ନୂଆଦିଲ୍ଲୀ: ଭାରତୀୟ ବାୟୁସେନାର ଅଭିଜ୍ଞ ପରୀକ୍ଷଣ ପାଇଲଟ୍ ଏବଂ ଗଗନଯାନ ମିଶନ ପାଇଁ ଇସ୍ରୋର ମନୋନୀତ ମହାକାଶଚାରୀ, ଗ୍ରୁପ୍ କ୍ୟାପଟେନ୍ ଶୁଭାଂଶୁ ଶୁକ୍ଳା ଆକ୍ସିଅମ୍ ମିଶନ-୪ର ମୁଖ୍ୟ ମିଶନ ପାଇଲଟ୍ ହେବେ । ଏହି ମିଶନ ସ୍ପେସଏକ୍ସର ଫାଲକନ୍-୯ ରକେଟ୍ ଏବଂ ଡ୍ରାଗନ୍ ସ୍ପେସ୍କ୍ରାଫ୍ଟ ମାଧ୍ୟମରେ ସମାପ୍ତ ହେବ । ଏଗୁଡ଼ିକୁ ଫ୍ଲୋରିଡାରୁ ଉତକ୍ଷେପଣ କରାଯିବ । ଶୁଭାଂଶୁ ଶୁକ୍ଳାଙ୍କୁ ସମ୍ପ୍ରତି ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ) ର ଗଗନଯାନ ମିଶନ ପାଇଁ ‘ପ୍ରଧାନ’ ମହାକାଶଚାରୀ ଭାବରେ ମନୋନୀତ କରାଯାଇଛି । ସେ ୧୯୮୪ ପରଠାରୁ ମହାକାଶକୁ ଯିବାରେ ଭାରତର ଦ୍ୱିତୀୟ ମହାକାଶଚାରୀ ହେବେ। ଜୁନ୍ ୨୦୦୬ ରେ ଲଢ଼ୁଆ ବିମାନରେ ଯୋଗ ଦେବା ସହିତ ତାଙ୍କର ଯାତ୍ରା ଆରମ୍ଭ ହୋଇଥିଲା । ଜଣେ ଅଭିଜ୍ଞ ପରୀକ୍ଷଣ ପାଇଲଟ୍ ଭାବରେ, ସେ ବିଭିନ୍ନ ବିମାନରେ ୨୦୦୦ ଘଣ୍ଟାରୁ ଅଧିକ ଉଡ଼ାଣ ଅଭିଜ୍ଞତା ହାସଲ କରିଛନ୍ତି । ଗ୍ରୁପ୍ କ୍ୟାପ୍ଟେନ୍ ଶୁକ୍ଳାଙ୍କ ସହିତ, ଆହୁରି ତିନି ଜଣ ଲୋକ ଆନ୍ତର୍ଜାତୀୟ ମହାକାଶ ଷ୍ଟେସନକୁ ଯାଉଛନ୍ତି । ଏମାନେ ହେଉଛନ୍ତି – ଆମେରିକାର କମାଣ୍ଡର ପେଗି ହ୍ୱିଟସନ୍, ଇଏସଏ ପକ୍ଷରୁ ପୋଲାଣ୍ଡର ମିଶନ ବିଶେଷଜ୍ଞ ସ୍ଲାଭୋଜ୍ ଉଜାନସ୍କି ଏବଂ ହଙ୍ଗେରୀର ମିଶନ ବିଶେଷଜ୍ଞ ଟିବୋର୍ କାପୁ । ଶୁକ୍ଳା ସେମାନଙ୍କ ସହିତ ପ୍ରମୁଖ ମିଶନ ପାଇଲଟ୍ ହେବେ । ୧୦ ଅକ୍ଟୋବର ୧୯୮୫ରେ ଲକ୍ଷ୍ନୌରେ ଜନ୍ମଗ୍ରହଣ କରିଥିବା ଶୁଭାଂଶୁ ଏନଡିଏରେ ତାଙ୍କର ସାମରିକ ତାଲିମ ଗ୍ରହଣ କରିଥିଲେ । ୧୭ ଜୁନ୍ ୨୦୦୬ରେ ସେ ବାୟୁସେନାର ଲଢ଼ୁଆ ଷ୍ଟ୍ରିମରେ ସାମିଲ ହୋଇଥିଲେ । ସେ ଜଣେ ଲଢ଼ୁଆ ଯୁଦ୍ଧ ନେତା ଏବଂ ଜଣେ ପରୀକ୍ଷଣ ପାଇଲଟ୍। ତାଙ୍କର ୨୦୦୦ ଘଣ୍ଟା ଉଡ଼ାଣ ଅଭିଜ୍ଞତା ଅଛି । ସେ ସୁଖୋଇ-୩୦ଏମକେଆଇ, ମିଗ୍-୨୧, ମିଗ୍-୨୯, ଜାଗୁଆର, ହକ୍, ଡୋର୍ନିଅର, ଏନ-୩୨ ଭଳି ବିମାନ ଏବଂ ଲଢ଼ୁଆ ବିମାନ ଉଡ଼ାଇଛନ୍ତି । ଏକ୍ସ-୪ ମିଶନର ନେତୃତ୍ୱ ନେବେ ପୂର୍ବତନ ନାସା ମହାକାଶଚାରୀ ପେଗି ହ୍ୱିଟସନ, ଯିଏକି ଆକ୍ସିଅମ୍ ସ୍ପେସ୍ରେ ମାନବ ମହାକାଶ ଉଡ଼ାଣର ନିର୍ଦ୍ଦେଶକ । ୨୦୧୯ ମସିହାରେ, ଶୁକ୍ଲାଙ୍କୁ ଇସ୍ରୋ ପକ୍ଷରୁ ଏକ ଐତିହାସିକ ଡାକ ମିଳିଥିଲା । ସେ ରୁଷର ମସ୍କୋରେ ଥିବା ୟୁରୀ ଗାଗାରିନ୍ କସମୋନଟ୍ ତାଲିମ କେନ୍ଦ୍ରରେ କଠୋର ତାଲିମ ଆରମ୍ଭ କରିଥିଲେ । ୨୭ ଫେବୃଆରୀ ୨୦୨୪ ରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ଲାଙ୍କୁ ଗଗନଯାନ ପାଇଁ ଜଣେ ମହାକାଶଚାରୀ ଭାବରେ ଘୋଷଣା କରିଥିଲେ । ଅଗଷ୍ଟ ୨୦୨୪ ରେ, ଶୁକ୍ଲାଙ୍କୁ ଅନ୍ତର୍ଜାତୀୟ ମହାକାଶ ଷ୍ଟେସନକୁ ଆଗାମୀ ଭାରତ-ଆମେରିକା ମିଶନ ପାଇଁ ‘ପ୍ରଧାନ’ ମହାକାଶଚାରୀ ଭାବରେ ମନୋନୀତ କରାଯାଇଥିଲା ।
