ସାପ କାମୁଡ଼ାରେ ଚାଲିଗଲା ଦୀପା

ନୂଆଦିଲ୍ଲୀ: ରାଜସ୍ଥାନର ଟୋଙ୍କ ଜିଲ୍ଲାରେ ଇନଷ୍ଟାଗ୍ରାମରେ ରିଲ୍ସ କରୁଥିବା ଜଣେ ଯୁବତୀଙ୍କୁ ନାଗସାପ କାମୁଡି ଦେବାରୁ ତାଙ୍କର ମୃତ୍ୟୁ ଘଟିଛି। ସୂଚନା ଅନୁଯାୟୀ, ଘାଡ଼ କସୱେରେ ଦୀପା ସାହୁ ରୁହନ୍ତି । ତାଙ୍କର ଚାରିଜଣ ଭାଇଭଉଣୀଙ୍କ ମଧ୍ୟରେ ଦ୍ବିତୀୟ ନମ୍ବରରେ ଥିବା ଦୀପା ସାହୁ ସୋସିଆଲ ମିଡିଆରେ ଖୁବ ସକ୍ରିୟ ରହିଥିଲେ । ସେ ପ୍ରାୟତଃ ରିଲ୍ସ କରି ଇନଷ୍ଟାଗ୍ରାମରେ ପୋଷ୍ଟ କରିଥାଆନ୍ତି। ନିକଟରେ ସେ ଘର ପାଖରେ ଥିବା ବଗିଚାକୁ ଗାଈ ପାଇଁ ଚାରା କାଟିବାକୁ ଯାଇଥିଲେ। ଏହି ସମୟରେ ଉକ୍ତ ଘାସବୁଦା ମୂଳେ ଶୋଇ ରହିଥିବା ନାଗସାପ ଦୀପାଙ୍କୁ କାମୁଡି ଦେଇଥିଲା । ଦୀପା ଯନ୍ତ୍ରଣାରେ ଚିତ୍କାର କରିବା ପରେ ପାଖରେ ଥିବା ଲୋକେ ଘଟଣାସ୍ଥଳକୁ ଦୌଡ଼ି ଯାଇଥିଲେ। ଦୀପାଙ୍କୁ ସାପ କାମୁଡିଥିବା ଜାଣିବା ପରେ ସେମାନେ ତୁରନ୍ତ ଝିଅକୁ ଘଟଣାସ୍ଥଳରୁ ଉଦ୍ଧାର କରି ଚିକିତ୍ସା ପାଇଁ ମେଡିକାଲକୁ ନେଇଯାଇଥିଲେ । ହେଲେ ଡାକ୍ତର ଦୀପାଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ପରେ ଦୀପାଙ୍କ ଇନଷ୍ଟାଗ୍ରାମରେ ଥିବା ଫ୍ୟାନ୍ସମାନେ ଦୁଃଖୀ ହୋଇଯାଇଛନ୍ତି। ସେମାନେ ଦୀପାଙ୍କ ଆତ୍ମାର ଶାନ୍ତି ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରିଛନ୍ତି।