ଭୁବନେଶ୍ୱର: ୟୁଜିସି ଚିଠା ନିୟାମକ ୨୦୨୫କୁ ନେଇ ଗର୍ଜିଲା ବିଜେଡି । ବିଜେଡିର ସମନ୍ୱୟ ଏବଂ କାର୍ଯ୍ୟକଳାପ କମିଟିର ଅଧ୍ୟକ୍ଷ ଶ୍ରୀ ଦେବୀ ପ୍ରସାଦ ମିଶ୍ର ଏବଂ ପୂର୍ବତନ ରାଜ୍ୟସଭା ସାଂସଦ ଡକ୍ଟର ଅମର ପଟ୍ଟନାୟକ ଆଜି ଗଣମାଧ୍ୟମକୁ ପ୍ରେସମିଟ ଜରିଆରେ ସମ୍ବୋଧିତ କରିଛନ୍ତି।ଦଳ କହିଛି- ୟୁଜିସିର କାମ ହେଲା ଗୁଣବତ୍ତା ରକ୍ଷା କରିବା। ୟୁଜିସି ନିୟାମକ କେନ୍ଦ୍ର ସରକାର କରନ୍ତି। ରାଜ୍ୟ ତାହାକୁ କାର୍ଯ୍ୟକାରୀ କରେ। କୁଳପତି ଓ ପ୍ରାଧ୍ଯାପକ ଚୟନ ନିୟମ ଅନୁସାରେ ନ ହେଲେ ଡିଗ୍ରୀ ମିଳିବ ନାହିଁ ବୋଲି ନିୟମ ରହିଛି । ମାତ୍ର ସେସବୁ ନିୟମକୁ ବଳି ଦିଆଯାଇଛି। କୁଳାଧିପତିଙ୍କୁ ଦାୟିତ୍ୱ ଦେବାର ଅର୍ଥ ରାଜନୀତି କାରଣ ବିଭିନ୍ନ କମିସନ ରାଜ୍ୟପାଳ ରାଜନୈତିକ କାମ କରୁଥିବା ନେଇ ଉଲ୍ଲେଖ କରିଛନ୍ତି । ରାଜ୍ଯ ଉଚ୍ଚଶିକ୍ଷାନୁଷ୍ଠାନ ଗୁଡିକରେ ହସ୍ତକ୍ଷେପ କରି ନିଜ ନିୟନ୍ତ୍ରଣକୁ ଆଣିବାର ଏହା ପ୍ରୟାସ ବୋଲି ବିଜେଡି କହିଛି ।ୟୁଜିସି ଚିଠା ନିୟାମକ-୨୦୨୫କୁ ୨୦୧୮ରେ ପ୍ରସ୍ତୁତ କରାଯାଇଥିଲା।
ସେଥିରେ ରାଜ୍ଯ ବିଶ୍ବବିଦ୍ୟାଳୟର ସ୍ବୟଂଶାସନ, ନିଯୁକ୍ତି ଆଦି ପ୍ରସଙ୍ଗ ସଂଘୀୟ ବ୍ଯବସ୍ଥା ଉପରେ ପର୍ଯ୍ୟବସିତ ଥିଲା। ମାତ୍ର ବର୍ତ୍ତମାନର ନିୟାମକକୁ ଅନେକ ଆଶଙ୍କା ରହିଥିବା ବିଜେଡି କହିଛି। କୁଳପତି ନିଯୁକ୍ତି ପ୍ରକ୍ରିୟାରେ ଯଦି କୌଣସି ରାଜ୍ୟ ସରକାରଙ୍କ ପ୍ରତିନିଧି ନରହିବେ, କେବଳ ବିଜ୍ଞାପନ ବାହାରିବ ଓ ସେମାନେ ଶିକ୍ଷା ବ୍ୟତୀତ ଅନ୍ୟ କ୍ଷେତ୍ରରୁ ଆସିବେ। ତାହେଲେ ସଂଘୀୟ ସ୍ବୟଂଶାସନ କେଉଁଠି ରହିବ ବୋଲି ପ୍ରଶ୍ନ କରିଛି ବିଜେଡି ।
ସଂଘୀୟ ବ୍ଯବସ୍ଥା ଅନୁସାରେ କୁଳପତି ନିଯୁକ୍ତି କ୍ଷେତ୍ରରେ ରାଜ୍ଯ ସରକାରଙ୍କ ପ୍ରତିନିଧି ରହିବା ଦରକାର। ସବୁ ଅଂଶୀଦାର ମାନଙ୍କ ସହ ଆଲୋଚନା ହେବା ଦରକାର। ନିଯୁକ୍ତି ପାଇଁ ଯେଉଁ ନୀତିନିୟମ ରହିଛି ସେଥିରେ ଯେକୌଣସି ବ୍ଯକ୍ତି କୁଳପତି ହୋଇପାରିବେ। ଏଥିରେ ବାହ୍ୟ ହସ୍ତକ୍ଷେପ ନ ରହିବା ଭଲ ବୋଲି ବିଜେଡି ମତ ଦେଇଛି । କହିଛି-ସର୍ଚ୍ଚ କମିଟି, ଚୟନ କମିଟିର ସଂଶୋଧନ ହେଉ। ବିଶ୍ଵବିଦ୍ୟାଳୟରେ ରାଜନୈତିକ ହସ୍ତକ୍ଷେପ ପାଇଁ ଏହି ନିୟାମକ ଅଣାଯାଇଛି ବୋଲି କହିଛି ବିଜେଡି। ଏହା ସହିତ ଦାବି କରିଛି ଏହି ଚିଠା ବଦଳାଯାଉ।
