ଜଟଣୀ: କରୋନା ପାଇଁ ସାରାଦେଶରେ ଲକ୍ ଡାଉନ୍ ଲାଗି ରହିଥିବାବେଳେ ବିଭିନ୍ନ ସ୍ଥାନରେ ଲୋକେ ଫସିରହିଛନ୍ତି । ଫଳରେ ନିଜ ଘରକୁ ଯିବାକୁ ବ୍ୟାକୁଳ ହେଉଛନ୍ତି । ଏଭଳି ସ୍ଥିତିରେ ଜଟଣୀ ବ୍ଲକ୍ ଅନ୍ତର୍ଗତ ତରାବୋଇଠାରେ ଥିବା ସ୍କିଲ୍ ଇଣ୍ଡିଆ ଲିମିଟେଡରେ ଶ୍ରମିକଭାବେ କାର୍ଯ୍ୟ କରୁଥିବା ୫ ଜଣ ବ୍ୟକ୍ତି ନିଜ ଘର ପଶ୍ଚିମବଙ୍ଗକୁ ଚାଲି ଚାଲି ଯିବାକୁ ବାହାରିଛନ୍ତି । ସେମାନେ ହେଲେ ଦୀପକ ସାହା, ପିଣ୍ଟୁ ମଣ୍ଡଳ, ମିଥୁନ ମଦିନ, ଆଶିଷ ଶାହା ଓ ସୁଜିତ ହାଲଦା ।
ସୂଚନା ଅନୁଯାୟୀ, ସେମାନେ ଏହି ଶିଳ୍ପାଞ୍ଚଳରେ ଶ୍ରମିକଭାବେ କାର୍ଯ୍ୟକରୁଥିବାବେଳେ ଲକ୍ ଡାଉନ୍ ପ୍ରଭାବରେ କାମ ବନ୍ଦ ହୋଇଯାଇଥିଲା । ଫଳରେ ସେମାନଙ୍କ ପାଖରେ ଥିବା ଅର୍ଥ କିଛି ଦିନ ମଧ୍ୟରେ ଶେଷ ହୋଇଆସିଲାଣି । ଖାଇବା ପିଇବାକୁ ସେମାନଙ୍କ ପାଖରେ ଅର୍ଥର ଅଭାବ ଦେଖାଦେବାରୁ ପାଖ ଦୋକାନରୁ ବାକିରେ ସଉଦା ଆଣି କିଛିଦିନ ଚଳିଥିଲେ । ମାତ୍ର ଦୋକାନୀ ଆଉ ଅଧିକ ବାକି ନଦେବାରୁ ସେମାନଙ୍କ ମୁଣ୍ଡରେ ଚଡ଼କ ପଡ଼ିଥିଲା । ବାଧ୍ୟ ହୋଇ ଚାଲି ଚାଲି ନିଜ ଗାଁ’କୁ ଫେରିବାକୁ ନିଷ୍ପତ୍ତି ନେଇଥିଲେ । ଖବରପାଇ କେତେକ କଂଗ୍ରେସ କର୍ମୀ ସେମାନଙ୍କୁ ଅଟକାଇ ପୌରନିର୍ବାହୀଙ୍କ ଦୃଷ୍ଟିକୁ ଆଣିଥିଲେ । ଜଟଣୀ ଥାନା ଛକଠାରେ ଜଟଣୀ ନଗର କଂଗ୍ରେସ ସଭାପତି ଅଶୋକ ମଙ୍ଗରାଜ, ବ୍ଲକ୍ ପ୍ରତିନିଧି ବିଜୟ ଛୋଟରାୟ ଓ ସୁଲୁ ରଥ ପ୍ରମୁଖ ସେମାନଙ୍କୁ ପଚରାଉଚରା ପରେ ପୌରନିର୍ବାହୀ ତପନ ମହାପାତ୍ରଙ୍କୁ ଅବଗତ କରିଥିଲେ । ପରେ ପ୍ରଶାସନ ସେମାନଙ୍କୁ ଉଦ୍ଧାରକରି ଜଟଣୀ ପୌରପରିଷଦ ଅଧୀନ ହିନ୍ଦୀ ସ୍କୁଲଠାରେ ରକ୍ଷଣାବେକ୍ଷଣ ବ୍ୟବସ୍ଥା କରାଯାଇଥିବା ଜଣାପଡ଼ିଛି ।
କୋଲକାତାକୁ ଚାଲିଚାଲି ବାହାରିଲେ ୫ଶ୍ରମିକ
