ବେଙ୍ଗାଲୁରୁ : ଏଠାରେ ଚାଲିଥିବା ସାଫ୍ ଚାମ୍ପିଅନ୍ଶିପ୍ର ପ୍ରଥମ ଦିନରେ ବୁଧବାର ପାକିସ୍ତାନ ବିପକ୍ଷ ମ୍ୟାଚ୍ରେ ସୃଷ୍ଟି ହୋଇଥିବା ବିଶୃଙ୍ଖଳା ପରିପ୍ରେକ୍ଷୀରେ ଭାରତୀୟ ଦଳର ମୁଖ୍ୟ କୋଚ୍ ଇଗୋର ଷ୍ଟିମାକ୍ଙ୍କ ବାସନ୍ଦାଦେଶକୁ ଗୋଟିଏ ମ୍ୟାଚ୍ରେ ସୀମିତ ରଖାଯାଇଛି । ପାକିସ୍ତାନ ବିପକ୍ଷ ମ୍ୟାଚ୍ରେ ଷ୍ଟିମାକ୍ଙ୍କୁ ରେଫରି ରେଡ୍ କାର୍ଡ ଦେଖାଇଥିଲେ । ଏ ସଂକ୍ରାନ୍ତରେ ସାଫ୍ ମହାସଚିବ ଅନୱରୁଲ୍ ହକ୍ କହିଛନ୍ତି ଯେ ଷ୍ଟିମାକ୍ଙ୍କ ଆଚରଣ ସେତେଟା ଗୁରୁତର ନୁହେଁ ।
ତେଣୁ ତାଙ୍କ ବାସନ୍ଦାଦେଶ ପାକିସ୍ତାନ ବିପକ୍ଷ ମ୍ୟାଚ୍ରେ ହିଁ ସୀମିତ ରଖାଯାଇଛି । ଏହାଛଡ଼ା ଏହି ମାମଲାର ବିଚାରରେ ସାଫ୍ ଶୃଙ୍ଖଳା କମିଟି ମଧ୍ୟ ହସ୍ତକ୍ଷେପ କରି ନ ଥିବା ହକ୍ କହିଛନ୍ତି । ତେଣୁ ମଙ୍ଗଳବାର ଭାରତ ଖେଳିବାକୁ ଥିବା କୁଏତ୍ ବିପକ୍ଷ ମ୍ୟାଚ୍ରେ ଷ୍ଟିମାକ୍ ଦଳ ସହ ଯୋଗ ଦେଇପାରିବେ । ସୂଚନାଯୋଗ୍ୟ ଯେ ବୁଧବାର ମ୍ୟାଚ୍ରେ ପାକିସ୍ତାନୀ ଖେଳାଳି ଅବଦୁଲ୍ଲା ଇକ୍ବାଲ୍ ବଲ୍ ଥ୍ରୋ’ କରିବା ସମୟରେ ଷ୍ଟିମାକ୍ ହସ୍ତକ୍ଷେପ କରିବାରୁ ତାଙ୍କୁ ରେଫରି ପ୍ରଜ୍ୱଲ ଛେତ୍ରୀ ରେଡ୍ କାର୍ଡ ଦେଖାଇଥିଲେ । ତେଣୁ ମ୍ୟାଚ୍ର ଅବଶିଷ୍ଟ ସମୟରେ ଷ୍ଟିମାକ୍ ଲାଇନ୍ ନିକଟରେ ରହି ଖେଳାଳିଙ୍କୁ ଦିଗ୍ଦର୍ଶନ ଦେଇପାରି ନ ଥିଲେ । ତାଙ୍କ ସ୍ଥାନରେ ଏହି ଦାୟିତ୍ୱ ଭାରତୀୟ ଫୁଟବଲ୍ ଦଳର ପୂର୍ବତନ ଡିଫେଣ୍ଡର୍ ମହେଶ ଗାୱଲି ତୁଲାଇଥିଲେ ।