ଅନୁଗୁଳ : ଗୁଣି ଗାରେଡି ସନ୍ଦେହରେ ପାଲଲହଡା ଖମାର ଥାନା କୁଞ୍ଜାମରେ ଟ୍ରିପଲ ମର୍ଡର । ଅନୁଗୁଳ ଜିଲ୍ଲା ପାଲଲହଡା ବ୍ଲକ ଖମାର ଥାନା ଅନ୍ତର୍ଗତ କୁଞ୍ଜାମ ଗାଁ’ରେ ଏହି ଜଘନ୍ୟ ହତ୍ୟାକାଣ୍ଡ ଘଟିଛି । ଗୁଣି ଗାରେଡି ସନ୍ଦେହରେ କୁଞ୍ଜାମ ଜିତମୁଣ୍ଡା ସାହିର ବୁଦ୍ଧୁ ଚାତର ତାର ସ୍ତ୍ରୀ ମୁନି ଚାତର ଏବଂ କୁଞ୍ଜାମ ଦେଉଳ ସାହିରେ ରହୁଥିବା ବୁଧୁ ଚାତର ର ପୁତୁରା ବୁଦ୍ଧିଆ ଗାଗରାଇ କୁ ପିଟିପିଟି ମାରିଦେଇ ସମାକୋଇ ନଦୀରେ ଫିଙ୍ଗି ଦେଇଛୁ ବୋଲି ୬ ଜଣ ଅଭିଯୁକ୍ତ ଜେରା ବେଳେ ପୋଲିସ ଆଗରେ ସ୍ୱୀକାର କରିଛନ୍ତି ।
ସୂଚନା ଅନୁଯାୟୀ, ଗତ ୩୦ ତାରିଖ ସନ୍ଧ୍ୟାରେ ଏହି ହତ୍ୟାକାଣ୍ଡ ଘଟିଥିଲା । ସେଦିନ ବୁଦ୍ଧିଆ ଗାଗରାଇ ତା କକା ବୁଧୁ ଚାତର ଘରକୁ ଆସି କଥାବାର୍ତ୍ତା ହେଉଥିବା ବେଳେ ଜିତମୁଣ୍ଡାର ସାହିର ୬ ଜଣ ଯୁବକ ଆସି ସେମାନଙ୍କୁ ମରଣାନ୍ତକ ଆକ୍ରମଣ କରିଥିଲେ । ପିଟି ପିଟି ମାରି ଦେବାପରେ ଗାଁ ନିକଟରେ ଥିବା ସମାକୋଇ ନଦୀରେ ଫିଙ୍ଗି ଦେଇଥିବା ପୋଲିସ ଆଗରେ ଅଭିଯୁକ୍ତ ମାନେ ସ୍ୱୀକାର କରିଛନ୍ତି । ତିନି ଜଣଙ୍କ ମଧ୍ୟରୁ ରବିବାର ସମାକୋଇ ନଦୀରୁ ବୁଧୁ ଚାତରର କ୍ଷତ ବିକ୍ଷତ ମୃତଦେହ ଉଦ୍ଧାର ହୋଇଥିଲା ଓ ଆଜି ବୁଦ୍ଧିଆ ଗାଗରାଇର ମୃତ ଦେହ ସମଲ ଥାନା ଗହମ ନିକଟ ସମାକୋଇ ନଦୀରୁ ମିଳିଛି । ଅନ୍ୟପଟେ ମୁନି ଚାତାରର ମୃତଦେହ ଏବେ ମଧ୍ୟ ମିଳିପାରି ନାହିଁ । ଏହି ଘଟଣାରେ ଖମାର ପୋଲିସ ୬ ଅଭିଯୁକ୍ତକୁ ଡାକ୍ତରୀ ପରୀକ୍ଷା ପାଇଁ ପଠାଇଛି । ଆଜି ତାଙ୍କୁ କୋର୍ଟ ଚାଲାଣ କରାଯିବ ବୋଲି ସୂଚନା ମିଳିଛି ।
