ଅନୁଗୁଳ: ଅନୁଗୁଳ ସହରସ୍ଥ ଅମଲାପଡ଼ାର ପ୍ରଦୀପ ପ୍ରଧାନଙ୍କୁ ସ୍ତ୍ରୀଙ୍କୁ ହତ୍ୟା ଅଭିଯୋଗରେ ପୁଲିସ ବୁଧବାର ଗିରଫ କରି କୋର୍ଟଚାଲାଣ କରିଛି । ସୂଚନା ଯେ, ଗତ କିଛିଦିନ ହେଲା ପ୍ରଦୀପ ପ୍ରଧାନ(୫୫) ଓ ତାଙ୍କ ସ୍ତ୍ରୀ ଗୁରୁବାରୀ ପ୍ରଧାନ(୩୫)ଙ୍କ ମଧ୍ୟରେ ପାଟିଗୋଳ ଲାଗିଥିଲା । ଯାହାଫଳରେ ଘରେ ରୋଷେଇ ହେଉନଥିଲା । ତେବେ ୨୮ ତାରିଖ ରାତିରେ ପ୍ରଦୀପଙ୍କ ପୁଅ ବିଶ୍ୱଜିତ ପ୍ରଧାନ ଘରକୁ ଫେରି ଦେଖିଲା ବେଳକୁ ତାଙ୍କ ମା’ ଗୁରୁବାରୀ ତଳେ ଶୋଇଛନ୍ତି ଓ ବାପା ପ୍ରଦୀପ ଖଟ ଉପରେ ଶୋଇଛନ୍ତି ।
ବିଶ୍ୱଜିତ ମା’ଙ୍କୁ ଡାକିଥିଲେ । କୌଣସି ଉତ୍ତର ନମିଳିବାରୁ ଦେହ ଖରାପ ଅଛି ଭାବି ସଙ୍ଗେ ସଙ୍ଗେ ୧୦୮ ଆମ୍ବୁଲାନ୍ସ ଯୋଗେ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲେ । କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ପୁଲିସ ଶବ ଜବତ କରି ଏକ ଅପମୃତ୍ୟୁ ମାମଲା ରୁଜୁକରି ବ୍ୟବଚ୍ଛେଦ କରାଇଥିଲା । ତେବେ ତଣ୍ଟି ଚିପି ହତ୍ୟା କରାଯାଇଥିବା ରିପୋର୍ଟରୁ ଜଣାପଡ଼ିବା ପରେ ପୁଲିସ ବୁଧବାର ପ୍ରଦୀପଙ୍କୁ ଗିରଫ କରିଛି ।
