ମୁମ୍ବାଇ : ୨୦୧୨ ମସିହାରେ ‘ଗ୍ୟାଙ୍ଗ୍ସ ଅଫ୍ ୱାସେପୁର’ ଫିଲ୍ମ ମାଧ୍ୟମରେ ବଲିଉଡ୍ରେ ଡେବ୍ୟୁ କରିଥିଲେ ଅଭିନେତ୍ରୀ ହୁମା କ୍ୟୁରେଶୀ । ସେଥିରେ ସେ ପାର୍ଶ୍ୱ ଅଭିନେତ୍ରୀ ଭୂମିକାରେ ନଜର ଆସିଥିବାବେଳେ ତାଙ୍କର ଅଭିନୟକୁ କିନ୍ତୁ ଜୋରଦାର ପ୍ରଶଂସା ମିଳିଥିଲା । ଏପରିକି ସେବର୍ଷ ସେ ଶ୍ରେଷ୍ଠ ନବାଗତା ଭାବେ ଫିଲ୍ମଫେୟାର ପୁରସ୍କାର ପାଇଁ ନୋମିନେସନ୍ ହାସଲ କରିଥିଲେ । ତା’ ପରେ ହୁମା ‘ଲଭ୍ ଶଭ ତେ ଚିକେନ୍ ଖୁରନା’, ‘ଏକ୍ ଥି ଡାୟନ୍’, ‘ଡି-ଡେ’, ‘ଦେଢ଼ ଇସ୍କିୟାଁ’, ‘ଜଲି ଏଲ୍ଏଲ୍ବି ୨’, ‘ବେଲ ବଟମ୍’ ଭଳି ଫିଲ୍ମରେ ନଜର ଆସିଥିଲେ ।
ତେବେ ୨୦୨୧ରେ ରିଲିଜ୍ ହୋଇଥିବା ୱେବ୍ସିରିଜ୍ ‘ମହାରାଣୀ’ ତାଙ୍କ ଜୀବନର ଗତିପଥକୁ ବଦଳାଇ ଦେଇଥିଲା । ନିକଟରେ ତା’ର ଦ୍ୱିତୀୟ ଭାଗ ରିଲିଜ୍ ହୋଇଥିବାବେଳେ ସେଥିରେ ତାଙ୍କର ଉଚ୍ଚକୋଟୀର ଅଭିନୟକୁ ବି ଖୁବ୍ ପ୍ରଶଂସା ମିଳୁଛି । ଏହି ଅବସରରେ ଏକ ସାକ୍ଷାତକାରରେ ହୁମା କହିଛନ୍ତି, ‘ମହାରାଣୀ’ ସିରିଜ୍ ମୋ’ କ୍ୟାରିୟର ଲାଗି ଟର୍ଣ୍ଣିଂ ପଏଣ୍ଟ ଥିଲା । ସେଥିରେ ନିରକ୍ଷର ରାଣୀ ଭାରତୀ ଚରିତ୍ରରେ ଅଭିନୟ ମୋ’ ପାଇଁ ଖୁବ୍ ଚାଲେଞ୍ଜିଂ ଥିବାବେଳେ ଦର୍ଶକମାନେ ତାକୁ ପ୍ରଶଂସା କରିଥିଲେ । ସେହି ସିରିଜ୍ ପରେ ଫିଲ୍ମ ନିର୍ମାତାମାନଙ୍କର ମୋ’ ପ୍ରତି ଆଭିମୁଖ୍ୟ ମଧ୍ୟ ବଦଳିଯାଇଛି । ସେମାନେ ମୋତେ ଗୁରୁତ୍ୱର ସହ ଗ୍ରହଣ କରିଛନ୍ତି । ତେଣୁ ଏବେ ମୋତେ ଆହୁରି ସଶକ୍ତ ଭୂମିକା ମିଳୁଛି ।
ୱାର୍କଫ୍ରଣ୍ଟ କଥା କହିବାକୁ ଗଲେ ହୁମାଙ୍କୁ ଆଗକୁ ‘ମୋନିକା, ଓ ମାଇଁ ଡାର୍ଲିଂ’, ‘ଡବଲ ଏକ୍ସଏଲ୍’ ‘ପୂଜା ମେରି ଜାନ୍’ ପ୍ରଭୃତି ଫିଲ୍ମରେ ଦେଖିବାକୁ ମିଳିବ।
