କେର୍ନ୍ସ : ମଙ୍ଗଳବାରଠାରୁ ଏଠାରେ ନ୍ୟୁଜିଲାଣ୍ଡ୍ ବିପକ୍ଷ ଦିନିକିଆ ସିରିଜ୍ ଘରୋଇ ଅଷ୍ଟ୍ରେଲିଆ ବିଜୟ ସହ ଆରମ୍ଭ କରିଛି । କାମେରନ୍ ଗ୍ରୀନ୍ଙ୍କ ୮୯ ରନ୍ର ଅପରାଜିତ ଇନିଂସ ସହାୟତାରେ ଅଷ୍ଟ୍ରେଲିଆ ୨ ୱିକେଟ୍ରେ ବିଜୟୀ ହୋଇ ୩ ମ୍ୟାଚ୍ ବିଶିଷ୍ଟ ସିରିଜ୍ରେ ୧-୦ରେ ଆଗୁଆ ରହିଛି । ପ୍ରଥମେ ବ୍ୟାଟିଂ ପାଇ ନ୍ୟୁଜିଲାଣ୍ଡ୍ ୯ ୱିକେଟ୍ ହରାଇ ୨୩୨ ରନ୍ କରିଥିବା ବେଳେ ଜବାବରେ ଅଷ୍ଟ୍ରେଲିଆ ୪୫ ଓଭର୍ରେ ବିଜୟ ଲକ୍ଷ୍ୟରେ ପହଞ୍ଚିଥିଲା । ୧୦ଟି ଚୌକା ଓ ଗୋଟିଏ ଛକା ଜରିଆରେ ୮୯ ରନ୍ କରିବା ସହ ଷଷ୍ଠ ୱିକେଟ୍ରେ ଆଲେକ୍ସ କ୍ୟାରୀଙ୍କ ସାଥିରେ ୧୫୮ ରନ୍ର ମ୍ୟାଚ୍ ବିଜୟୀ ଭାଗୀଦାରୀ କରିଥିବା ଗ୍ରୀନ୍ ପ୍ଲେୟର୍ ଅଫ୍ ଦି ମ୍ୟାଚ୍ ହୋଇଛନ୍ତି । ନ୍ୟୁଜିଲାଣ୍ଡ୍ ପକ୍ଷରୁ ଓପନର ଡେଭନ୍ କୋନ୍ୱେ ସର୍ବାଧିକ ୪୬ ରନ୍ କରିଥିଲେ ।
ତାଙ୍କର ଏହି ଇନିଂସରେ ୪ଟି ଚୌକା ଓ ଗୋଟିଏ ଛକା ରହିଥିଲା । ଏହାଛଡ଼ା ଅଧିନାୟକ କେନ୍ ୱିଲିୟମ୍ସନ୍ ୩ଟି ଚୌକା ଓ ଗୋଟିଏ ଛକା ସହ ୪୫ ଏବଂ ଟମ୍ ଲାଥାମ୍ ୨ଟି ଚୌକା ଓ ଗୋଟିଏ ଛକା ସହ ୪୩ ରନ୍ର ଇନିଂସ ଖେଳିଥିଲେ । ଅଷ୍ଟ୍ରେଲିଆ ପକ୍ଷରୁ ଗ୍ଲେନ୍ ମ୍ୟାକ୍ସୱେଲ୍ ସର୍ବାଧିକ ୪ଟି ଓ ଜୋଶ୍ ହେଜଲଉଡ୍ ୩ଟି ୱିକେଟ୍ ନେଇଥିଲେ । ବ୍ୟାଟିଂରେ ୪୪ ରନ୍ ମଧ୍ୟରେ ୫ ଜଣ ଶୀର୍ଷ ଭାଗ ବ୍ୟାଟ୍ସମ୍ୟାନ୍ଙ୍କୁ ହରାଇ ବିପଦରେ ପଡ଼ିଥିଲେ ହେଁ ଗ୍ରୀନ୍-କ୍ୟାରୀ ଯୋଡ଼ି ଦଳକୁ ଏଥିରୁ ଉଦ୍ଧାର କରିଥିଲେ । କ୍ୟାରୀ ୮ଟି ଚୌକା ଓ ଗୋଟିଏ ଛକା ମାଧ୍ୟମରେ ୮୫ ରନ୍ର ଅବଦାନ ଦେଇଥିଲେ । ନ୍ୟୁଜିଲାଣ୍ଡ୍ ପକ୍ଷରୁ ଟ୍ରେଣ୍ଟ୍ ବୋଲ୍ଟ ୪ଟି ଏବଂ ମ୍ୟାଟ୍ ହେନ୍ରୀ ଓ ଲକି ଫର୍ଗୁସନ୍ ୨ଟି ଲେଖାଏଁ ୱିକେଟ୍ ନେଇଥିଲେ । ସିରିଜ୍ର ଦ୍ୱିତୀୟ ମ୍ୟାଚ୍ ଆସନ୍ତା ଗୁରୁବାର ଏଠାରେ ଖେଳାଯିବ ।
