କିଷାନ କଂଗ୍ରେସ ପକ୍ଷରୁ କେନ୍ଦ୍ର କୃଷି ଆଇନ୍‌କୁ ବିରୋଧ କରି ଚାଷୀ ଆନ୍ଦୋଳନକୁ ସମର୍ଥନ ଓ ଧାରଣା

ଭୁବନେଶ୍ୱର ତା ୩୦.୧୨ – କେନ୍ଦ୍ର ସରକାରଙ୍କ ଦ୍ୱାରା ଲାଗୁ କରାଯାଇଥିବା ନୂତନ କୃଷି ଆଇନ୍‌କୁ ବିରୋଧ କରି ଏହାର ପ୍ରତ୍ୟାହାର କରାଯିବା ଦାବିରେ ଆନ୍ଦୋଳନରତ କୃଷକମାନଙ୍କୁ ସମର୍ଥନ କରି ଗତକାଲି ବୌଦ୍ଧ ଜିଲ୍ଳାପାଳଙ୍କ କାର୍ଯ୍ୟାଳୟ ସମ୍ମୁଖରେ ଜିଲ୍ଲା କିଷାନ କଂଗ୍ରେସ ପକ୍ଷରୁ ଧାରଣା ଦିଆଯାଇଥିଲା । ଜିଲ୍ଲା କିଷାନ କଂଗ୍ରେସ ସଭାପତି ରଘୁନାଥ ପଲିଆଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଓଡିଶା ପ୍ରଦେଶ କିଷାନ କଂଗ୍ରେସ ରାଜ୍ୟ ଅଧ୍ୟକ୍ଷ ଅମୀୟ କୁମାର ପଟ୍ଟନାୟକ ଯୋଗ ଦେଇ କେନ୍ଦ୍ର ବିଜେପି ଓ ରାଜ୍ୟ ବିଜେଡି ସରକାରର ବିଭିନ୍ନ ଚାଷୀମାରଣ ନୀତିର ପ୍ରତିବାଦ କରିବା ସହିତ ପ୍ରଣୀତ ୩ଗୋଟି କଳା କୃଷି ଆଇନ୍ ଦ୍ୱାରା ଦେଶର ଚାଷୀକୂଳ ତଳିତଳାନ୍ତ ହେବା ସହ ଦେଶରେ କୃଷି ବିପର୍ଯ୍ୟସ୍ତ ଓ କୃଷକ, ସାଧାରଣ ଖାଉଟିମାନେ ସବୁଠାରୁ କ୍ଷତିଗ୍ରସ୍ତ ହେବେ । ଏହି ଆଇନ୍‌ରେ କେବଳ ପୁଞ୍ଜିପତି ଓ କର୍ପୋରେଟ୍‌ହାଉସ୍ ଲାଭବାନ ହେବାବେଳେ ଚାଷୀ ସର୍ବନିମ୍ନ ସହାୟକ ମୂଲ୍ୟ, ମଣ୍ଡି, ଚୁକ୍ତିଭିତିକ ଚାଷ ଓ ଅତ୍ୟାବଶ୍ୟକ ସାମଗ୍ରୀ କ୍ଷେତ୍ରରେ ବହୁ ଦୁର୍ଦ୍ଦଶାର ସମ୍ମୁଖିନ ହେବେ ବୋଲି ଶ୍ରୀ ପଟ୍ଟନାୟକ କହିଥିଲେ । ଅନ୍ୟମାନଙ୍କ ମଧ୍ୟରେ ବୌଦ୍ଧ ଜିଲ୍ଲା କଂଗ୍ରେସ କମିଟି ସଭାପତି ନବକୁମାର ମିଶ୍ର, ସାଧାରଣ ସଂପାଦକ ବୁଦ୍ଧଦେବ ପ୍ରଧାନ, କଂଟାମାଳ ବିଧାନସଭା ନିର୍ବାଚନ ମଣ୍ଡଳୀର କଂଗ୍ରେସ ପ୍ରାର୍ଥୀ ପ୍ରଶାନ୍ତ କୁମାର ସାହୁ, କେଶବ କ୍ଷେତି, ସମରେଶ ମିଶ୍ର, ବିକ୍ରମ ପ୍ରଧାନ, ପ୍ରଦୀପ କୁମାର ଦାସଙ୍କ ସମେତ କିଷାନ କଂଗ୍ରେସର ସମସ୍ତ ବ୍ଲକ ସଭାପତି, କର୍ମକର୍ତା ଓ ଶତାଧିକ ଚାଷୀ ପ୍ରତିନିଧିମାନେ ସାମିଲ ହୋଇଥିଲେ । ଏହି ପରିପ୍ରେକ୍ଷୀରେ ଜିଲ୍ଲା କିଷାନ କଂଗ୍ରେସ ପକ୍ଷରୁ କଳା କୃଷି ଆଇନ୍‌ର ପ୍ରତ୍ୟାହାର ଦାବି କରି ବୌଦ୍ଧ ଜିଲ୍ଲାପାଳଙ୍କ ଜରିଆରେ ଭାରତର ମହାମହିମ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରାଯାଇଥିଲା ।