କେନ୍ଦ୍ରାପଡ଼ା : ଜିଲ୍ଲାର ମାର୍ଶାଘାଇ ଥାନା ଅନ୍ତର୍ଗତ ପଳାସପୁର ନିକଟ ଲୁଣାନଦୀରୁ ଜଣେ ଯୁବକ ଓ ଜଣେ ଯୁବତୀଙ୍କ ମୃତଦେହକୁ ଅଗ୍ନିଶମ ବିଭାଗ ପକ୍ଷରୁ ଗୁରୁବାର ଉଦ୍ଧାର କରାଯାଇଛି । ତେବେ ମାର୍ଶାଘାଇ ପୁଲିସ ମୃତଦେହକୁ ଜବତ କରିବା ସହିତ ପଞ୍ଚନାମା ପାଇଁ କେନ୍ଦ୍ରାପଡ଼ା ପଠାଇଛି । ମୃତକମାନଙ୍କ ପରିଚୟ ଜଣାପଡ଼ିନଥିବା ବେଳେ ଏହା ଏକ ହତ୍ୟା କିମ୍ବା ଆତ୍ମହତ୍ୟା ତାହା ମଧ୍ୟ ସ୍ପଷ୍ଟ ହୋଇନାହିଁ ।
ସୂଚନା ଅନୁଯାୟୀ, ଗୁରୁବାର ପଳାସପୁର ନିକଟ ଲୁଣା ନଦୀରେ ଦୁଇଟି ମୃତ ଦେହ ଭାସୁଥିବା ଦେଖି ସ୍ଥାନୀୟ ଲୋକ ମହାକାଳପଡା ଅଗ୍ନିଶମ ବିଭାଗ ଓ ପୁଲିସକୁ ଖବର ଦେଇଥିଲେ । ତେବେ ଘଟଣା ସ୍ଥଳଟି ମହାକାଳପଡ଼ା ଓ ମାର୍ଶାଘାଇ ଥାନାର ସୀମାରେ ରହିଥିବାରୁ ଉଭୟ ଥାନା ପୁଲିସ ଏହାକୁ ଗୁରୁତ୍ୱ ଦେଇନଥିଲେ । ଘଟଣା ସ୍ଥଳରେ ତ୍ୱରିତ ଭାବେ ଅଗ୍ନିଶମ ବିଭାଗ ପହଞ୍ଚି ମୃତଦେହକୁ ନଦୀରୁ ଉଦ୍ଧାର କରିଥିଲେ । ଉଦ୍ଧାର ସମୟରେ ଯୁବକଙ୍କ ଡାହାଣ ହାତ ସହିତ ଯୁବତୀଙ୍କ ବାମ ହାତ ଏକ ଓଢଣୀରେ ବନ୍ଧା ଯାଇଥିବା ଦେଖିବାକୁ ମିଳିଥିଲା । ସେହିପରି ସେମାନଙ୍କ ଗୋଡ ବନ୍ଧା ଯାଇଥିବା ବେଳେ କୌଣସି କାରଣରୁ ଏହା ଫିଟି ଜଣକ ଗୋଡରେ ରହିଯାଇଥିଲା । ତେବେ ଯେହେତୁ ଜଣକର ହାତ ଅନ୍ୟଜଣକର ହାତ ସହିତ ବନ୍ଧା ଯାଇଥିଲା, ତେଣୁ ଏହା କୌଣସି ପ୍ରେମୀ ଯୁଗଳଙ୍କ ଚରମ ନିଷ୍ପତ୍ତି ବୋଲି ସନ୍ଦେହ ପ୍ରକାଶ ପାଇଛି । ଅନ୍ୟପକ୍ଷରେ ଉଭୟଙ୍କୁ ହତ୍ୟା କରିବାକୁ କିମ୍ବା ହତ୍ୟା କରିବା ପରେ ନଦୀରେ ଫିଙ୍ଗାଯାଇଥାଇ ପାରେ ବୋଲି ମଧ୍ୟ ସନ୍ଦେହର ଅନ୍ୟ ଦିଗକୁ ଇଂଗିତ କରୁଛି । ତେବେ ଏହା ହତ୍ୟା କିମ୍ବା ଆତ୍ମହତ୍ୟା ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ସ୍ପଷ୍ଟ ହେବ ବୋଲି ପୁଲିସଠାରୁ ସୂଚନା ମିଳିଛି । ମାର୍ଶାଘାଇ ଥାନା ଅଧିକାରୀ କାଳନ୍ଦୀ ବେହେରାଙ୍କ ଠାରୁ ମିଳିଥିବା ସୂଚନା ଅନୁସାରେ ଗତକାଲି ଏହି ଦୁଇ ମୃତଦେହ କଟକ ଜିଲ୍ଲା ସାଲେପୁର ଓ ନେମାଳ ଥାନା ଅଞ୍ଚଳ ଦେଇ ନଦୀରେ ଭାସି ଭାସି ଆସିଥିଲା । ଏହାର ଫଟୋ ବିଭିନ୍ନ ସାମାଜିକ ଗଣ ମାଧ୍ୟମରେ ଭାଇରାଲ ହୋଇଥିଲା ବୋଲି ଥାନା ଅଧିକାରୀ ପ୍ରକାଶ କରିଛନ୍ତି । । ତେବେ ଏହି ମୃତଦେହ ଦୁଇଟିର ଏପର୍ଯ୍ୟନ୍ତ କେହି ଦାବିଦାର ନଥିବା ସୂଚନା ମିଳିଛି । ସେହିପରି କୌଣସି ଥାନାରେ ମଧ୍ୟ ଏମାନଙ୍କ ବିଷୟରେ କୌଣସି ମିସିଂ ରିପୋର୍ଟ ନଥିବା ସେ ପ୍ରକାଶ କରିଛନ୍ତି । ତେବେ ଏ ସମ୍ପର୍କରେ ତଦନ୍ତ ଜାରିରହିଥିବା ଥାନା ଅଧିକାରୀ ଶ୍ରୀ ବେହେରା ସୂଚନା ଦେଇଛନ୍ତି ।
ଲୁଣା ନଦୀରୁ ପ୍ରେମୀ ଯୁଗଳଙ୍କ ମୃତଦେହ ଉଦ୍ଧାର
