ଲୋକଙ୍କ ନିଦ ହଜାଇଛି ସୁନା ଦର

ଭୁବନେଶ୍ୱର: ସୁନା ବଜାରରେ ଲାଗିଛି ନିଆଁ । ବିବାହ ଋତୁରେ ଅହେତୁକ ଭାବେ ସୁନା ଦର ବୃଦ୍ଧି ସାଧାରଣ ଲୋକଙ୍କ ଚିନ୍ତାର ବିଷୟ ହୋଇପଡିଛି । ଭୁବନେଶ୍ୱରରେ ୨୪ କ୍ୟାରେଟ ସୁନା ଦାମ ୮୨ ହଜାର ଟପିଥିବା ବେଳେ ୨୨ କ୍ୟାରେଟ ସୁନାର ଦାମ ୧୦ ଗ୍ରାମ ପିଛା ଦର ୭୫ ହଜାର ଡେଇଁଛି । ଆନ୍ତର୍ଜାତୀୟ ସ୍ତରରେ ମଧ୍ୟ ସୁନା ଦରରେ ବୃଦ୍ଧି ଦେଖିବାକୁ ମିଳିିଛି । ଡୋନାଲ୍ଡ ଟ୍ରମ୍ପ ଆମେରିକା ରାଷ୍ଟ୍ରପତି ଭାବେ ଶପଥ ନେବା ପରେ ସୁନାରେ ନିବେଶ ପାଇଁ ଲୋକେ ଆଗ୍ରହ ପ୍ରକାଶ କରିଛନ୍ତି । ଟ୍ରମ୍ପଙ୍କ ବିଭିନ୍ନ ନିଷ୍ପତ୍ତି ଅର୍ଥନୀତିରେ ଅସ୍ଥିରତା ସୃଷ୍ଟି କରିବା ଆଶଙ୍କା କରି ଅଧିକାଂଶ ଲୋକ ଏବେ ସୁନାରେ ନିବେଶ କରୁଛନ୍ତି । ଅର୍ଥନୀତିରେ ଅସ୍ଥିରତା ବେଳେ ସୁନାରେ ନିବେଶ ବେଶ ସୁରକ୍ଷିତ। ସେହିଭଳି ଡଲାର ଦୁର୍ବଳ ହେବା ମଧ୍ୟ ସୁନା ଦର ବୃଦ୍ଧି ପଛର ଅନ୍ୟ ଏକ କାରଣ। ବିବାହ ଋତୁରେ ସୁନା ଦର ବୃଦ୍ଧି ଏବେ ସାଧାରଣ ଲୋକଙ୍କ ନିଦ ଉଡାଇଛି ।