ଆନ୍ଧ୍ରପ୍ରଦେଶ: ଆନ୍ଧ୍ର ପ୍ରଦେଶର ଶ୍ରୀସତ୍ୟସାଇ ଜିଲ୍ଲାରେ ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି । ଏଠାରେ ଜଣେ ମହିଳା ଓ ପୁରୁଷଙ୍କୁ ଲଣ୍ଡା କରି ଗାଁ ରାସ୍ତାରେ ଚଲାଇ ଚଲାଇ ନିଆଯାଇଛି । ଏହା ସହିତ ଉଭୟଙ୍କୁ ଚପଲ ମାଳ ମଧ୍ୟ ପିନ୍ଧାଯାଇଛି । ସବୁଠୁ ଆଶ୍ଚର୍ଯ୍ୟଜନକ କଥା ହେଲା, ମହିଳା ଓ ପୁରୁଷଙ୍କୁ ଏଭଳି ଦଣ୍ଡ ଦିଆଯାଉଥିବା ବେଳେ କେହି ବି ଗ୍ରାମବାସୀ ଏହାକୁ ବିରୋଧ କରି ନ ଥିଲେ । ଅଭିଯୋଗ ମୁତାବକ, ପୀଡ଼ିତ ମହିଳା ଓ ପୁରୁଷଙ୍କ ମଧ୍ୟରେ ଅବୈଧ ସମ୍ପର୍କ ଥିଲା । ପୀଡ଼ିତାଙ୍କ ସ୍ୱାମୀ ଓ ଶାଶୁଘର ଲୋକେ ଏଭଳି ଅଭିଯୋଗ ଆଣିଛନ୍ତି ।
ଦୁଇ ଜଣଙ୍କୁ ଗ୍ରାମବାସୀଙ୍କ ଉପସ୍ଥିତିରେ ଦଣ୍ଡ ଦିଆଯାଇଥିବା ଶାଶୁଘର ଲୋକେ କହିଛନ୍ତି । ସ୍ୱାମୀ ଅଭିଯୋଗ କରିଛି ଯେ ତାଙ୍କ ସ୍ତ୍ରୀଙ୍କର ଅନ୍ୟ ଜଣେ ପୁରୁଷ ସହ ଦୀର୍ଘଦିନ ଧରି ଅବୈଧ ସମ୍ପର୍କ ରହିଥିଲା । ଗତକାଲି ଉଭୟଙ୍କୁ ସେ କାବୁ କରିନେଇଥିଲେ ଏବଂ ନିଜେ ହିଁ ଦୁହିଁଙ୍କୁ ଦଣ୍ଡ ଦେବାକୁ ନିଷ୍ପତ୍ତି ନେଇଥିଲେ । ତେବେ ଏଭଳି ଅମାନବୀୟ କାଣ୍ଡ ଘଟୁଥିବା ବେଳେ ଗ୍ରାମବାସୀ ଦେଖଣାହାରୀ ସାଜିଥିଲେ । ପରେ ପୀଡ଼ିତ ମହିଳା ଓ ପୁରୁଷ ଏ ନେଇ ଥାନାରେ ଅଭିଯୋଗ କରିଥିଲେ । ଅଭିଯୋଗ ପାଇ ପୋଲିସ ଘଟଣାର ତଦନ୍ତ ଆରମ୍ଭ କରିଛି । ସେପଟେ ଏହି ଘଟଣା ବେଳର ଅନେକ ଫଟୋ ଓ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି ।
