ନୂଆଦିଲ୍ଲୀ : ଗତ ସପ୍ତାହରେ ନାବାଳକ ଚାଳକଙ୍କ ଦ୍ବାରା ହୋଇଥିବା ପୋର୍ସେ ଦୁର୍ଘଟଣା ସମ୍ପର୍କରେ ସିନିୟର୍ଙ୍କୁ ଉଚିତ ସମୟରେ ସୂଚନା ଦେଇ ନ ଥିବାରୁ ପୁଣେ ପୁଲିସର ଦୁଇ ଜଣ ଅଧିକାରୀଙ୍କୁ ନିଲମ୍ବିତ କରାଯାଇଛି। ପୁଣେ ପୁଲିସ୍ କମିସନର (ପିସି) ଅମିତେଶ କହିଛନ୍ତି ଯେ ୟେରୱାଡା ପୁଲିସ୍ ଷ୍ଟେସନରେ ନିଯୁକ୍ତ ହୋଇଥିବା ପୁଲିସ୍ ଇନ୍ସପେକ୍ଟର ରାହୁଲ ଜଗଡେଲ ଏବଂ ଆସିଷ୍ଟାଣ୍ଟ ପୁଲିସ ଇନ୍ସପେକ୍ଟର ବିଶ୍ୱନାଥ ଟଡକରୀଙ୍କୁ ନିଲମ୍ବିତ କରାଯାଇଛି। ୧୭ ବର୍ଷୀୟ ନାବାଳକଙ୍କ ଦ୍ବାରା ଚାଳିତ ଏକ ପୋର୍ସେ ଦୁର୍ଘଟଣା ଏବେ ପୂରା ଦେଶରେ ଚାଞ୍ଚଲ୍ୟ ସୃଷ୍ଟି କରିଛି। ପୂର୍ବରୁ ଦିଆଯାଇଥିବା ଜାମିନ ନାମଞ୍ଜୁର ହେବା ପରେ ଅଭିଯୁକ୍ତ ଯୁବକଙ୍କୁ ଜୁଭେନାଇଲ୍ ଜଷ୍ଟିସ୍ ବୋର୍ଡ (ଜେଜେବି) ରିମାଣ୍ଡରେ ନେଇଥିଲା। ଅମିତେଶ କୁମାର କହିଛନ୍ତି, “ନାବାଳକ ଦୁଘର୍ଟଣା ପୂର୍ବରୁ ପବରେ ମଦ ପିଇବାର ସିସିଟିଭି ଫୁଟେଜ୍ ଅଛି। ଏହା କହିବା କଥା ଯେ ରକ୍ତ ରିପୋର୍ଟ (ବ୍ଲଡ୍ ରିପୋର୍ଟ) ଉପରେ ନିର୍ଭର କରି ଆମର ମାମଲାକୁ ମୋଡ଼ ଦେଇପାରିବା ନାହିଁ। ଆମ ନିକଟରେ ଅନ୍ୟାନ୍ୟ ପ୍ରମାଣ ମଧ୍ୟ ଅଛି।” ଅମିତେଶ ଆହୁରି ମଧ୍ୟ କହିଛନ୍ତି, “ସେ (ନାବାଳକ) ପୂର୍ଣ୍ଣ ଭାବେ ଜ୍ଞାତ ଅବସ୍ଥାରେ ଥିଲେ। ତାଙ୍କର ସମ୍ପୂର୍ଣ୍ଣ ଜ୍ଞାନ ଥିଲା। ତାଙ୍କ ଆଚରଣ ହେତୁ ଏପରି ଦୁର୍ଘଟଣା ଘଟିଛି। ଯେଉଁଥିପାଇଁ ଧାରା ୩୦୪ ପ୍ରଯୁଜ୍ୟ ହୋଇପାରେ।” ଏଥିସହ ନାବାଳକଙ୍କୁ ପୁଲିସ ହେପାଜତରେ ଥିବାବେଳେ ତାଙ୍କୁ ସ୍ବତନ୍ତ୍ର ଚିକିତ୍ସା ଦିଆଯାଇଥିବା ସୂଚନା ମିଳିଛି। ଜେଲ୍ରେ ତାଙ୍କୁ ପିଜା ଓ ବିରିୟାନି ଦିଆଯାଇଥିବା ଅଭିଯୋଗ ହୋଇଥିଲା। ଏହି ଅଭିଯୋଗର ଉତ୍ତରରେ କୁମାର କହିଛନ୍ତି, “ଆମେ ସ୍ପଷ୍ଟ ଭାବେ କହିଛୁ ଯେ ପୁଲିସ୍ ଷ୍ଟେସନରେ ସେପରି କିଛି ଘଟିନାହିଁ।’’
