ତାମିଲନାଡୁରେ ବର୍ଷା ବିତ୍ପାତ: ୩ ମୃତ, ୪ ଜିଲ୍ଲା ସ୍ଥିତି ଗମ୍ଭୀର

ଚେନ୍ନାଇ: ଦକ୍ଷିଣ ତାମିଲନାଡୁର କନ୍ୟାକୁମାରୀ, ତିରୁନେଲଭେଲି, ଥୁଥୁକୁଡି ଏବଂ ତେନକାସୀ ଜିଲ୍ଲାର ଅନେକ ସ୍ଥାନରେ ପ୍ରବଳ ବର୍ଷା ଓ ବନ୍ୟା ଜାରି ରହିଥିବାରୁ ୩ ଜଣଙ୍କର ମୃତ୍ୟୁ ଘଟିଛି। ବନ୍ୟା ପ୍ରଭାବିତ ଅଂଚଳରେ ସ୍ୱାଭାବିକ ସ୍ଥିତି ଫେରାଇ ଆଣିବା ପାଇଁ ମୁଖ୍ୟମନ୍ତ୍ରୀ ଏମ୍‌କେ ଷ୍ଟାଲିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟି କେନ୍ଦ୍ରଠାରୁ ପର୍ଯ୍ୟାପ୍ତ ସହାୟତା ମାଗିବା ପାଇଁ ଦିଲ୍ଲୀ ଆସିଛନ୍ତି। ରିପୋର୍ଟ ଅନୁଯାୟୀ, ବର୍ଷାଜନିତ ଘଟଣାରେ ୩ ଜଣଙ୍କ ମୃତ୍ୟୁ ଘଟିଥିବା ବେଳେ ଆଉ ୩ ଜଣଙ୍କ ମୃତ୍ୟୁ ହୋଇଥିବା ଆଶଙ୍କା କରାଯାଉଛି। ଉତ୍ତର ତାମିଲନାଡୁ, ପୁଡୁଚେରୀ ଏବଂ କରାଇକାଲର କେତେକ ସ୍ଥାନରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବାର ପୂର୍ବାନୁମାନ କରିଛି ଆଇଏମ୍‌ଡି। ସ୍କୁଲ-କଲେଜକୁ ଛୁଟି କରିଦିଆଯିବା ସହ ୪ଟି ଜିଲ୍ଲାରେ ସତର୍କ ସୂଚନା ଜାରି କରାଯାଇଛି। ଗତ କିଛି ଦିନ ଧରି ପ୍ରବଳ ବର୍ଷା ଯୋଗୁଁ ଧାନ କ୍ଷେତ, ରାସ୍ତା ଓ ପୋଲ ଜଳମଗ୍ନ ହେବା ସହ ଅନେକ ଆବାସିକ କଲୋନି ପାଣି ଘେରରେ ରହିଛି। ହ୍ରଦ ଭାଙ୍ଗିବା ଓ ବନ୍ୟା ଯୋଗୁଁ ଅନେକ ସ୍ଥାନରେ ରାସ୍ତା ଯୋଗାଯୋଗ ବିଚ୍ଛିନ୍ନ ହୋଇଛି। ତିରୁଚେନ୍ଦୁର-ଚେନ୍ନାଇ ଏଗମୋର ଚେନ୍ଦୁର ଏକ୍ସପ୍ରେସରେ ଯାତ୍ରା କରୁଥିବା ୮୦୦ ଯାତ୍ରୀ ଶ୍ରୀବୈକୁଣ୍ଠମ୍ ରେଳ ଷ୍ଟେସନରେ ପ୍ରବଳ ବନ୍ୟା ଯୋଗୁଁ ସୋମବାର ଫସି ରହିଥିଲେ। ସେମାନଙ୍କ ମଧ୍ୟରୁ ୩୦୦ ଜଣଙ୍କୁ ଉଦ୍ଧାର କରି ନିକଟସ୍ଥ ସରକାରୀ ବିଦ୍ୟାଳୟକୁ ସ୍ଥାନାନ୍ତର କରାଯାଇଥିବା ବେଳେ ଏନଡିଆରଏଫ ଟିମ୍ ସହ ପ୍ରାୟ ୧୦୦ ଜଣ ଷ୍ଟେସନ ଛାଡ଼ିଥିଲେ। ସେମାନଙ୍କୁ ଷ୍ଟେସନରୁ ଆଣ୍ଠୁଏ ଗଭୀର ପାଣି ଦେଇ ପ୍ରାୟ ତିନି କିଲୋମିଟର ପର୍ଯ୍ୟନ୍ତ ଥୁଥୁକୁଡି ଜିଲ୍ଲାର ଭେଲୁର ଯିବାକୁ ପଡ଼ିଥିଲା ଯେଉଁଠାରେ ବସ୍‌ଗୁଡ଼ିକୁ ପ୍ରସ୍ତୁତ ରଖାଯାଇଥିଲା। ଏହାପରେ ସେମାନଙ୍କୁ ବାଞ୍ଚି ମଣିୟାଚି ଷ୍ଟେସନକୁ ନିଆଯିବ ଯେଉଁଠାରୁ ଏକ ସ୍ୱତନ୍ତ୍ର ଟ୍ରେନ୍ ସେମାନଙ୍କୁ ଚେନ୍ନାଇ ନେଇଯିବ। ତିରୁନେଲଭେଲି ଓ ଥୁଥୁକୁଡି ଜିଲ୍ଲାରେ ଛୁଟି ଘୋଷଣା କରାଯାଇଛି। କନ୍ୟାକୁମାରୀ ଓ ତେନକାସି ଜିଲ୍ଲାରେ ସ୍କୁଲ ଓ କଲେଜ ବନ୍ଦ ରଖାଯାଇଛି। ଅନ୍ୟପକ୍ଷରେ ଦକ୍ଷିଣ ତାମିଲନାଡୁର ବନ୍ୟା ପ୍ରଭାବିତ ଜିଲ୍ଲାଗୁଡ଼ିକରେ ଉଦ୍ଧାର ଓ ରିଲିଫ କାର୍ଯ୍ୟ ପାଇଁ ତୁରନ୍ତ ଅଧିକ ହେଲିକପ୍ଟର ମୁତୟନ କରିବାକୁ ଷ୍ଟାଲିନ୍ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ଅନୁରୋଧ କରିଛନ୍ତି। ବନ୍ୟା ପ୍ରଭାବିତ ଅଂଚଳରୁ ଲୋକଙ୍କୁ ସ୍ଥାନାନ୍ତର କରିବାରେ ଭାରତୀୟ ସେନା ସହାୟତା କରିବା ସହ ଚିକିତ୍ସା ସେବା ଯୋଗାଇ ଦେଇଛି।