ଭୁବନେଶ୍ୱର: ରାଜଧାନୀର ଖାରବେଳନଗର ଥାନା ଅନ୍ତର୍ଗତ ଶାସ୍ତ୍ରୀନଗର ସିତାପୁର ବସ୍ତିରେ ଥିବା ଏକ ବନ୍ଦଘରୁ ଆଜି ଜଣେ ରାଜମିସ୍ତ୍ରୀଙ୍କ ଗଳିତ ମୃତଦେହ ପୁଲିସ ଉଦ୍ଧାର କରିଛି । ମୃତକ ଜଣକ ହେଲେ ନୟାଗଡ଼ ଜିଲା ଓଡ଼ଗାଁ ଲୋହୁଣୀ ଗ୍ରାମର ବନମାସୀ ବେହେରା (୫୮) । ସେ ଦୀର୍ଘଦିନ ହେବ ଭୁବନେଶ୍ୱରରେ ରହି ରାଜମିସ୍ତ୍ରୀ ଭାବେ କାମ କରୁଥିଲେ । ତାଙ୍କ ମୃତଦେହ କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ କରାଯାଇଛି । ବନମାସୀଙ୍କ ମୃତ ଶରୀରକୁ ଦେଖିଲେ ୫ଦିନ ପୂର୍ବରୁ ତାଙ୍କ ମୃତ୍ୟୁ ହୋଇଥିବା ଅନୁମାନ କରାଯାଉଛି । ଏନେଇ ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି । ବନମାସୀ ଆତ୍ମହତ୍ୟା କରିଛନ୍ତି କିମ୍ବା କୌଣସି ରୋଗ କାରଣରୁ ତାଙ୍କର ମୃତ୍ୟୁ ହୋଇଛି ସେନେଇ ସ୍ପଷ୍ଟ ହୋଇନାହିଁ ।
ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ଖାରବେଳନଗର ଥାନା ଅଧିକାରୀ ଅରୁଣ କୁମାର ସ୍ୱାଇଁ କହିଛନ୍ତି । ସୂଚନା ଅନୁଯାୟୀ, ବନମାସୀ ବହୁତ ଦିନ ଧରି ଭୁବନଶ୍ୱରରେ ରହୁଥିଲେ । ଦୀର୍ଘ ଦିନରୁ ପ୍ରଥମ ସ୍ତ୍ରୀ ତାଙ୍କୁ ଛାଡ଼ି ପଳାଇ ଯାଇଥିଲେ । ଗତ ୧୫ଦିନ ତଳେ ତାଙ୍କ ଦ୍ୱିତୀୟ ସ୍ତ୍ରୀ ମଧ୍ୟ ଛାଡ଼ି ଦେଇ ଚାଲିଯାଇଥିଲେ । ତାଙ୍କ ପୁଅ ଅନ୍ୟତ୍ର ରହୁଥିବା ବେଳେ ସେ ଏଠାରେ ଏକା ରହୁଥିଲେ । ଆଜି ପୂର୍ବାହ୍ନରେ ସ୍ଥାନୀୟ ଲୋକ ଉକ୍ତ ଘର ଦେଇ ଯାଉଥିବାବେଳେ ପ୍ରବଳ ଦୁର୍ଗନ୍ଧ ହୋଇଥିଲା ।
ଉକ୍ତ ଘର ଭିତର ପଟୁ ତାଲା ପଡ଼ିଥିବା ଦେଖି ସେମାନେ ପୁଲିସକୁ ଖବର ଦେଇଥିଲେ । ପରେ ପୁଲିସ ଘଟଣାସ୍ଥଳେ ପହଞ୍ଚି କବାଟ ଭାଙ୍ଗି ଘରେ ପସିଥିଲେ । ବନମାସୀ ମୃତ ଅବସ୍ଥାରେ ଏକ ଖଟ ଉପରେ ଶୋଇଥିବା ପୁଲିସ ଦେଖିବାକୁ ପାଇଥିଲେ । ତାଙ୍କ ଶରୀର ୫୦ପ୍ରତିଶତ ପଚିଯାଇଥିବାବେଳେ ଦୁର୍ଗନ୍ଧ ହେଉଥିଲା । ଏହାପରେ ପୁଲିସ ସ୍ଥାନୀୟ ଲୋକଙ୍କଠୁ ଖବର ନେଇ ତାଙ୍କ ପୁଅ ନିତ୍ୟାନନ୍ଦ ବେହେରାଙ୍କୁ ଖବର ଦେଇଥିଲା ।
