ଅନୁଗୋଳ: ଅନୁଗୋଳ ଜିଲ୍ଲାରେ ଅସୁରକ୍ଷିତ ବାଳିକା ହଷ୍ଟେଲ । ଘରୋଇ ଛାତ୍ରୀ ଆବାସ ହୋଇପଡ଼ିଛି ଅସୁରକ୍ଷିତ । ହଷ୍ଟେଲ ଛାତ୍ରୀଙ୍କ ରୁମମେଟ୍ ତାଙ୍କ ଗଳା କାଟିଥିବା ନେଇ ଅଭିଯୋଗ ହୋଇଛି । ଗୋଟିଏ ରୁମରେ ୩ ଜଣ ଛାତ୍ରୀ ରହୁଥିବାବେଳେ ଜଣେ ଛାତ୍ରୀଙ୍କର ବେକ କେହି କାଟି ଦେଇଥିବା ଅଭିଯୋଗ ଆସିଛି । ଘଟଣା ପରେ ଚାଲିଛି ପୋଲିସ ଛାନଭିନ ଆରମ୍ଭ କରିଛି । ଅନୁଗୋଳ ଆଦର୍ଶ ଥାନାର ଶିକ୍ଷକ ପଡାଠାରେ ଥିବା ଏକ ହଷ୍ଟେଲ ଭିତରେ ଛାତ୍ରୀଙ୍କ ଗଳା କଟାଯାଇଥିବା ନେଇ ଥାନାରେ ଅଭିଯୋଗ ହୋଇଛି । ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଛି । ଏନେଇ ଛାତ୍ରୀଙ୍କ ବାପା ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ତେବେ କିଏ ଏବଂ କାହିଁକି ଏଭଳି କରିଛି ସେନେଇ କିଛି ସ୍ପଷ୍ଟ ହୋଇନାହିଁ । ତେବେ ସ୍ୱାସ୍ଥ୍ୟାବସ୍ଥା ଭଲ ନଥିବାରୁ ଛାତ୍ରୀ ଜଣକ ମଧ୍ୟ ଏ ବାବଦରେ କିଛି କହି ପାରୁନାହାନ୍ତି । ଘଟଣାଟି ଶୁକ୍ରବାର ବିଳମ୍ବିତ ରାତିରେ ଘଟିଥିବା ଜଣାପଡିଛି ।
ସୂଚନା ମୁତାବକ, ହଷ୍ଟେଲର ଗୋଟିଏ କୋଠରୀରେ ଛାତ୍ରୀଙ୍କ ସମେତ ମୋଟ୍ ୩ ଜଣ ଛାତ୍ରୀ ରହୁଥିଲେ । ରାତି ପ୍ରାୟ ୧୨ଟା ବେଳେ ହଠାତ୍ ଛାତ୍ରୀ ଚିତ୍କାର କରୁଥିବାର ଶୁଣି ଅନ୍ୟମାନେ ଉଠି ପଡି ହଷ୍ଟେଲ ଦାୟିତ୍ୱରେ ଥିବା କର୍ମଚାରୀଙ୍କୁ ଏ ସମ୍ପର୍କରେ ଜଣାଇଥିଲେ । ଖବର ପାଇ ହଷ୍ଟେଲ ଦାୟିତ୍ୱରେ ଥିବା କର୍ମଚାରୀ ଘଟଣାସ୍ଥଳରେ ପହଞ୍ଚି ଛାତ୍ରୀଙ୍କୁ ଗୁରୁତର ଅବସ୍ଥାରେ ଦେଖିବାକୁ ପାଇଥିଲେ । ଫଳରେ ତୁରନ୍ତ ତାଙ୍କୁ ଡାକ୍ତରଖାନାକୁ ଚିକିତ୍ସା ପାଇଁ ନିଆଯାଇଥିଲା । ଆଜି ସକାଳେ ଛାତ୍ରୀଙ୍କ ପରିବାରକୁ ଖବର ଦିଆଯାଇଥିଲା । ଖବର ପାଇ ଛାତ୍ରୀଙ୍କ ବାପା ଆସି ଥାନାରେ ଅଭିଯୋଗ କରିଥିଲେ । ବର୍ତ୍ତମାନସୁଦ୍ଧା ଛାତ୍ରୀଙ୍କ ସ୍ୱାସ୍ଥ୍ୟବସ୍ଥାରେ ସୁଧାର ଆସିଥିବା ଜଣାପଡ଼ିଛି । ହେଲେ ଘଟଣା ପଛର ରହସ୍ୟ ସାମନାକୁ ଆସି ପାରିନାହିଁ । ତେବେ ଘଟଣା ପରେ ଘରୋଇ କଲେଜର ହଷ୍ଟେଲ ଗୁଡ଼ିକ କେତେ ସୁରକ୍ଷିତ ତାକୁ ନେଇ ପ୍ରଶ୍ନ ଉଠିଛି । ସେପଟେ ଘଟଣାର ତଦନ୍ତ କରି ଦୃଢ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ଆହତ ଛାତ୍ରୀଙ୍କ ପରିବାର । କିଭଳି ଓ କେଉଁ ପରିସ୍ଥିତିରେ ଛାତ୍ରୀଙ୍କୁ ଆକ୍ରମଣ କରାଯାଇଛି ସେନେଇ ଅଧିକ ତଦନ୍ତ ଚଳାଇଛି ପୋଲିସ ।
