୍ୟ ପ୍ରାଥମିକ ଶ୍ରେଣୀ ପ୍ରଥମରୁ ପଞ୍ଚମ ପାଇଁ ୭.୬୪ ଟଙ୍କା ଏବଂ ଉଚ୍ଚ ପ୍ରାଥମିକ ଷଷ୍ଠରୁ ଅଷ୍ଟମ ପାଇଁ ୧୦.୯୪ ଟଙ୍କା ରହିଛି। ଯଦି ମଧ୍ୟାହ୍ନ ଭୋଜନ ଯୋଜନାକୁ ନବମ ଏବଂ ଦଶମ ଶ୍ରେଣୀର ଛାତ୍ରଛାତ୍ରୀଙ୍କ ପାଇଁ ସମ୍ପ୍ରସାରିତ କରାଯାଏ, ତେବେ ଅତିରିକ୍ତ ୧୦, ୮୦,୦୦୦ ପିଲା ଉପକୃତ ହେବେ ବୋଲି ସେ କହିଛନ୍ତି। ଏହି ସମ୍ପ୍ରସାରଣ ଦ୍ୱାରା ରାଜ୍ୟ ସରକାରଙ୍କ ବାର୍ଷିକ ୬୪୬.୩୧ କୋଟି ଟଙ୍କା ଖର୍ଚ୍ଚ ହେବ ବୋଲି ମନ୍ତ୍ରୀ ଶ୍ରୀ ଗଣ୍ଠ ସ୍ପଷ୍ଟ କରିଛନ୍ତି।