ନୂଆଦିଲ୍ଲୀ: ରାଷ୍ଟ୍ରୀୟ ରାଜଧାନୀ ଦିଲ୍ଳୀରେ ଏକ ଲୋମହର୍ଷଣକାରୀ ଘଟଣା ଘଟିଛି । ଏକ ଜୋତା କାରଖାନାର ମ୍ୟାନେଜର ନାବାଳିକାକୁ ଦୁଷ୍କର୍ମ କରିଛି । ଘଟଣା ସମୟରେ ମ୍ୟାନେଜରଙ୍କ ପତ୍ନୀ ମଧ୍ୟ ଉପସ୍ଥିତ ଥିଲେ ବି ବିରୋଧ କରିପାରି ନାହାନ୍ତି । ଏହା ପରେ ନାବାଳିକାକୁ ମ୍ୟାନେଜର ବିଷାକ୍ତ ଖାଦ୍ୟ ଦେଇଛି । ନାବାଳିକାର ସ୍ୱାସ୍ଥ୍ୟ ବିଗିଡ଼ିବା ପରେ ତାକୁ ଏମ୍ସରେ ଭର୍ତ୍ତି କରାଯାଇଛି । ଯେତେବେଳେ ପୀଡିତାର ସ୍ୱାସ୍ଥ୍ୟାବସ୍ଥା ଠିକ ହୋଇଛି, ପୋଲିସ ବୟାନ ରେକର୍ଡ କରିଛି । ପୀଡିତାର ବୟାନ ଅନୁସାରେ ପୋଲିସ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରିଛି । ତେବେ ମ୍ୟାନେଜର ପତ୍ନୀ ଫେରାର ଅଛି ।
ଦିଲ୍ଲୀର ନାଙ୍ଗଲୋଇ ଅଞ୍ଚଳରେ ଏହି ଅଭାବନୀୟ ଘଟଣା ଘଟିଛି । ପୋଲିସ କହିବା ଅନୁସାରେ ଗତ ୧୫ ତାରିଖ ଦିନ ପିସିଆରକୁ ଜଣେ ବ୍ୟକ୍ତି ଫୋନ କରି ସୂଚନା ଦେଇଥିଲା ଯେ, ତାଙ୍କର ଭଉଣୀକୁ ଦୁଷ୍କର୍ମ କରାଯାଇଛି । ଏହା ପରେ ପୋଲିସ ଅଳ୍ପ ସମୟ ପରେ ନିର୍ଦ୍ଧାରିତ ସ୍ଥାନରେ ପହଞ୍ଚି ଥିଲା । ସେତେବେଳକୁ ପୀଡିତାକୁ ଡାକ୍ତରଖାନାରେ ଭର୍ତ୍ତି କରାଯାଇ ସାରିଥିଲା । ପୀଡିତା ୧୬ ତାରିଖରେ ଚେତା ପାଇଲା ପରେ ପୋଲିସ ବୟାନ ରେକର୍ଡ କରିଛି ।
ଚେତା ଫେରିବା ପରେ ନାବାଳିକା ପୋଲିସକୁ କହିଛି ଯେ, ସେ ଏକ ଜୋତା କାରଖାନାରେ କାମ କରେ । କାରଖାନାର ମ୍ୟାନେଜର ଜୟ ପ୍ରକାଶ ଜୁଲାଇ ୨ ତାରିଖରେ କହିଥିଲା ଯେ, ତାର ପତ୍ନୀ ଅସୁସ୍ଥ ଅଛି । ଏଥି ପାଇଁ ନାବାଳିକାକୁ ତା ଘରକୁ ଯିବା ପାଇଁ କହିଥିଲା । ନାବାଳିକା ଯେତେବେଳେ ମ୍ୟାନେଜର ଘରକୁ ଗଲା, ସେଠାରେ ଜୟପ୍ରକାଶ ପତ୍ନୀ ସାମ୍ନାରେ ଦୁଷ୍କର୍ମ କରିଥିଲା । ଏହା ପରେ ସେ ନାବାଳିକାକୁ ବିଷାକ୍ତ ଜିନିଷ ଦେଇ ତା ଘରେ ଛାଡ଼ି ଦେଇଥିଲା । ପୀଡିତା ଯେତେବେଳେ ନିଜ ଘରେ ପହଞ୍ଚିଲା, ସେତେବେଳେ ସେ ଚେତା ହରାଇଥିଲା ।
