ଆଫଗାନ ସେନା ହାତରେ ୨୬୨ ତାଲିବାନ ଆତଙ୍କବାଦୀ ସଫା, ଦେଶରେ କର୍ଫ୍ୟୁ ଜାରି

ନୂଆଦିଲ୍ଲୀ: ଆଫଗାନିସ୍ତାନର ପ୍ରତିରକ୍ଷା ମନ୍ତ୍ରାଳୟ ତରଫରୁ କୁହାଯାଇଛି ଯେ, ସୁରକ୍ଷା ବାହିନୀର ଯବାନମାନେ ବିଗତ ୨୪ ଘଣ୍ଟା ମଧ୍ୟରେ ୨୬୨ ଜଣ ତାଲିବାନ ଆତଙ୍କବାଦୀଙ୍କୁ ସଫା କରିଛନ୍ତି। ବିଭିନ୍ନ ରାଜ୍ୟରେ ସେନା ପକ୍ଷରୁ ଜାରି ରହିଥିବା ଅଭିଯାନ ବଳରେ ଏହି ଆତଙ୍କବାଦୀମାନଙ୍କୁ ସଫା କରାଯାଇଛି। ଏଥି ସହିତ ସରକାର ଦେଶବ୍ୟାପୀ କର୍ଫ୍ୟୁ ଲାଗୁ କରିଛନ୍ତି। ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ, ସେନାର ଅପରଶେନ ସମୟରେ ୧୭୬ ଜଣ ଆତଙ୍କବାଦୀ ଆହତ ହୋଇଛନ୍ତି। ସେହିପରି ୨୧ଟି ବୋମାକୁ ନିଷ୍କ୍ରିୟ କରାଯାଇଛି। ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ, ଲାଗମାନ, ନନଗହର, ନୁରୀସ୍ତାନ, କୁନାର, ଗଜନୀ, ପକତିଆ, କାନ୍ଦାହାର, ହେରାତ, ବାଲଖା, ଜୋଜିଆନ, ହେଲମାଣ୍ଡ, କୁଣ୍ଡୁଜ ଓ କାପିସା ରାଜ୍ୟରେ ସୁରକ୍ଷାବାହିନୀର ଯବାନମାନେ ସର୍ଚ୍ଚଅପରେଶନ କରିଥିଲେ। ଆଫଗାନିସ୍ତାନ ମନ୍ତ୍ରାଳୟ ପକ୍ଷରୁ ଟୁଇଟ କରି ଏହି ସୂଚନା ଦିଆଯାଇଛି।