ଅପରାଧୀଙ୍କୁ ଧରିବାକୁ ନୂଆ କୌଶଳ: ଥାନା ଓଏପିଏଫ୍‌ଙ୍କୁ ସାଇଣ୍ଟିଫିକ୍ ଅଫିସର ଦାୟିତ୍ବ

କଟକ : ଚୋର, ଲୁଟେରାଙ୍କୁ ସହଜରେ ଧରିବା ଏବଂ ଅଦାଲତରେ ଦୋଷୀ ସାବ୍ୟସ୍ତ କରିବା ପାଇଁ ପୁଲିସ ନୂଆ କୌଶଳ ଗ୍ରହଣ କରିବାକୁ ଯାଉଛି। ଏକ୍ଷେତ୍ରରେ ଫରେନସିକ୍ ବିଭାଗର ଗୁରୁତ୍ବପୂର୍ଣ୍ଣ ଭୂମିକା ରହୁଛି। ତେବେ ଅନେକ ସମୟରେ ଦୁର୍ବଳତା ଯୋଗୁଁ ଅପରାଧୀ ଧରା ପଡୁ ନଥିବା ବେଳେ ଅଦାଲତରେ ଦୋଷୀ ସାବ୍ୟସ୍ତ ହୋଇ ପାରୁ ନାହାନ୍ତି। ପ୍ରତ୍ୟେକ ମାମଲାରେ ଜିଲ୍ଲା ଫରେନସିକ୍ ସାଇନ୍ସ ଲାବୋରେଟୋରିର ଅଫିସର ପହଞ୍ଚି ଅପରାଧୀଙ୍କ ଆଙ୍ଗୁଠି ଛାପ, ପାଦ ଛାପ ସମେତ ଅନ୍ୟାନ୍ୟ ନମୁନା ସଂଗ୍ରହ କରିବା ସମ୍ଭବପର ହୁଏନାହିଁ। କେବଳ ବଡ଼ ଧରଣର ଡକାୟତି ମାମଲା କିମ୍ବା ହତ୍ୟାକାଣ୍ଡରେ ସାଇଣ୍ଟିଫିକ୍ ଅଫିସର(ଏସଓ) ଘଟଣା ସ୍ଥଳକୁ ଆସି ନମୁନା ସଂଗ୍ରହ ଓ ପ୍ୟାକିଂ କରି ଲାବୋରେଟୋରିକୁ ପଠାଇଥାନ୍ତି। ଏଣିକି ପ୍ରତ୍ୟେକ ସମ୍ପତ୍ତି ଜନିତ ଅପରାଧିକ ମାମଲାରେ କଟକ କମିସନରେଟ୍ ପୁଲିସରେ ତଦନ୍ତକାରୀ ଅଧିକାରୀଙ୍କୁ ସହଯୋଗ କରିବା ପାଇଁ ଜଣେ ଲେଖାଏ ଓଏପିଏଫ୍(ଓଡ଼ିଶା ଅକଜୁଲାରି ପୁଲିସ ଫୋର୍ସ)ଙ୍କୁ ପ୍ରତ୍ୟେକ ଥାନାରେ ସ୍ବତନ୍ତ୍ର ଭାବେ ଫରେନସିକ ଅଫିସର ଦାୟିତ୍ବ ଦିଆଯାଇଛି। ଫରେନସିକ୍ ଅଫିସରଙ୍କ ଭଳି ଏମାନେ ବି ନମୁନା ସଂଗ୍ରହ, ଜବତ ଓ ଯାଞ୍ଚ ପାଇଁ ଲାବୋରେଟୋରିକୁ ପଠାଇବା କ୍ଷେତ୍ରରେ ସହଯୋଗ କରିବେ।