ଚାରି ମାସରେ ୬ଥର କମର୍ସିଆଲ୍ ଏଲ୍ପିଜି ଦର ବୃଦ୍ଧି ଚିନ୍ତାଜନକ
ସାଧାରଣ ଲୋକଙ୍କ ଉପରେ ଅତିରିକ୍ତ ଆର୍ଥିକ ବୋଝ ଲଦୁଛି ସରକାର
ଭୁବନେଶ୍ୱର: କମର୍ସିଆଲ୍ ଏଲପିଜି ସିଲିଣ୍ଡର ଦରରେ ୯୯୩.୩ ଟଙ୍କା ବୃଦ୍ଧି ସହିତ ସମ୍ପ୍ରତି ହୋଇଥିବା ଏଲପିଜି ଦରବୃଦ୍ଧିକୁ ଦୃଢ଼ ଭାବରେ ନିନ୍ଦା କରିଛି ବିଜେଡି । ଏହାକୁ ଅନ୍ୟାୟପୂର୍ଣ୍ଣ ଓ ସମ୍ୱେଦନହୀନ ପଦକ୍ଷେପ ବୋଲି କହି ସାଧାରଣ ଲୋକଙ୍କ ଉପରେ ଅତିରିକ୍ତ ଆର୍ଥିକ ଭାର ପକାଇଥିବାର ଅଭିଯୋଗ କରିଛି ଦଳ ।
ଶଙ୍ଖ ଭବନରେ ଆୟୋଜିତ ସାମ୍ୱାଦିକ ସମ୍ମିଳନୀରେ ବିଜୁ ମହିଳା ଜନତା ଦଳର ସଭାନେତ୍ରୀ ଶ୍ରୀମତୀ ସ୍ନେହାଙ୍ଗିନୀ ଛୁରିଆ ଏବଂ ବରିଷ୍ଠ ସାଧାରଣ ସମ୍ପାଦିକା ଶ୍ରୀମତୀ ରଞ୍ଜିତ ସାହୁ ଏଲପିଜି ଦର ବୃଦ୍ଧି ଉପରେ ଗଭୀର ଚିନ୍ତା ପ୍ରକାଶ କରିଛନ୍ତି । ସେମାନେ କହିଛନ୍ତି ଯେ ଏଲପିଜି ଦର ଅଚାନକ ଭାବେ ବଢ଼ି ୩୦୭୧.୫୦ ଟଙ୍କାରେ ପହଞ୍ଚିଛି, ଯାହା ସର୍ବକାଳୀନ ରେକର୍ଡ । ଗତ ଚାରି ମାସରେ ଛଅଥର ଦରବୃଦ୍ଧି ହୋଇଛି, ଯାହା ୧୫୧୮ରୁ ବଢ଼ି ୩୦୭୧.୫୦ ଟଙ୍କାରେ ପହଞ୍ଚିଛି ।
ଶ୍ରୀମତୀ ସ୍ନେହଙ୍ଗିନୀ ଛୁରିଆ କହିଛନ୍ତି ଯେ ଏଲପିଜି ଦର ଗୋଟିଏ ଦିନରେ ୯୯୩ ଟଙ୍କା ବୃଦ୍ଧି ପାଇ ରେକର୍ଡ ସୃଷ୍ଟି କରିଛି । ଅନ୍ତର୍ଜାତୀୟ ଶ୍ରମିକ ଦିବସରେ ଯେଉଁମାନେ ଶ୍ରମ ଦାନ କରି ଦେଶର ଉନ୍ନତିରେ ଅବଦାନ ଦେଇଥାନ୍ତି, ସେମାନଙ୍କୁ ସମ୍ମାନ ଦେବା ପରିବର୍ତ୍ତେ ସରକାର ଏହି ଦିନରେ ଗ୍ୟାସ ଦରବୃଦ୍ଧି ରୂପୀ “ଉପହାର” ଦେଇଛନ୍ତି, ଯାହା ଅତ୍ୟନ୍ତ ଦୁଃଖଦ । ଶ୍ରମିକମାନଙ୍କୁ ସମ୍ମାନ କରିବା ପରିବର୍ତ୍ତେ ସେମାନଙ୍କ ଉପରେ ଅତିରିକ୍ତ ଆର୍ଥିକ ଭାର ଲଦି ଦିଆଯାଇଛି ।
ସେ ଆହୁରି କହିଛନ୍ତି ଯେ, କମର୍ସିଆଲ୍ ଏଲପିଜି ସିଲିଣ୍ଡରରେ ୯୯୩.୩ ଟଙ୍କା ବୃଦ୍ଧି ଛୋଟ ବ୍ୟବସାୟ, ରେସ୍ତୋରା, ଚା ଦୋକାନ ଏବଂ ହୋଟେଲ ଶିଳ୍ପ ଉପରେ ଗୁରୁତର ପ୍ରଭାବ ପକାଇବ । ଏହା ଫଳରେ ଖର୍ଚ୍ଚ ବଢ଼ିବା ସହିତ ଗ୍ରାହକମାନଙ୍କ ପାଇଁ ମୂଲ୍ୟ ବୃଦ୍ଧି ହେବ । ସାଧାରଣ ଲୋକମାନେ ବ୍ୟବହାର କରୁଥିବା ୫ ଲିଟର ସିଲିଣ୍ଡରରେ ମଧ୍ୟ ୨୬୧ ଟଙ୍କା ବୃଦ୍ଧି ହୋଇଛି, ଯାହା ପରିବାରର ବଜେଟ୍ ଉପରେ ଅଧିକ ଚାପ ସୃଷ୍ଟି କରୁଛି । ସରକାର ପର୍ଯ୍ୟଟନ ଉନ୍ନତିର ପ୍ରତିଶ୍ରୁତି ଦେଇଥିଲେ ମଧ୍ୟ ଗ୍ୟାସ ଦରବୃଦ୍ଧି ଫଳରେ ପର୍ଯ୍ୟଟନ ଅଞ୍ଚଳର ହୋଟେଲ ଓ ଛୋଟ ବ୍ୟବସାୟଗୁଡ଼ିକ ଚଲାଇବା କଷ୍ଟକର ହେଉଛି । ଏହା ଫଳରେ ଖାଦ୍ୟ ମୂଲ୍ୟ ବଢ଼ିବା ସହିତ ପର୍ଯ୍ୟଟନ ମଧ୍ୟ ପ୍ରଭାବିତ ହେବ । ସାଧାରଣ ଲୋକମାନେ ଦୈନନ୍ଦିନ ଆବଶ୍ୟକତା ପୂରଣ କରିବାରେ ସମସ୍ୟାର ସମ୍ମୁଖୀନ ହେଉଛନ୍ତି । ସରକାର ବାରମ୍ବାର ଦରବୃଦ୍ଧି ମାଧ୍ୟମରେ ସାଧାରଣ ଲୋକଙ୍କ ଉପରେ ଆର୍ଥିକ ଭାର ବଢ଼ୁଛି । ଯାହାକି ଗରିବ ବିରୋଧୀ ନୀତି । ମହଙ୍ଗାଇ ନିୟନ୍ତ୍ରଣ ଓ ଦରବୃଦ୍ଧି ପ୍ରତ୍ୟାହାର ପାଇଁ ଦାବି କରିଛନ୍ତି ।
ସେହିପରି ଶ୍ରୀମତୀ ରଞ୍ଜିତ ସାହୁ ପ୍ରଶ୍ନ ଉଠାଇଛନ୍ତି ଯେ ଏଲପିଜି ଉତ୍ପାଦନ, ରିଜର୍ଭ ଓ ସ୍ଟୋରେଜ ପର୍ଯ୍ୟାପ୍ତ ଥିବା ସତ୍ତ୍ୱେ ଏବଂ ସପ୍ଲାଇ ସିଷ୍ଟମ୍ ସ୍ଥିର ଥିବା ସତ୍ତ୍ୱେ ଦର କାହିଁକି ବଢ଼ୁଛି । ନିରନ୍ତର ଏଲପିଜି ଦରବୃଦ୍ଧି ଫଳରେ ମହଙ୍ଗାଇ ବଢ଼ିଛି ଏବଂ ପରିବାର ସଞ୍ଚୟ ହ୍ରାସ ପାଇଛି । ଆବଶ୍ୟକୀୟ ଜିନିଷ ଏବେ ଅନେକଙ୍କ ପାଇଁ କ୍ରୟ କରିବା ସହଜ ହେଉନାହିଁ, ବିଶେଷକରି ମହିଳାମାନେ ଓ ଆର୍ଥିକ ଭାବେ ପଛୁଆ ଶ୍ରେଣୀ ଉପରେ ଅଧିକ ଚାପ ପଡ଼ୁଛି ।
ସେ ଆହୁରି ସମାଲୋଚନା କରିଛନ୍ତି ଯେ ସରକାର “ଆତ୍ମନିର୍ଭର ଭାରତ’ ଓ “ମେକ୍ ଇନ୍ ଇଣ୍ଡିଆ’ ଭଳି ନାରା ଦେଉଥିବା ବେଳେ ବାସ୍ତବତାରେ ଦେଶ ଦିନକୁ ଦିନ ତଳକୁ ତଳ ଯାଉଛି ଏବଂ ନାଗରିକଙ୍କ ଉପରେ ଖର୍ଚ୍ଚ ବଢ଼ୁଛି । ବିଜୁ ଜନତା ଦଳ କେନ୍ଦ୍ର ସରକାରଙ୍କୁ ତୁରନ୍ତ ମହଙ୍ଗାଇ ନିୟନ୍ତ୍ରଣ, ଏଲପିଜି ଦରବୃଦ୍ଧି ପ୍ରତ୍ୟାହାର ଏବଂ ସାଧାରଣ ଲୋକଙ୍କ ସ୍ୱାର୍ଥ ସୁରକ୍ଷା ପାଇଁ ପଦକ୍ଷେପ ନେବାକୁ ଦାବି କରିଛି । ଦଳ ପୁନର୍ବାର କହିଛି ଯେ ସେମାନେ ସମସ୍ତ ଉପଯୁକ୍ତ ମଞ୍ଚରେ ଏହି ବିଷୟ ଉଠାଇବେ ଏବଂ ଦରବୃଦ୍ଧି ପୀଡ଼ିତ ନାଗରିକଙ୍କ ସହ ଦୃଢ଼ ଭାବେ ରହିବେ ।
