ବାଲିପାଟଣା : ରାଜଧାନୀ ଉପକଣ୍ଠ ବାଲିପାଟଣା ଥାନା ଅଞ୍ଚଳରେ କମିଶନରେଟ୍ ପୁଲିସକୁ ପୁଣି ହଟହଟା ହେବାକୁ ପଡ଼ିଛି । ଲୋକଙ୍କ ସଂଘବଦ୍ଧ ଆକ୍ରମଣରେ ସ୍ପେଶାଲ ସ୍କ୍ୱାଡ୍ ଗାଡ଼ିଛାଡ଼ି ଛତ୍ରଭଙ୍ଗ ଦେବା ଖବର ଚର୍ଚ୍ଚାର ବିଷୟ ପାଲଟିଛି । ଶୁକ୍ରବାର ବିଳମ୍ବିତ ରାତ୍ରିରେ ଘଟିଥିବା ଏହି ଘଟଣାରେ ପୁଲିସ ମିଳିତ ଚଢ଼ଉ କରି ଅଞ୍ଚଳର ୩୦ରୁ ଊର୍ଦ୍ଧ୍ୱଲୋକଙ୍କୁ ଉଠାଇଆଣିଛି । ପ୍ରାପ୍ତ ସୂଚନାରୁ ପ୍ରକାଶ ଯେ ଶୁକ୍ରବାର ଏହି ଥାନା ଅଧିନସ୍ଥ ରାଜସ ଗ୍ରାମପଞ୍ଚାୟତ କୃଷ୍ଣପୁର ମେଳଣର ଦ୍ୱିତୀୟ ରାତ୍ରିି ଯାତ୍ରା ଚାଲିଥିଲା । ତେବେ ଯାତ୍ରାବେଳେ ଜୁଆଖେଳ ହେଉଥିବା କୌଣସି ସୂତ୍ରରୁ ଖବର ପାଇ ରାତ୍ର ପ୍ରାୟ ଦୁଇଟା ବେଳେ ସ୍ପେଶାଲ୍ ସ୍କ୍ୱାଡ ପୁଲିସ ସାଧା ପୋଷାକରେ ଆସି ପହଁଚିଥିଲା । ଜୁଆଖେଳ ପାଖରେ ରୁଣ୍ଡ ହୋଇଥିବା ଲୋକଙ୍କୁ ଲାଠିରେ ଅତର୍କିତ ଭାବେ ପିଟିବା ସହ କିଛି ଜୁଆଡ଼ିଙ୍କୁ ଧରିଆଣି ଗାଡ଼ିରେ ବସାଇଥିଲେ ସ୍ପେଶାଲ୍ ସ୍କ୍ୱାଡ୍ ପୁଲିସ୍ କର୍ମଚାରୀ । ସେହି ସମୟରେ ସ୍ଥାନୀୟ ଲୋକେ ଉତ୍କ୍ଷିପ୍ତ ହୋଇ ପୁଲିସ କର୍ମଚାରୀଙ୍କୁ ମଧ୍ୟ ଆକ୍ରମଣ କରିଥିଲେ । ଘଟଣାସ୍ଥଳ ରଣକ୍ଷେତ୍ର ପାଲଟିଥିଲା ।
ପୁଲିସ ଟିମ୍ ବନ୍ଧୁକ ଦେଖାଇ ଲୋକଙ୍କୁ ଭୟଭୀତ କରିଥିଲେ ମଧ୍ୟ ଲୋକେ ଏହାକୁ ଖାତିର ନକରି ଗୋଡ଼େଇ ଗୋଡ଼େଇ ପିଟିଥିଲେ । ଜୀବନ ବିକଳରେ ପୁଲିସ ସ୍ଥାନ ଛାଡ଼ି ପଳାଇଥିଲେ । ଖବର ପାଇ ବାଲିପାଟଣା ପୁଲିସ ସେଠାରେ ପହଁଚି ସ୍ଥାନୀୟ ସରପଞ୍ଚଙ୍କ ସହାୟତାରେ ପୁଲିସ ଗାଡ଼ିକୁ ଉଦ୍ଧାର କରିଥିଲେ । କମିଶନରେଟ୍ ପୁଲିସ ଏହି ଘଟଣାକୁ ଗୁରୁତ୍ୱର ସହ ନେଇଥିଲା । ଶନିବାର ଅତିରିକ୍ତ ଡିସିପି ପ୍ରକାଶଚନ୍ଦ୍ର ପଲ, ଜୋନ୍-୪ ଏସିପି ପରେଶ କୁମାର ରାୟ, ଏୟାର ଫିଲ୍ଡ ଥାନା ଆଇଆଇସି ରାଧାକାନ୍ତ ସାହୁ, ବାଲିଅନ୍ତା ଆଇଆଇସି ଯୁବରାଜ ସ୍ୱାଇଁ, ଲକ୍ଷ୍ମୀସାଗର ଆଇଆଇସି ଓମ୍ ପ୍ରକାଶ ମହାନ୍ତି, ଧଉଳି ଆଇଆଇସି ଚିତ୍ତରଞ୍ଜନ ରାଉତ, ପାହାଳ ଆଇଆଇସି ଷ୍ଟାଲିନ୍ ବିଶ୍ୱାଳ ଓ ବାଲିପାଟଣା ଆଇଆଇସି କୃପାସିନ୍ଧୁ ବରାଡ଼ଙ୍କ ସହ ବ୍ୟାପକ ପୁଲିସ ଟିମ୍ ଉକ୍ତ ଅଞ୍ଚଳରେ ଚଢ଼ଉ କରି ୩୦ରୁ ଊର୍ଦ୍ଧ୍ୱ ଲୋକଙ୍କୁ ଆଣି ଅଟକ ରଖିଛନ୍ତି । ଘଟଣାକୁ ନେଇ ରାଜସ ଅଞ୍ଚଳରେ ପ୍ରବଳ ଉତ୍ତେଜନା ପ୍ରକାଶ ପାଇବା ସହ ଗ୍ରାମଗୁଡ଼ିକ ପୁରୁଷଶୂନ୍ୟ ହୋଇପଡ଼ିଛି ।
