ଢାକା : ନ୍ୟୁଜିଲାଣ୍ଡ ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ୍ ସିରିଜ୍ ପାଇଁ ନଜମୁଲ୍ ହୋସେନ୍ ସାଣ୍ଟୋଙ୍କ ବାଂଲାଦେଶ ଟିମ୍ର କ୍ୟାପ୍ଟେନ୍ ନିଯୁକ୍ତ କରାଯାଇଛି । ଶନିବାର ବାଂଲାଦେଶ କ୍ରିକେଟ୍ ବୋର୍ଡ କ୍ରିକେଟ୍ ଅପରେସନ୍ ଅଧ୍ୟକ୍ଷ ଜଲାଲ୍ ୟୁନୁସ୍ ଏହି ସୂଚନା ଦେଇଛନ୍ତି । ସାଣ୍ଟୋ ବାଂଲାଦେଶର ୧୩ଶ ଟେଷ୍ଟ୍ କ୍ୟାପ୍ଟେନ୍ ହେବେ । ସିରିଜ୍ର ପ୍ରଥମ ମ୍ୟାଚ୍ ସିଲ୍ହଟ୍ରେ ନଭେମ୍ବର ୨୮ରେ ଖେଳାଯିବ । ଶ୍ରୀଲଙ୍କା ବିପକ୍ଷ ବିଶ୍ୱକପ୍ ମ୍ୟାଚ୍ରେ ଅଙ୍ଗୁଳି ଫ୍ରାକ୍ଚର୍ ହେବା ପରେ ବାଂଲାଦେଶର ନିୟମିତ କ୍ୟାପ୍ଟେନ୍ ସାକିବ୍ ଅଲ୍ ହୁସେନ୍ ଏହି ସିରିଜ୍ରୁ ବାଦ୍ ପଡ଼ିଛନ୍ତି ।
ଅନ୍ୟପକ୍ଷରେ ଭାଇସ୍ କ୍ୟାପ୍ଟେନ୍ ଲିଟନ୍ ଦାସ ପରିବାର ସହିତ ସମୟ ଦେବା ନିମନ୍ତେ ପ୍ରଥମ ମ୍ୟାଚ୍ରୁ ଓହରି ଯାଇଛନ୍ତି । ତେବେ ସେ ଦ୍ୱିତୀୟ ଟେଷ୍ଟ୍ ପାଇଁ ଉପଲବ୍ଧ ରହିବେ ବୋଲି ଜଲାଲ୍ ୟୁନୁସ୍ କହିଛନ୍ତି । ଇତିମଧ୍ୟରେ ବିସିବି ହାଇପର୍ଫର୍ମାନ୍ସ ୟୁନିଟ୍ର ବୋଲିଂ କୋଚ୍ ଥିବା ୱେଷ୍ଟଇଣ୍ଡିଜ୍ର କୋରେ କଲିମୋର ନିକଟରେ ଇସ୍ତଫା ଦେଇଥିବା ଅଲାନ୍ ଡୋନାଲ୍ଡଙ୍କ ସ୍ଥାନରେ ଟେଷ୍ଟ୍ ସିରିଜ୍ ପାଇଁ ଟିମ୍ର ବୋଲିଂ କୋଚ୍ ହେବେ । ସେହିପରି ହାଇପରଫର୍ମାନ୍ସ ୟୁନିଟ୍ ମୁଖ୍ୟ କୋଚ୍ ଡେଭିଡ୍ ହେମ୍ପ୍ ମଧ୍ୟ ଟିମ୍ ମ୍ୟାନେଜମେଣ୍ଟ୍ରେ ଯୋଗଦେବାର ସମ୍ଭାବନା ରହିଛି ।
