ମୁମ୍ବାଇ: ଚଳିତବର୍ଷର ରଣ୍ଜୀ ଟ୍ରଫି ନକ୍ଆଉଟ୍ ପର୍ଯ୍ୟାୟ ମ୍ୟାଚ୍ ବେଙ୍ଗାଲୁରୁରେ ଆୟୋଜିତ ହେବ । ନକ୍ଆଉଟ୍ ପର୍ଯ୍ୟାୟ ଜୁନ୍ ୪ରୁ କ୍ୱାର୍ଟର୍ ଫାଇନାଲ୍ରୁ ଆରମ୍ଭ ହୋଇ ଜୁନ୍ ୨୦ର ଫାଇନାଲ୍ରେ ଶେଷ ହେବ । ଟୁର୍ଣ୍ଣାମେଣ୍ଟ୍ର ଲିଗ୍ ପର୍ଯ୍ୟାୟ ବର୍ତ୍ତମାନ ଚାଲିଥିବା ଆଇପିଏଲ୍ର ଆରମ୍ଭ ପୂର୍ବରୁ ଖେଳାଯାଇଥିଲା ଏବଂ ନକ୍ଆଉଟ୍ ପର୍ଯ୍ୟାୟ ଏହି ଦାମୀ ଟି-୨୦ ଲିଗ୍ ପରେ ଖେଳାଯିବ ବୋଲି ବିସିସିଆଇ ପକ୍ଷରୁ କୁହାଯାଇଥିଲା । ଏହି ପର୍ଯ୍ୟାୟରେ ଖେଳାଳିଙ୍କ ପାଇଁ ଅନିବାର୍ଯ୍ୟ କ୍ୱାରେଣ୍ଟାଇନ୍ ରହିବ ନାହିଁ, ମାତ୍ର ବାୟୋ ବବଲ୍ ବ୍ୟବସ୍ଥା ବଜାୟ ରଖାଯିବ ।
ଭେନ୍ୟୁରେ ପହଞ୍ଚିବା ବେଳେ ଖେଳାଳିମାନଙ୍କୁ ସେମାନଙ୍କର ନେଗେଟିଭ୍ ଆର୍ଟି-ପିସିଆର୍ ରିପୋର୍ଟ ଦାଖଲ କରିବାକୁ ହେବ । ଜୁନ୍ ୪ରୁ ୮ ତାରିଖ ପର୍ଯ୍ୟନ୍ତ ଟୁର୍ଣ୍ଣାମେଣ୍ଟ୍ର ଚାରୋଟି କ୍ୱାର୍ଟର୍ ଫାଇନାଲ୍ ଖେଳାଯିବ । ପ୍ରଥମ କ୍ୱାର୍ଟର୍ ଫାଇନାଲ୍ରେ ବେଙ୍ଗଲ ଝାଡ଼ଖଣ୍ଡକୁ ଭେଟିବ । ୪୧ ଥରର ରଣ୍ଜୀ ଚାମ୍ପିଅନ୍ ମୁମ୍ବାଇ ଦ୍ୱିତୀୟ କ୍ୱାର୍ଟର୍ ଫାଇନାଲ୍ରେ ଉତ୍ତରାଖଣ୍ଡକୁ ଭେଟିବାକୁ ଥିବାବେଳେ ତୃତୀୟ ମ୍ୟାଚ୍ କର୍ଣ୍ଣାଟକ ଓ ଉତ୍ତରପ୍ରଦେଶ ମଧ୍ୟରେ ଖେଳାଯିବ । ଚତୁର୍ଥ କ୍ୱାର୍ଟର୍ ଫାଇନାଲ୍ ପଞ୍ଜାବ ଓ ମଧ୍ୟପ୍ରଦେଶ ମଧ୍ୟରେ ଅନୁଷ୍ଠିତ ହେବ । ସେମିଫାଇନାଲ୍ ଦୁଇଟି ଜୁନ୍ ୧୨ରୁ ୧୬ ପର୍ଯ୍ୟନ୍ତ ଖେଳାଯିବାକୁ ଥିବାବେଳେ ଏହି ସମ୍ମାନଜନକ ଘରୋଇ ଚାମ୍ପିଅନ୍ଶିପ୍ର ଫାଇନାଲ୍ ମ୍ୟାଚ୍ ଜୁନ୍ ୨୦ରୁ ୨୪ ପର୍ଯ୍ୟନ୍ତ ଅନୁଷ୍ଠିତ ହେବ ।
