ରାଜକୋଟ : ମା’ ଓ ସନ୍ତାନର ସମ୍ପର୍କ ସବୁଠୁ ଉଚ୍ଚରେ । ଜଣେ ମା’ ନିଜ ସନ୍ତାନ ପାଇଁ ସବୁ କିଛି କରେ । ନିଜେ ଭୋକିଲା ରହି ଛୁଆର ପେଟ କଥା ବୁଝେ । କିନ୍ତୁ ବତ୍ତର୍ମାନ ସନ୍ତାନମାନଙ୍କ ମନରେ ଆଉ ବାପା ମା’ଙ୍କ ପ୍ରତି ଭଲ ପାଇବା ନାହିଁ । ନିଜ ମା’ ବାପାଙ୍କୁ ମାରିବାକୁ ପଛାଉ ନାହାନ୍ତି କିଛି ସନ୍ତାନ । ରାଗରେ ନରହନ୍ତା ପାଲଟି ଯାଇ ନିଜ ପରିବାରକୁ ହିଁ ନଷ୍ଟ କରିଦେଉଛନ୍ତି । ଜଣେ ଯୁବକ ବି ଏମିତି କିଛି କରି ବସିଛି । ଯୁବକ ଜଣକ ନିଜ ମା’କୁ ଅତି ନିର୍ମମ ଭାବେ ହତ୍ୟା କଲା ଆଉ ଜୀବନ ନେବା ପରେ ସୋସିଆଲ ମିଡିଆରେ ଫଟୋ ପୋଷ୍ଟ କରି ଲେଖିଲା ସରି ମମ୍ ଆଇ କିଲ୍ ୟୁ । ଏଭଳି ଫୋଷ୍ଟ ପରେ ଅଭିଯୁକ୍ତକୁ ଗିରଫ କରିଛି ପୋଲିସ ।
ଗୁଜୁରାଟର ରାଜକୋଟରୁ ଏମିତି ଏକ ଚାଞ୍ଚଲ୍ୟ ଖବର ସାମ୍ନାକୁ ଆସିଛି । ନିଜ ମା’କୁ ମାରିବା ପରେ ଇନଷ୍ଟାଗ୍ରାମରେ ଫଟୋ ସେୟାର କରି ଲେଖିଛି ସରି ମମ୍, ଆଇ କିଲ୍ ୟୁ, ଆଇ ମିସ୍ ୟୁ ମମ୍, ଓମ୍ ଶାନ୍ତି । ଏଭଳି ପୋଷ୍ଟ ଦେଖିବା ପରେ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଥିଲା । ଘଟଣା ବିଷୟରେ ଜାଣିବା ପରେ ଘଟଣାସ୍ଥଳରେ ପହଞ୍ଚିଥିଲା ପୋଲିସ । ମୃତଦେହକୁ ଜବତ କରିବା ସହ ଘଟଣାର ତଦନ୍ତ ଆରମ୍ଭ କରିଥିଲା । ପୋଲିସ କହିବା ଅନୁସାରେ ୪୮ ବର୍ଷିୟ ଜ୍ୟୋତିବେନ୍ ଗୋସାଇଁ ମାନସିକ ରୋଗୀ ଥିଲେ । ଏହାକୁ ନେଇ ଘରେ ବାରମ୍ବାର ଝଗଡ଼ା ହେଉଥିଲା । ଆଉ ଏହି ଝଗଡ଼ାରେ ବିରକ୍ତ ହୋଇ ଅଭିଯୁକ୍ତ ପୁଅ ହିଁ ନିଜ ମା’ର ଜୀବନ ନେଲା । ଅଭିଯୁକ୍ତକୁ ଗିରଫ କରାଯାଇ ଅଧିକ ପଚରା ଉଚୁରା ଜାରି ରହିଛିି । ଅଭିଯୁକ୍ତ ନୀଲେସ ନିଜ ମା’ର ଜୀବନ ନେବା ପରେ ଇନଷ୍ଟାଗ୍ରାମରେ ଫଟୋ ପୋଷ୍ଟ କରି କ୍ଷମା ମାଗିଥିଲା । ପରେ ନିଜ ସାଙ୍ଗ ଭାରତ ଏବଂ ପୋଲିସକୁ ଫୋନ କରି ଘଟଣା ବିଷୟରେ ଜଣାଇଥିଲା ।
