ଦୁବାଇ: ଚଳିତ ଇଂଲଣ୍ଡ ବିପକ୍ଷ ଆଶେସ୍ ସିରିଜ୍ରେ ଉଲ୍ଲେଖନୀୟ ପ୍ରଦର୍ଶନ ଆଧାରରେ ଅଷ୍ଟ୍ରେଲିଆର ମଧ୍ୟକ୍ରମ ବ୍ୟାଟ୍ସମ୍ୟାନ୍ ଟ୍ରେଭିସ୍ ହେଡ୍ ଆଇସିସି ଟେଷ୍ଟ୍ ର୍ୟାଙ୍କିଙ୍ଗ୍ରେ କ୍ୟାରିଅର୍ରେ ପ୍ରଥମ ଥଣ ପାଇଁ ଦ୍ୱିତୀୟ ସ୍ଥାନରେ ପହଞ୍ଚିଯାଇଛନ୍ତି । ଏଥିସହ ସେ ଶୀର୍ଷ ସ୍ଥାନରେ ରହିଆସିଥିବା ନ୍ୟୁଜିଲାଣ୍ଡ୍ର କେନ୍ ୱିଲିଅମ୍ସନ୍ଙ୍କୁ ଟପିବା ସ୍ଥିତିରେ ପହଞ୍ଚିଯାଇଛନ୍ତି । ପୂର୍ବ ସପ୍ତାହ ତୁଳନାରେ ହେଡ୍ ଚଳିତ ସପ୍ତାହରେ ଦୁଇଟି ସ୍ଥାନରେ ଉନ୍ନତି ଘଟାଇବା ସହ ତାଙ୍କର ର୍ୟାଙ୍କିଙ୍ଗ୍ ପଏଣ୍ଟ୍କୁ ୮୭୪ରେ ପହଞ୍ଚାଇଛନ୍ତି ।
ଏବେ ସେ ୱିଲିଅମ୍ସନ୍ଙ୍କଠାରୁ ମାତ୍ର ୯ ପଏଣ୍ଟ୍ ପଛରେ ଅଛନ୍ତି । ଚଳିତ ଆଶେସ୍ ସିରିଜ୍ରେ ଆହୁରି ଦୁଇଟି ମ୍ୟାଚ୍ ବାକି ଥିବାରୁ ହେଡ୍ ଆସନ୍ତା ସପ୍ତାହରେ ୱିଲିଅମ୍ସନ୍ଙ୍କୁ ଟପିବାର ସମ୍ଭାବନା ରହିଛି । ସେହିପରି ପାକିସ୍ତାନ ଅଧିନାୟକ ବାବର୍ ଆଜମ୍ ୮୬୨ ପଏଣ୍ଟ୍ ସହ ଷଷ୍ଠରୁ ତୃତୀୟ ସ୍ଥାନକୁ ଉନ୍ନୀତ ହୋଇଥିବା ବେଳେ ଅଷ୍ଟ୍ରେଲିଆର ଷ୍ଟିଭେନ୍ ସ୍ମିଥ୍ ଦ୍ୱିତୀୟରୁ ଚତୁର୍ଥ ସ୍ଥାନକୁ ଖସିଯାଇଛନ୍ତି । ଚଳିତ ଆଶେସ୍ ସିରିଜ୍ରେ ହେଡ୍ ୪୪ ହାରରେ ୨୬୬ ରନ୍ କରିସାରିଛନ୍ତି । ଏହା ପୂର୍ବରୁ ସେ ଭାରତ ବିପକ୍ଷ ୱାର୍ଲ୍ଡ ଟେଷ୍ଟ୍ ଚାମ୍ପିଅନ୍ଶିପ୍ ଫାଇନାଲ୍ରେ ୧୬୩ ରନ୍ର ମ୍ୟାଚ୍ ବିଜୟୀ ଇନିଂସ ଖେଳିଥିଲେ । ତେବେ ବ୍ୟାଟ୍ସମ୍ୟାନ୍ ତାଲିକାରେ ଶୀର୍ଷ ୧୦ରେ ଏକମାତ୍ର ଭାରତୀୟ ଭାବେ ଋଷଭ ପନ୍ତ୍ ରହିଥିବା ବେଳେ ବିରାଟ କୋହଲି ତ୍ରୟୋଦଶ ଓ ରୋହିତ ଶର୍ମା ଚତୁର୍ଦ୍ଦଶ ସ୍ଥାନରେ ରହିଛନ୍ତି ।
