ନୂଆଦିଲ୍ଲୀ: ଥମିବାର ନାଁ ନେଉନି ଭାରତ-କାନାଡା କୂଟନୈତିକ ବିବାଦ। ହରଦୀପ ସିଂ ନିଜାର ହତ୍ୟା ଘଟଣାରେ ଭାରତ ସରକାରଙ୍କ ଏଜେଣ୍ଟ ସାମିଲ ବୋଲି ପୁଣି ଦୋହରାଇଛନ୍ତି କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୁ। ସେପଟେ ଏହି ବିବାଦକୁ ନେଇ ଆଲୋଚନା କରିଛନ୍ତି ଜାତୀୟ ନିରାପତ୍ତା ପରାମର୍ଶଦାତା ଅଜିତ ଡୋଭାଲ ଓ କାନାଡା ପ୍ରତିପକ୍ଷ।
ନିଜାରର ହତ୍ୟା ସମ୍ପର୍କରେ ଭାରତର ସମ୍ପୃକ୍ତି ନେଇ ଟ୍ରୁଡୁଙ୍କ ଅଭିଯୋଗକୁ ଭାରତ ବାରମ୍ବାର ଖଣ୍ଡନ କରୁଥିଲେ ବି ନିଜ ବୟାନରେ ଅଟଳ ରହିଛନ୍ତି ଟ୍ରୁଡୁ । ନିଜାରର ହତ୍ୟା ଘଟଣାରେ କାନାଡା କୌଣସି ସ୍ପଷ୍ଟ ସୂଚନା ଦେଉନାହିଁ ବୋଲି ଭାରତ କହିଛି। କାନାଡା କୂଟନୀତିଜ୍ଞଙ୍କ ସଂଖ୍ୟା ହ୍ରାସ କରିବାକୁ ଭାରତ ଗତକାଲି କହିବା ପରେ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲା କାନାଡା।
ଗତ ୨୧ ତାରିଖରେ କାନାଡା ନାଗରିକଙ୍କ ଲାଗି ଭିସା ପ୍ରଦାନ ବାତିଲ କରିଥିଲା ଭାରତ। ଭିସା ଦରଖାସ୍ତ ଯାଞ୍ଚ କରୁଥିବା ଏକ ଘରୋଇ ସଂସ୍ଥା ବିଏଲଏସ ଇଣ୍ଟରନ୍ୟାସନାଲ ପକ୍ଷରୁ ଏହି ନିଷ୍ପତ୍ତି କରାଯାଇଥିଲା। ସେପଟେ ନ୍ଯାସନାଲ ଇନଭେଷ୍ଟିଗେସନ ଏଜେନ୍ସି ବା ଏନଆଇଏ ପକ୍ଷରୁ ଜାରି କରାଯାଇଥିଲା ଆତଙ୍କବାଦୀଙ୍କ ତାଲିକା। ଜାରି କରାଯାଇଥିବା ୪୩ ଜଣିଆ ତାଲିକାରେ ରହିଛନ୍ତି କାନାଡାରେ ବାସ କରୁଥିବା କେତେକ ଆତଙ୍କବାଦୀ। ସେମାନେ ଭାରତ ବିରୋଧୀ କାର୍ଯ୍ଯକଳାପରେ ସାମିଲ ଥିବା ସହ ବିଭିନ୍ନ ଆତଙ୍କବାଦୀ ସଂଗଠନ ସହ ଜଡିତ ଅଛନ୍ତି।
ଏହି ଆତଙ୍କବାଦୀମାନେ ଖଲିସ୍ତାନ ସମର୍ଥନ ହୋଇଥିବାବେଳେ ସେମାନେ ଭାରତରୁ ପଳାୟନ କରି କାନାଡାରେ ରହୁଛନ୍ତି। ଗତ ୨୧ ତାରିଖରେ ଖଲିସ୍ତାନୀ ଆତଙ୍କବାଦୀ ଅର୍ଶଦୀପ ସିଂ ଓରଫ ଅର୍ଷ ଦାଲାଙ୍କ ସହଯୋଗୀ ସୁଖଦୋଲ ସିଂକୁ କାନାଡାର ଓ୍ବିନପିଗ ସିଟିରେ ହତ୍ୟା କରାଯାଇଥିଲା। ଭାରତର ଓ୍ବାଣ୍ଟେଡ ଲିଷ୍ଟରେ ଥିବା ସୁଖଦୋଲ ଏକ କ୍ୟାଙ୍ଗଓ୍ବାରରେ ପ୍ରାଣ ହରାଇଛି। ଏ-କାଟେଗୋରୀର ଗ୍ୟାଙ୍ଗଷ୍ଟର କୁହାଯାଉଥିବା ସୁଖଦୋଲ ପଞ୍ଜାବରୁ ଫେରାର ହୋଇ କାନାଡା ଚାଲିଯାଇଥିଲା।
