ମୁମ୍ବାଇ: ଡିସେମ୍ବର ୨୯ରୁ ଜାନୁଆରୀ ୭ ତାରିଖ ପର୍ଯ୍ୟନ୍ତ ଅଷ୍ଟ୍ରେଲିଆରେ ୟୁନାଇଟେଡ୍ କପ୍ ଦଳୀୟ ଚାମ୍ପିଅନ୍ଶିପ୍ ଖେଳାଯିବ । ଏଥିପାଇଁ ଶୁକ୍ରବାର ସ୍ପେନ୍ ଓ ସର୍ବିଆ ପକ୍ଷରୁ ଦଳ ଘୋଷଣା କରାଯାଇଛି । ଏହି ଚାମ୍ପିଅନ୍ଶିପ୍ ସିଡନୀ ଓ ପର୍ଥରେ ଖେଳାଯିବ । ବିଶ୍ୱର ଏକ ନମ୍ବର ଖେଳାଳି ନୋଭାକ ଜୋକୋଭିକ୍ ଏହି ଚାମ୍ପିଅନ୍ଶିପ୍ ପାଇଁ ସର୍ବିଆ ଦଳର ନେତୃତ୍ୱ ନେଉଥିବା ବେଳେ ଆହତ ସମସ୍ୟା ପାଇଁ ରାଫେଲ ନାଦାଲ ସ୍ପେନ୍ ଦଳରୁ ବାଦ ପଡ଼ିଛନ୍ତି । ୨୦୨୩ରେ ନାଦାଲ ସ୍ପେନ୍ ଦଳରେ ସାମିଲ ହେବା ପୂର୍ବରୁ ବର୍ଷର ପ୍ରଥମ ଗ୍ରାଣ୍ଡ୍ ସ୍ଲାମରେ ତାଙ୍କ ହିପ୍ ଆହତ ହୋଇଥିଲା ।
ସେଥିପାଇଁ ଗତ ଜୁନ୍ରେ ତାଙ୍କର ଅସ୍ତ୍ରୋପଚାର ହୋଇଥିଲା । ଟେନିସ୍ ଅଷ୍ଟ୍ରେଲିଆ ମୁଖ୍ୟ କ୍ରେଗ୍ ଟିଲେ କହିଛନ୍ତି, ଚଳିତ ମାସରେ ନାଦାଲ ୟୁନାଇଟେଡ୍ କପ୍ ପରେ ଅଷ୍ଟ୍ରେଲିଆନ୍ ଓପନ ମାଧ୍ୟମରେ ଗ୍ରାଣ୍ଡସ୍ଲାମ ଟେନିସକୁ ପ୍ରତ୍ୟାବର୍ତ୍ତନ କରିବାକୁ ଯୋଜନା କରିଛନ୍ତି । ନାଦାଲ ଉପସ୍ଥିତ ହେବେ କି ନାହିଁ ତାହା ନିଶ୍ଚିତ ନକରି ସୋସିଆଲ ମିଡିଆରେ ଟିଲିଙ୍କୁ ତାଙ୍କ ଆତ୍ମବିଶ୍ୱାସ ପାଇଁ ଧନ୍ୟବାଦ ଦେଇ ପ୍ରତିକ୍ରିୟା ରଖିଛନ୍ତି । ଜାନୁଆରି ଆରମ୍ଭରେ ବ୍ରିସ୍ବେନ୍, ଆଡିଲେଡ୍ ଓ ଅକ୍ଲାଣ୍ଡରେ ଏଟିପି ଇଭେଣ୍ଟ ରହିଛି । ଯାହାକୁ ନାଦାଲ ମଧ୍ୟ ଅଷ୍ଟ୍ରେଲିଆନ୍ ଓପନ୍ ପାଇଁ ପ୍ରସ୍ତୁତିରେ ବ୍ୟବହାର କରିପାରନ୍ତି । ୟୁନାଇଟେଡ୍ କପରେ ବିଶ୍ୱର ଶ୍ରେଷ୍ଠ ୨୦ ଜଣ ପୁରୁଷ ଖେଳାଳିଙ୍କ ମଧ୍ୟରୁ ୯ ଜଣ ଏବଂ ଶ୍ରେଷ୍ଠ ୧୦ ଜଣ ମହିଳା ଖେଳାଳିଙ୍କ ମଧ୍ୟରୁ ୫ ଜଣ ଖେଳିବେ ।
ଜେସିକା ପେଗୁଲା ଓ ଟେଲର ଫ୍ରିଜଙ୍କ ନେତୃତ୍ୱରେ ଡିଫେଣ୍ଡିଂ ଚାମ୍ପିଅନ୍ ଆମେରିକା ଫେଭରିଟ୍ ତାଲିକାରେ ରହିଛି । ବିଶ୍ୱର ଦୁଇ ନମ୍ବର ଖେଳାଳି ତଥା ଚାରିଥର ଗ୍ରାଣ୍ଡସ୍ଲାମ ବିଜେତା ଇଗା ସ୍ୱିଆତେକଙ୍କ ନେତୃତ୍ୱରେ ଖେଳୁଥିବା ପୋଲାଣ୍ଡକୁ ପ୍ରତିଯୋଗିତା ପାଇଁ ଶୀର୍ଷ ମାନ୍ୟତା ମିଳିଛି । ଏହି ଚାମ୍ପିଅନ୍ଶିପ୍ରେ ୧୮ଟି ରାଷ୍ଟ୍ର ଅଂଶଗ୍ରହଣ କରୁଛି । ଦେଶଗୁଡ଼ିକୁ ତିନିଟି ଗ୍ରୁପରେ ବିଭକ୍ତ କରାଯାଇ ରାଉଣ୍ଡ ରବିନ୍ ଫର୍ମାଟରେ ପ୍ରତିଦ୍ୱନ୍ଦ୍ୱିତା କରାଯିବ । ପ୍ରତି ଟାଇରେ ଗୋଟିଏ ପୁରୁଷ ଓ ମହିଳା ମ୍ୟାଚ୍ ସହ ମିଶ୍ରିତ ଯୁଗଳ ମୁକାବିଲା ହେବ ।
