ସୁଶାନ୍ତ ସିଂ ରାଜପୁତ୍ ଡ୍ରଗ୍ସ ମାମଲା: ରିୟା ଚକ୍ରବର୍ତ୍ତୀଙ୍କ ସମେତ ୩୩ ଜଣଙ୍କ ବିରୋଧରେ ଚାର୍ଜସିଟ ଫାଇଲ

ମୁମ୍ବାଇ: ସୁଶାନ୍ତ ସିଂ ରାଜପୁତ୍ ଡ୍ରଗ୍ସ ମାମଲାରେ ରିୟା ଚକ୍ରବର୍ତ୍ତୀ ସମେତ ୩୩ ଅଭିଯୁକ୍ତଙ୍କ ବିରୋଧରେ ୧୨ ହଜାର ପୃଷ୍ଠାର ଚାର୍ଜସିଟ ଫାଇଲ କରାଯାଇଛି । ମାମଲାରେ ଡ୍ରଗ୍ସ ଏଙ୍ଗଲର ଯାଂଚ କରୁଥିବା କେନ୍ଦ୍ରୀୟ ଆଣ୍ଟି ଡ୍ରଗ ଏଜେନ୍ସି ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ ଶୁକ୍ରବାର ମୁମ୍ବାଇ ସେଶଂସ କୋର୍ଟ ର ବିଶେଷ ଏନଡିପିଏସ କୋର୍ଟରେ ଚାର୍ଜସିଟ ଫାଇଲ କରିଛନ୍ତି । ଯାହାଙ୍କ ବିରୋଧରେ ଚାର୍ଜସିଟ ଦାଖଲ ହୋଇଛି, ସେମାନଙ୍କ ମଧ୍ୟରୁ ଏବେ ବି ୮ ଜଣ ବିଚାରଧୀନ ଅଛନ୍ତି । ବାକି ସମସ୍ତଙ୍କୁ ଜାମିନ ମିଳି ଯାଇଛି । ଏଜେନ୍ସି କୋର୍ଟରେ କହିଛନ୍ତି ଯେ, ଆହୁରି ମଧ୍ୟ ଜ୍ଞାତ ଓ ଅଜ୍ଞାତ ଲୋକଙ୍କ ବିରୋଧରେ ଯାଂଚ ଜାରି ରହିଛି । ଏନସିବି କହିଛି ଯେ, ଯାଂଚ ସମୟରେ ବିଭିନ୍ନ ପ୍ରକାରର ନାର୍କୋଟିକ୍ସ ଗ୍ୟାଜେଟସ ଓ ଭାରତ ସହିତ ଅନ୍ୟ ଦେଶର କରେନ୍ସି ମଧ୍ୟ ଜବତ କରିଥିଲା । ମୋବାଇଲ ଫୋନ ଓ ଅନ୍ୟ ଗ୍ୟାଜେଟ୍ସ ଜରିଆରେ ଡ୍ରଗ୍ସ କିଣା ବିକା, ଡ୍ରଗ୍ସ ରଖିବା କିମ୍ବା ବ୍ୟବହାର କରିବା ସମ୍ବନ୍ଧିତ ତଥ୍ୟ ସାମ୍ନାକୁ ଆସିଥିଲା । ଜବତରେ ମିଳିଥିବା ଡ୍ରଗ୍ସକୁ କେମିକାଲ ଏକ୍ସାମିନେସନ ପାଇଁ ପଠାଯାଇଛି ।