ନର୍ଲା : କଳାହାଣ୍ଡି ଜିଲ୍ଲା ନର୍ଲା ବ୍ଲକ ନିଶାନପରୁ ପଞ୍ଚାୟତର ସରପଞ୍ଚ ବରିଷ୍ଠ ନାଗରିକ,ବିଶିଷ୍ଟ ନେତା କ୍ଷମାରାଜ ରଣାଙ୍କର କରୋନା ସଂକ୍ରମଣରେ ଦେହାନ୍ତ ହୋଇଛି । ସୂଚନା ଅନୁଯାୟୀ, ସେ କରୋନାରେ ଆକ୍ରାନ୍ତ ହୋଇ ଗତ ୪ ଦିନ ସୁଦୂର ବଲାଙ୍ଗିରରେ ଚିକିତ୍ସିତ ହେଉଥିଲେ । ଡାକ୍ତରଙ୍କ ପ୍ରଚେଷ୍ଠା ସତ୍ୱେ ତାଙ୍କର ସ୍ୱାସ୍ଥ୍ୟବସ୍ଥା ସଂକଟାପନ୍ନ ଥିବା ଜଣାପଡିଥିଲା ।
ଜଣେ ବରିଷ୍ଠ ନେତା ଭାବରେ ଅଞ୍ଚଳରେ ତାଙ୍କର ଗୁଣ ଗାରିମା ଥିବା ବେଳେ ସେ ଜଣେ ସ୍ପଷ୍ଟବାଦୀ,ମେଳାପୀ, ପରୋପକାରୀ, ଉଦାର ଚରିତ୍ରର ବ୍ୟକ୍ତି ଥିଲେ । ତାଙ୍କର ମୃତ୍ୟୁ ଜନିତ ଦୁଃଖଦ ଖବର ଜଣାପଡିବା ପରେ ଅଞ୍ଚଳରେ ଶୋକର ଛାୟା ଖେଳି ଯାଇଛି । ସରପଞ୍ଚ ସଂଘର ସଭାପତି ଚିରଞ୍ଜିବୀ ଗୌଡିଆ, ସଂପାଦକ ଚିତରଞ୍ଜନ ରଣା ନର୍ଲା ମାଟି ଆଜି ଏକ ବିଶିଷ୍ଟ ବ୍ୟକ୍ତିଙ୍କୁ ହରେଇଲା ବୋଲି ଶୋକ ପ୍ରକାଶ କରିଛନ୍ତି । ସେହିପରି ସମସ୍ତ ସରପଞ୍ଚ, ସମିତି ସଭ୍ୟ, ଅଧ୍ୟକ୍ଷା ମନୋରମା ମହାନ୍ତି, ଉପାଧ୍ୟକ୍ଷ ଦୁର୍ଗା ପ୍ରସାଦ ମହାନ୍ତି, ନର୍ଲା ବିଡିଓ ଯୁଧିଷ୍ଠିର ନାଏକ, ଜିପିଓ କ୍ଷିତିଶ ଚନ୍ଦ୍ର ନାଏକ, ଜିଲ୍ଲା ବିଜେଡି ଉପ-ସଭାପତି ଚିତରଞ୍ଜନ ମଣ୍ଡଳ, ସମାଜସେବୀ ମନୋଜ କୁମାର ପଟ୍ଟନାୟକ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଗଭୀର ଶୋକ ପ୍ରକାଶ କରିଛନ୍ତି । ଅନ୍ୟ ପକ୍ଷରେ ନର୍ଲା ମାଟିର ବିଭିନ୍ନ ସଂଗଠନ ପକ୍ଷରୁ ଗଭୀର ଶୋକ ପ୍ରକାଶ ପାଇଛି ।
କରୋନାରେ ଆଖି ବୁଜିଲେ ସରପଞ୍ଚ
