ତାଲା ଭାଙ୍ଗି ୬ ଲକ୍ଷ ଟଙ୍କାର ସୁନା ଅଳଙ୍କାର ଲୁଟ୍

ଫୁଲବାଣୀ: ଫୁଲବାଣୀ ଆଦର୍ଶଥାନା ହାଟପଦା ସାହିରେ ଗତକାଲି ରାତିରେ ଘରେ କେହି ନଥିବାବେଳେ ତାଲାଭାଙ୍ଗି ପ୍ରାୟ ୬ ଲକ୍ଷ ଟଙ୍କାର ସୁନା ଅଳଙ୍କାର ଚୋରି ହୋଇଥିବା ଅଭିଯୋଗ ହୋଇଛି । ହାଟପଦା ସାହିରେ ରହୁଥିବା ଶିକ୍ଷୟିତ୍ରୀ ନର୍ମଦା ମାହନ୍ତ ୩ ଦିନ ପୂର୍ବେ ଭୁବନେଶ୍ୱର ଯାଇଥିଲେ । ଘରେ କେହି ନଥିବାର ସୁଯୋଗ ନେଇ ଗତକାଲି ରାତିରେ ଦୁର୍ବୃତ୍ତମାନେ ତାଙ୍କ ଘରର ତାଲା ଭାଙ୍ଗି ଘରେ ଥିବା ଏକ ସ୍କୁଟ ସହ ଆଲମାରିରେ ଥିବା ୬ ଲକ୍ଷ ଟଙ୍କାର ସୁନା ଅଳଙ୍କାର ଲୁଟି ନେଇଛନ୍ତି । ସେହିପରି ପାଖ ଘରେ ରହୁଥିବା ତାଙ୍କ ଭଉଣୀ କଳ୍ପନା ମହାନ୍ତିଙ୍କର ଘରର ତାଲା ଭାଙ୍ଗି ଲୁଟ୍ ହୋଇଥିବା ସୂଚନା ମିଳିଛି । ସକାଳେ ଘରର ତାଲା ଭଙ୍ଗା ହୋଇଥିବା ଦେଖି ପାଖ ପଡୋଶୀ ନର୍ମଦାଙ୍କୁ ଫୋନ କରି ଜଣାଇଥିଲେ । ନର୍ମଦା ସୁଡୁରୁକୁମ୍ପା ଠାରେ ରହୁଥିବା ତାଙ୍କ ଭାଇ କାବୁଲା ମାହନ୍ତିଙ୍କୁ ଏନେଇ ସୂଚନା ଦେବାପରେ ସେ ଥାନାରେ ଖବର ଦେଇଥିଲେ । ଖବରପାଇ ଥାନାଧିକାରୀ ନରେନ୍ଦ୍ର ସାହୁ ସନ୍ଧାନୀ କୁକୁର ସହ ଆସି ତଦନ୍ତ କରିଥିଲେ । ପରେ ନର୍ମଦା ଭୁବନେଶ୍ୱରରୁ ଫେରି ଥାନାରେ ଏତେଲା ଦେବାପରେ ପୁଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି । ସହରରେ ଗତ କିଛି ଦିନ ଧରି ଛିନତାଇ, ଚୋରି ବୃଦ୍ଧି ପାଇବାରେ ଲାଗିଛି । ସହରରେ ସିସି କ୍ୟାମେରା ଲାଗିନଥିବା ବେଳେ ପୁଲିସର ଢିଲା ପାଟ୍ରୋଲିଂର ସୁଯୋଗ ନେଇ ଦୁର୍ବୃତ୍ତମାନେ ଲଗାତାର ଅପରାଧ ଘଟାଇ ବେଶ ସୁବିଧାରେ ଫେରାର ହୋଇଯାଉଛନ୍ତି । ତେଣୁ ସହରର ବିଭିନ୍ନ ଛକରେ ସିସି କ୍ୟାମେରା ଲଗାଇବା ସହ ପାଟ୍ରୋଲିଂକୁ କଡ଼ାକଡ଼ି କରିବାକୁ ଦାବି ହେଉଛି ।