ଭୁବନେଶ୍ୱର: ଆମେରିକାର ବର୍ତ୍ତମାନର ମୁଦ୍ରାସ୍ଫିତି ବିଗତ ୪୦ ବର୍ଷର ରେକର୍ଡକୁ ଭାଙ୍ଗିଛି । ବାଇଡେନ ପ୍ରଶାସନ ଓ ଫେଡେରାଲ ରିଜର୍ଭ ମୁଦ୍ରାସ୍ଫିତିର ମୁକାବିଲା କରିବା ପାଇଁ ଅନେକ ପଦକ୍ଷେପ ଉଠାଇଛନ୍ତି । ଆମେରିକା ଫେଡେରାଲ ସୁଧଦରରେ ୦.୭୫% ବୃଦ୍ଧି କରିଛନ୍ତି। ଏହାପରେ ଆମେରିକା ବଜାର ବହୁତ ହ୍ରାସ ପାଇଛି । ସୁଧଦର ବଢ଼ାଇବା ପରେ ମୁଦ୍ରାସ୍ଫୀତି ନିୟନ୍ତ୍ରଣ ହୋଇଯିବ କିନ୍ତୁ ଆର୍ôଥକ ମାନ୍ଦାବସ୍ଥା ଆସିପାରେ ବୋଲି ବିଭିନ୍ନ ସ୍ତରରେ ପୂର୍ବାନୁମାନ କରାଯାଉଛି । ଡ୍ୟୁଚ ବ୍ୟାଙ୍କ ଏବଂ ମୋର୍ଗାନ ଷ୍ଟେନଲି ପରେ ଜାପାନର ନିବେଶ ବ୍ୟାଙ୍କ ନାମୁରା ମଧ୍ୟ ଆମେରିକାର ଅର୍ଥନୀତିରେ ମନ୍ଥର ଗତି କରିବ ବୋଲି ପୂର୍ବାନୁମାନ କରିଛି । ନାମୁରଙ୍କ ଅନୁଯାୟୀ, ୨୦୨୨ ଶେଷରେ ମାନ୍ଦାବସ୍ଥା ହୋଇପାରେ । ବ୍ୟାଙ୍କ ଏବଂ ବଡ଼ ବ୍ୟବସାୟୀଙ୍କ ଏହି ମାନ୍ଦାବସ୍ଥା ପୂର୍ବାନୁମାନ କେବଳ ଆମେରିକା ପାଇଁ ଅସୁବିଧା ନୁହେଁ, ବରଂ ସମଗ୍ର ବିଶ୍ୱ ଏହାଦ୍ୱାରା ଅସୁବିଧାରେ ପଡ଼ିଛି ।
ଆମେରିକା ହେଉଛି ବିଶ୍ୱର ସବୁଠୁ ବଡ଼ ଅର୍ଥନୀତି ଏବଂ ବିଶ୍ୱର ଅଧିକାଂଶ ଦେଶ ଏହା ସହିତ ସଂଯୁକ୍ତ । ଏପରିକି ୨୦୦୮ରେ ମାନ୍ଦାବସ୍ଥା ଆମେରିକାରୁ ଆରମ୍ଭ ହୋଇଥିଲା, ତା’ପରେ ସମଗ୍ର ବିଶ୍ୱ ଏହାର ପ୍ରଭାବରେ ପ୍ରଭାବିତ ହେଲା । ତେବେ ଭାରତ ଉପରେ ଏହାର ପ୍ରଭାବ ବହୁତ କମ୍ ଥିଲା । ୧୯୯୯-୨୦୦୧ରୁ ଆମେରିକାର ଅର୍ଥମନ୍ତ୍ରୀ ଭାବରେ କାର୍ଯ୍ୟ କରିଥିବା ଲରେନ୍ସ ସମର୍ସ କହିଛନ୍ତି ଯେ ଆସନ୍ତା ଦୁଇବର୍ଷ ମଧ୍ୟରେ ଆମେରିକା ଅର୍ଥନୀତିରେ ମାନ୍ଦାବସ୍ଥା ଆସିପାରେ । ସମର୍ସଙ୍କ ଅନୁଯାୟୀ, ଯେତେବେଳେ ବି ମୁଦ୍ରାସ୍ଫୀତି ୪%ରୁ ଅଧିକ ଏବଂ ବେକାରୀ ହାର ୪% ରୁ କମ୍, ସେତେବେଳେ ମାନ୍ଦାବସ୍ଥାଦ୍ୱାରା ବିଶ୍ୱର ପ୍ରମୁଖ ଅର୍ଥନୀତି ପ୍ରଭାବିତ ହୋଇଛି ।
ଆମେରିକା ଏହି ମାନକକୁ ଅତିକ୍ରମ କରିଛି । ବିଶ୍ୱର ସର୍ବବୃହତ ଷ୍ଟକ୍ ଏକ୍ସଚେଞ୍ଜର ନାସଡାକ୍ର ସିଇଓ ଆଡେନା ଫ୍ରିଡ୍ମ୍ୟାନ୍ ବିଶ୍ୱ ଅର୍ଥନୈତିକ ଫୋରମ୍ର ଏକ ପ୍ୟାନେଲରେ ଚେତାବନୀ ଦେଇ କହିଛନ୍ତି ଯେ ମାନ୍ଦାବସ୍ଥାର ପୂର୍ବାନୁମାନ ସବୁଠୁ ବଡ଼ କାରଣ ହୋଇପାରେ। ଭବିଷ୍ୟବାଣୀ ଗ୍ରାହକଙ୍କ ଆତ୍ମବିଶ୍ୱାସକୁ କ୍ଷୁର୍ଣ୍ଣ କରୁଛି । ଏହା ବଜାରରେ ଅସ୍ଥିରତା ସୃଷ୍ଟି କରିବା ସହିତ ମାନ୍ଦାବସ୍ଥା ଆଶଙ୍କା ବଢ଼ିପାରେ । ଗୋଲ୍ଡମ୍ୟାନ୍ ସାକ୍ସର ଆର୍ôଥକ ସେବାର ବରିଷ୍ଠ ଚେୟାରମ୍ୟାନ୍ ଓଲିଉଡ ବ୍ଲାକଫେନ୍ ସିବିଏସର ସାକ୍ଷାତ୍କାରରେ କହିଛନ୍ତି ଯେ ମାନ୍ଦାବସ୍ଥାର ଆଶଙ୍କା ଅଧିକ, କିନ୍ତୁ ଫେଡେରାଲ୍ ରିଜର୍ଭ ଚାହିଁଲେ ଏହାକୁ ରୋକିପାରିବ ।
ଗୋଲ୍ଡମ୍ୟାନ୍ ସାକ୍ସର ସିଇଓ ଡେଭିଡ୍ ସୋଲେମାନ କହିଛନ୍ତି ଯେ ଆସନ୍ତା ୧୨ରୁ ୧୪ ମାସ ମଧ୍ୟରେ ମାନ୍ଦାବସ୍ଥା ହୋଇପାରେ । ସେମାନଙ୍କ ଅନୁଯାୟୀ, ମାନ୍ଦାବସ୍ଥା ସମ୍ଭାବନା ୩୦% ରହିଛି । ଦୁନିଆର ସବୁଠାରୁ ଧନୀ ବ୍ୟକ୍ତି ଟେସଲା ଏବଂ ସ୍ପେସ୍ ଏକ୍ସ ସିଇଓ ଏଲୋନ୍ ମସ୍କଙ୍କ ଅନୁଯାୟୀ ଆମେରିକା ଅର୍ଥନୀତି ମାନ୍ଦାବସ୍ଥା ଦେଇ ଗତି କରୁଛି । ଯଦି ଅର୍ଥକୁ ଭୁଲଭାବେ ବଣ୍ଟନ କରାଯାଏ ତେବେ ଆଗାମୀ ଦିନରେ ପରିସ୍ଥିତି ଆହୁରି ଖରାପ ହୋଇପାରେ । ମାଇକ୍ରୋସଫ୍ଟର ସହ-ପ୍ରତିଷ୍ଠାତା ବିଲ୍ ଗେଟ୍ସଙ୍କ ଅନୁଯାୟୀ, ରୁଷ-ୟୁକ୍ରେନ ଯୁଦ୍ଧ ହେତୁ ମୁଦ୍ରାସ୍ଫୀତି ବୃଦ୍ଧି ପାଇଛି, ଯେଉଁ କାରଣରୁ ଅଧିକାଂଶ ଦେଶ ସୁଧହାରରେ ବୃଦ୍ଧି କରିଛନ୍ତି । ସୁଧହାରରେ ବୃଦ୍ଧି ହେତୁ ଅର୍ଥନୀତି ମନ୍ଥର ଗତି କରୁଛି ଏବଂ ଏହା ଅର୍ଥନୈତିକ ମନ୍ଥରତାରେ ପରିଣତ ହେବ ।
