ୱାର୍ଡ ମେମ୍ବରଙ୍କୁ ଉଠେଇନେଲେ ବିରୋଧି

ଯାଜପୁର : ଯାଜପୁର ଜିଲ୍ଲାପାଳଙ୍କ କାର୍ଯ୍ୟାଳୟ ପାଖରେ ଥିବା ପଣସା ପଞ୍ଚାୟତର ୱାର୍ଡ ମେମ୍ବରଙ୍କୁ ଅପହରଣ କରାଯାଇଥିବା ଅଭିଯୋଗ ହୋଇଛି । ୧୨ ନମ୍ବର ୱାର୍ଡର ୱାର୍ଡ ମେମ୍ବର ମନୋଜ ରାଉତଙ୍କୁ କିଛି ଦୁର୍ବୁତ୍ତ ପଞ୍ଚାୟତ ଅଫିସ ପାଖରୁ ଅପହରଣ କରି ନେଇଥିବା ଜଣାଯାଇଛି । ଆଜି ନାଏବ ସରପଞ୍ଚ ମନୋନୟନ ଥିବାରୁ ପରାଜିତ ଆଶଙ୍କା କରି ବିରୋଧୀ ଏଭଳି କରିଛନ୍ତି ବୋଲି ବିଜୟୀ ସରପଞ୍ଚ କୁଳମଣୀ ପରିଡା ଅଭିଯୋଗ କରିଛନ୍ତି । ନାଏବ ସରପଞ୍ଚ ଚୟନ ଥିବାରେ ସେମାନେ କେତେକ ସଭ୍ୟଙ୍କ ସହ ପଞ୍ଚାୟତ ଅଫିସ୍ ଯାଇଥିଲେ । ଗେଟ୍ ପାଖରୁ କେତେକ ଅସାମାଜିକ ବ୍ୟକ୍ତି ସେମାନଙ୍କର ଜଣେ ୱାର୍ଡ ମେମ୍ବରଙ୍କୁ ମାରଧର କରିବା ସହ ଜବରଦସ୍ତ ଉଠେଇ ନେଇଥିବା ସେ କୁହନ୍ତି । ତେବେ ୱାର୍ଡ ମେମ୍ବରଙ୍କୁ ଅପହରଣ ପରେ ନାଏବ ସରପଞ୍ଚ ମନୋନୟନ ପାଇଁ ଧାର୍ଯ୍ୟ ଦିନ ବାତିଲ କରାଯାଇଛି । ସେପଟେ ସ୍ୱାମୀଙ୍କୁ ଉଦ୍ଧାର କରିବା ଲାଗି ଅପହୃତ ମନୋଜଙ୍କ ପତ୍ନୀ ସସ୍ମିତା ରାଉତ ଯାଜପୁର ଥାନାରେ ଅଭିଯୋଗ କରିଛନ୍ତି । ସ୍ୱାମୀଙ୍କ ମୋବାଇଲ୍ ସୁଇଜ୍ ଅଫ୍ ଥିବାରୁ ତାଙ୍କ ସହ ଏପର୍ଯ୍ୟନ୍ତ କୌଣସି ଯୋଗାଯୋଗ ହୋଇ ପାରି ନଥିବା ସେ କହିଛନ୍ତି । ତେବେ ପୋଲିସ ଘଟଣା ସମ୍ପର୍କରେ ତଦନ୍ତ କରୁଥିବା ଯାଜପୁର ଟାଉନ ଥାନା ଅଧିକାରୀ ସୂଚନା ଦେଇଛନ୍ତି ।