ଲକ୍ଷ୍ନୌ: ଉତ୍ତରପ୍ରଦେଶର ଗୋରଖନାଥ ମନ୍ଦିର ନିକଟରେ ହାଇଭୋଲଟେଜ ଡ୍ରାମା ଦେଖିବାକୁ ମିଳିଛି । ଜଣେ ଆଇଆଇଟି ଛାତ୍ରଙ୍କ ଆକ୍ରମଣର ଶିକାର ହୋଇଛନ୍ତି ପୋଲିସ । ଜଣେ ଯୁବକ ହାତରେ ମାରଣାସ୍ତ୍ର ଧରି ଧାର୍ମିକ ନାରା ଲଗାଇବା ସହ ମନ୍ଦିରରେ ପ୍ରବେଶ କରିବାକୁ ଚେଷ୍ଟା କରିଥିଲା । ପୋଲିସ ତାକୁ ବାଧାଦେବା ପାଇଁ ଚେଷ୍ଟା କରିବାରୁ ଯୁବକ ଜଣଙ୍କ ହାତରେ ଧରିଥିବା ଧାରୁଆ ଅସ୍ତ୍ରରେ ପୋଲିସକୁ ଆକ୍ରମଣ କରିବାକୁ ପଛାଇ ନଥିଲା। କିଛି ସମୟରେ ଛକାପଞ୍ଝା ପରେ ଉକ୍ତ ଯୁବକଙ୍କୁ କାବୁ କରାଯାଇଛି । ଯୁବକଙ୍କ ନାମ ଅହମ୍ମଦ ମୁର୍ତୁଜା ଆବ୍ୱାସୀ ଓ ପ୍ରାଥମିକ ତଦନ୍ତରୁ ସେ ଜଣେ ଅଭ୍ୟାସଗତ ଅପରାଧୀ ନୁହନ୍ତି ବରଂ ଆଇଆଇଟିରୁ ସ୍ନାତକ କରିଥିବା ଜଣେ ଛାତ୍ର ବୋଲି ସୂଚନା ମିଳିଛି ।
ଏପରି ଘଟଣାକୁ ଆତଙ୍କବାଦ କହିବା ସହ ଏହାକୁ ପ୍ରଶୟ ଦିଆଯିବନି ବୋଲି ଉତ୍ତର ପ୍ରଦେଶ ପୋଲିସ ପ୍ରତିକ୍ରିୟା ରଖିଛି । ପରେ ତଦନ୍ତରୁ ଜଣାପଡିଛି ଯେ, ମୁର୍ତୁଜା ସ୍ଥାନୀୟ ଗୋରଖପୁରର ଜଣେ ବାସିନ୍ଦା ହୋଇଥିବାବେଳେ ଆଇଆଇଟି ବମ୍ବେର ୨୦୧୫ ବ୍ୟାଚର ଜଣେ ସ୍ନାତକ ପାସ ଆଉଟ ଛାତ୍ର ବୋଲି ଜଣାପଡିଛି । ଗିରଫ କରାଯିବା ପରେ ତାଙ୍କ ନିକଟରୁୁ ଏକ ଲ୍ୟାପଟପ, ମୋବାଇଲ ଓ ଟିକେଟ ଜବତ କରିଛି ପୋଲିସ । କ୍ୟାମେରାରେ କଏଦ ହୋଇଥିବା ଦୃଶ୍ୟରେ ଦେଖିବକୁ ମିଳୁଛି ଯେ, ଯୁବକ ଜଣଙ୍କ ହାତରେ ଏକ ଧାରୁଆ ଅସ୍ତ୍ର ଧରି ପୋଲିସ ଓ ତାକୁ କାବୁ କରିବାକୁ ଚେଷ୍ଟା କରୁଥିବା ସାଧାରଣ ଲୋକଙ୍କୁ ମରଣାନ୍ତକ ଆକ୍ରମଣ କରିବାକୁ ପ୍ରୟାସ କରୁଛି ।
ଅନ୍ୟପଟେ ସେଠାରେ ଏକାଠି ହୋଇଥିବା ଭିଡ ମଧ୍ୟ ଉକ୍ତ ଯୁବକଙ୍କ ଉପରେ ଟେକା ପଥର ମାଡ କରିଥିଲେ । ଫଳରେ ଯୁବକଟି ଅଧିକ ଉତ୍ତ୍ୟକ୍ତ ହୋଇପଡିଥିବା ଦେଖିବାକୁ ମିଳିଥିଲା । କୌଣସି ଅଘଟଣ ଘଟିବା ପୂର୍ବରୁ ଯୁବକଙ୍କୁ କାବୁ କରାଯାଇ ପୋଲିସ ଜିମା ଦିଆଯାଇଛି । ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିଜ ବିଧାନସଭା ଆସନ ଗୋରଖପୁରରେ ଏପରି ଘଟଣା ସାମ୍ନାକୁ ଆସିବା ପରେ ପୋଲିସ ସେବା ଓ ସୁରକ୍ଷା ନେଇ ମଧ୍ୟ ପ୍ରଶ୍ନ ସୃଷ୍ଟି ହେବାରେ ଲାଗିଛି ।
