ଡ୍ରଗ୍ସ କେସ୍ ପରେ ପ୍ରଥମ ଥର ମିଡିଆ ସାମ୍ନାକୁ ଆସିଲେ ଶାହରୁଖଙ୍କ ପୁଅ ଆର୍ଯ୍ୟନ

ମୁମ୍ବାଇ : ବଲିଉଡ ସୁପରଷ୍ଟାର ଶାହରୁଖ ଖାନଙ୍କ ପୁଅ ଆର୍ଯ୍ୟନ ଖାନଙ୍କ ପାଇଁ ୨୦୨୧ ବର୍ଷ ବହୁତ ଖରାପ ରହିଥିଲା । ଡ୍ରଗ୍ସ କେସରେ ଫସି ଆର୍ଯ୍ୟନ ଜେଲ୍ ଯାଇଥିଲେ । ଦୀର୍ଘ ମାସେ କାଳ ପୁଅ ପାଇଁ ଆଇନଗତ ଲଢେଇ ଜିତି ଶାହରୁଖ ପୁଅକୁ ଜେଲରୁ ଜାମିନ ଆଣିଥିଲେ । ପରେ ଆର୍ଯ୍ୟନଙ୍କୁ ଦେଶ ଛାଡି ନ ଯିବା, ପ୍ରତି ଶୁକ୍ରବାର ଥାନାରେ ହାଜିରା ହେବା ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ । ଅନେକ ଦିନ ପର୍ଯ୍ୟନ୍ତ ମିଡିଆ ଏବଂ ଲାଇମଲାଇଟରୁ ଦୂରେଇ ଥିବା ଆର୍ଯ୍ୟନଙ୍କୁ ଏବେ ମିଡିଆ ସାମ୍ନାରେ ଦେଖିବାକୁ ମିଳିଛି । ଆଇପିଏଲ୍ ମେଗା ଅକ୍ସନ୍ ୨୦୨୨ ପୂର୍ବରୁ ଶୁକ୍ରବାର ପ୍ରି-ଆଇପିଏଲ୍ ନିଲାମୀ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଏହି ସମୟରେ କୋଲକାତା ନାଇଟ୍ ରାଇର୍ଡସ୍ ତରଫରୁ ଶାହରୁଖ ଖାନଙ୍କ ପୁଅ ଆର୍ଯ୍ୟନ୍ ଖାନ୍ ଓ ଝିଅ ସୁହାନା ଖାନଙ୍କୁ ସ୍ପଟ୍ କରାଯାଇଥିଲା । ସୋସିଆଲ୍ ମିଡିଆରେ ଏବେ  ଦୁହିଁଙ୍କ ଫଟୋ ଭାଇରାଲ୍ ହେବାରେ ଲାଗିଛି । ଫଟୋରେ ଆର୍ଯ୍ୟନ୍ ଓ ସୁହାନା ଉଭୟ ଟିମ୍ ସଦସ୍ୟଙ୍କ ସହିତ ଆଲୋଚନା କରୁଥିବା ଦେଖିବାକୁ ମିଳିଥିଲା । ସୁହାନା ପ୍ରଥମ ଥର ପାଇଁ ଆଇପିଏଲ୍ ଅକ୍ସନ୍ ଚେୟାର ନଜର ଆସିଥିଲେ । କିନ୍ତୁ ଆର୍ଯ୍ୟନ୍ ଗତଥର ବି ଅକ୍ସନରେ ଯୋଗ ଦେଇଥିଲେ । ଗତ ବର୍ଷ ତାଙ୍କୁ ଜୁହି ଚାୱଲାଙ୍କ ଝିଅ ଜାହ୍ନବୀ ମେହତାଙ୍କ ସହିତ ଦେଖିବାକୁ ମିଳିଥିଲା । ଏବେ ଆର୍ଯ୍ୟନଙ୍କୁ ଆଇପିଏଲ ନିଲାମରେ ଦେଖି ଫ୍ୟାନ୍ସ ବିଭିନ୍ନ ପ୍ରକାର କମେଣ୍ଟ ଦେଉଛନ୍ତି ।