ବିବାହ, ନିର୍ବାଚନରେ ବାଣ ଫୁଟାଇବା ଉପରେ ବି କଟକଣା ଲାଗିବ !

ନୂଆଦିଲ୍ଲୀ: ଦୀପାବଳି ରେ ବାଣ ଫୁଟାଇବା ଉପରେ କଟକଣା ଥିବା ସତ୍ତ୍ୱେ ଲୋକମାନେ ବାଣ ଫୁଟାଇଛନ୍ତି । ଏହା ଫଳରେ ଦିଲ୍ଲୀରେ ପ୍ରଦୂଷଣ ସ୍ତର ବଢିଯାଇଛି । ଏହାକୁ ନେଇ ସୁପ୍ରିମକୋର୍ଟ ଭୀଷଣ କ୍ଷୁବଧ ହେବା ସହ ଦିଲ୍ଲୀ ସରକାର ଓ ପୁଲିସକୁ ତୁରନ୍ତ ଜବାବ ମାଗିଛନ୍ତି। ପ୍ରତିବର୍ଷ ଏହି ନିଷେଧାଦେଶ ଘୋଷଣା କରାଯାଏ କିନ୍ତୁ ଏହାକୁ ଅଣଦେଖା କରାଯାଏ, ଯାହାଫଳରେ ପର୍ବ ପରେ ଅନେକ ଦିନ ପର୍ଯ୍ୟନ୍ତ ଜାତୀୟ ରାଜଧାନୀ ଏବଂ ଆଖପାଖ ଅଞ୍ଚଳରେ ବିଷାକ୍ତ ବାୟୁ ପ୍ରବାହିତ ହେଉଥିଲା । ଶୁଣାଣି ସମୟରେ ଦିଲ୍ଲୀରେ କଟକଣା ସତ୍ତ୍ୱେ ବାଣ ଜାଳିବା ନେଇ ଅଦାଲତ ଅସନ୍ତୋଷ ବ୍ୟକ୍ତ କରିଥିଲେ। ଆସନ୍ତା ବର୍ଷଠାରୁ କଡ଼ା ନିୟମ ପାଳନ ସୁନିଶ୍ଚିତ କରାଯାଉ ବୋଲି କୋର୍ଟ କହିଛନ୍ତି। ଆମିକସ୍ କ୍ୟୁରି କହିଛନ୍ତି ଯେ ଦୀପାବଳି ଦିନ ପଞ୍ଜାବରେ ଫସଲ ପୋଡ଼ିବା ଘଟଣା ଅଧିକ ଥିଲା। କୋର୍ଟ ପଞ୍ଜାବ ଓ ହରିୟାଣାକୁ ଜବାବ ମାଗିଛନ୍ତି। ଦୁଇ ସପ୍ତାହ ମଧ୍ୟରେ ଅତିରିକ୍ତ ପାଣ୍ଠି ଦାବି ଉପରେ ନିଷ୍ପତ୍ତି ନେବାକୁ କୋର୍ଟ ପଞ୍ଜାବକୁ କହିଛନ୍ତି। କୋର୍ଟ କହିଛନ୍ତି ଯେ, ଆସନ୍ତା ବର୍ଷ ଦୀପାବଳିରେ ବାଣ ଫୁଟାଇବା ଉପରେ ଅଦାଲତଙ୍କ ନିର୍ଦ୍ଦେଶ ଯେପରି ଉଲ୍ଲଂଘନ ନ ହୁଏ ସେଥିପାଇଁ ଆମକୁ କିଛି କରିବାକୁ ପଡ଼ିବ। ବିବାହ ଓ ନିର୍ବାଚନ ଭଳି ଅବସରରେ ବାଣ ପ୍ରଦର୍ଶନ ଉପରେ ପ୍ରତିବନ୍ଧକ ଲଗାଇବା ଉପରେ ବିଚାର କରାଯିବ ବୋଲି କୋର୍ଟ କହିଛନ୍ତି।