ମାଲକାନଗିରି: ମାଲକାନଗିରି ଜିଲ୍ଲା ଅନ୍ତର୍ଗତ ମାଥିଲି ବ୍ଲକର ସାଲିମି ଫାଣ୍ଡିର ହଳଦୀକୁଣ୍ଡ ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ପୁଅର ଟାଙ୍ଗିଆ ଚୋଟରେ ବାପାର ମୃତ୍ୟୁ ହୋଇଛି । ସାଲିମି ପୁଲିସ ପୁଅକୁ ଗିରଫ କରି କୋର୍ଟ ଚାଲାଣ କରିଛି । ଘଟଣା ଅନୁଯାୟୀ ହଳଦୀକୁଣ୍ଡ ଗ୍ରାମର ଗଜା ମାଡକାମୀ ଏବଂ ତାଙ୍କ ପୁଅ ଲକ୍ଷ୍ମା ମାଡକାମୀ ଗୋଟିଏ ଘରେ ରୁହନ୍ତି । ପ୍ରାୟତଃ ଦୁହିଁଙ୍କ ମଧ୍ୟରେ ଗଣ୍ଡଗୋଳ ଲାଗି ରହିଥାଏ । ସବୁ ଦିନ ଲକ୍ଷ୍ମା ଘରକୁ ମଦ ପିଇ ଆସି ସମସ୍ତଙ୍କୁ ଗାଳିଗୁଲଜ କରେ । ତେବେ ବାପା ଗଜା ପୁଅ ଲକ୍ଷ୍ମାକୁ ମଦ ପିଇ ଆସିବାରୁ ଗାଳି ଗୁଲଜ କରିଥିଲେ ।
ଦୀର୍ଘ ସମୟ ଧରି ଦୁହିଁଙ୍କ ମଧ୍ୟରେ ବଚସା ହେବା ପରେ ଦୁହେଁ ନିଜ ନିଜ ରାସ୍ତାରେ ଚାଲିଯାଇଥିଲେ । ବାପା ଗଜା ଧାନ ଖଳାକୁ ଯାଇ ସେଠାରେ ଠିଆ ହୋଇଥିବାବେଳେ ପୁଅ ବାପାକୁ ଖୋଜି ଧାନ ଖଳାରେ ପହଞ୍ଚି ଟାଙ୍ଗିଆରେ ବାପା ଗଜାକୁ ଚୋଟ ମାରିଥିଲା । ଘଟଣାସ୍ଥଳରେ ହିଁ ବାପାର ମୃତ୍ୟୁ ହୋଇଯାଇଥିଲା । ମାଥିଲି ଆଇଆଇସି ସୂର୍ଯ୍ୟ ପ୍ରକାଶ ନାୟକଙ୍କ ନିର୍ଦ୍ଦେଶ କ୍ରମେ ସାଲିମି ଫାଣ୍ଡି ଅଧିକାରୀ କୃତିବାସ ବେହେରା ଘଟଣାସ୍ଥଳରେ ପହଞ୍ଚି ଲକ୍ଷ୍ମାକୁ ଗିରଫ କରିବା ସହ ହତ୍ୟାରେ ବ୍ୟବହୃତ ହୋଇଥିବା ଟାଙ୍ଗିଆକୁ ଜବତ କରିଥିଲେ । ପରେ ଶବକୁ ଜବତ କରି ପୁଲିସ ବ୍ୟବଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଥିଲା । ହତ୍ୟାକାରୀ ପୁଅ ଲକ୍ଷ୍ମାକୁ କୋର୍ଟ ଚାଲାଣ କରାଯାଇଥିବା ପୁଲିସ କହିଛି ।
