ମୁମ୍ବାଇ: ପାକିସ୍ତାନ ଲିଙ୍କରେ ଗିରଫ ହେଲେ ପୁଣେର ଜଣେ ସଫ୍ଟୱେୟାର୍ ଇଞ୍ଜିନିୟର। ପାକିସ୍ତାନର ଅଲ କାଏଦା ଭଳି ନିଷିଦ୍ଧ ସଂଗଧନ ସହିତ ସମ୍ପର୍କ ରଖିବା ଅଭିଯୋଗରେ ଗିରଫ ହୋଇଛନ୍ତି। ମହାରାଷ୍ଟ୍ର ଆତଙ୍କବାଦ ନିରୋଧୀ ସ୍କ୍ୱାଡ୍ ଯୁବକ ଜଣଙ୍କୁ ଗିରଫ କରିଛି। ଗତ ମାସରୁ ପୁଣେ ଏଟିଏସ୍ ଯୁବକଙ୍କ ଗତିବିଧି ଉପରେ ନଜର ରଖିଥିଲା। ଅଭିଯୁକ୍ତ ଜୁବୈର ହଙ୍ଗାରଗେକରଙ୍କୁ ଗିରଫ କରିବା ପରେ କୋର୍ଟରେ ହାଜର କରାଯାଇଥିଲା। ସ୍ୱତନ୍ତ୍ର ୟୁଏପିଏ କୋର୍ଟ ତାଙ୍କୁ ନଭେମ୍ବର ୪ ତାରିଖ ପର୍ଯ୍ୟନ୍ତ ପୁଲିସ ହେପାଜତକୁ ପଠାଇ ଦେଇଛନ୍ତି।
ପୁଲିସ କୋର୍ଟକୁ କହିଛି ଯେ ହଙ୍ଗାରଗେକର ଦେଶ ବିରୋଧୀ କାର୍ଯ୍ୟକଳାପ ଏବଂ ମହାରାଷ୍ଟ୍ର ଏବଂ ଅନ୍ୟାନ୍ୟ ସହରରେ ଆତଙ୍କବାଦୀ ଆକ୍ରମଣ ଯୋଜନା ସହିତ ଜଡିତ ଥିଲେ। ତାଙ୍କ ଘରେ ଖୋଜାଖୋଜି କରିବା ସମୟରେ ସେମାନେ ଯୁବକମାନଙ୍କୁ ମୌଳବାଦୀ କରିବା ପାଇଁ ଉଦ୍ଦିଷ୍ଟ ଅପରାଧିକ ସାମଗ୍ରୀ ମଧ୍ୟ ଉଦ୍ଧାର କରିଛନ୍ତି। ଏନେଇ ଜଣେ ପୁଲିସ ଅଧିକାରୀ କହିଛନ୍ତି ଯେ ପୁଣେ ସହରର କୋଣ୍ଡୱା ଅଞ୍ଚଳରୁ ଗିରଫ ହୋଇଥିବା ଅଭିଯୁକ୍ତଙ୍କ ବିରୋଧରେ ବେଆଇନ କାର୍ଯ୍ୟକଳାପ (ନିବାରଣ) ଆଇନର ବ୍ୟବସ୍ଥା ଅନୁଯାୟୀ ମାମଲା ରୁଜୁ କରାଯାଇଛି। ଅଧିକ ତଥ୍ୟ ପାଇଁ ତଦନ୍ତ ଜାରି ରହିଛି।
