କୋକସରା : କଳାହାଣ୍ଡି ଜିଲ୍ଲା ଜାତୀୟ ରାଜପଥ-୨୬ କୋକସରା କେନାଲ ପୋଲ ନିକଟରେ ଟ୍ରକ୍ ଧକ୍କାରେ ଜଣକର ମୃତ୍ୟୁ ହୋଇଥିବାବେଳେ ୨ ଗୁରୁତର ହୋଇଛନ୍ତି । ଉକ୍ତ ଦ୍ରୁତଗାମୀ ଟ୍ରକ୍ ରାସ୍ତା କଡ଼ରେ ଠିଆ ହୋଇଥିବା ୩ ଜଣଙ୍କୁ ଧକ୍କା ଦେଇ ଜଣଙ୍କୁ ବାଇକ୍ ସହ ଘୋଷାଡି ନେଇଛି । ଫଳରେ ଘଟଣାସ୍ଥଳରେ ତୀବ୍ର ଉତ୍ତେଜନା ପ୍ରକାଶ ପାଇଛି । ଆଜି ଭୋର ୫ଟା ସମୟରେ ରାସ୍ତା କଡ଼ରେ ଥିବା ୩ ଜଣଙ୍କୁ ଧକ୍କା ଦେଇଥିବା ବେଳେ ଜଣକୁ ବାଇକ୍ ସାଙ୍ଗରେ ଘୋଷାଡି ନେଇଥିଲା । ଫଳରେ ଟ୍ରକ୍ ଚାପାରେ ଚିକିଲି ଗ୍ରାମର ଯୋଗେନ୍ଦ୍ର ବେମାଲଙ୍କ(୨୫) ମୃତ୍ୟୁ ହୋଇଛି । ଏଥିସହ ବଙ୍ଗୋମୁଣ୍ଡାର ଅନ୍ତ ଗହୀର ଓ କୋକସରାର ଜଣେ ମହିଳା ରାମବତୀ ଦୀପ ଗୁରୁତର ହୋଇଛନ୍ତି । ତାଙ୍କୁ ଅଗ୍ନିଶମ ବିଭାଗ କର୍ମଚାରୀ ଉଦ୍ଧାର କରି କୋକସରା ହସ୍ପିଟାଲରେ ଭର୍ତ୍ତି କରିଥିବା ବେଳେ ଚିକିତ୍ସା ଜାରି ରହିଛି । ଘଟଣାସ୍ଥଳରେ ଟ୍ରକ୍ ତଳେ ଚାପି ହୋଇଥିବା ଯୁବକଙ୍କୁ ଉଦ୍ଧାର କରିବା ପରେ ଏନ୍ଏଚ୍-୨୬ ରାସ୍ତା ଉପରେ ଶବରଖି ରାସ୍ତା ଅବରୋଧ କରିଥିଲେ । କୋକସରା, ଜୁନାଗଡ, ଧର୍ମଗଡ଼ ଉପଖଣ୍ଡ ପୋଲିସ୍ ଅଧିକାରୀ କୋକସରା ତହସିଲଦାର ଉପସ୍ଥିତ ରହି ଲୋକଙ୍କୁ ବୁଝାସୁଝା କରିଥିଲେ । ଖବର ଲେଖା ଯିବା ପର୍ଯ୍ୟନ୍ତ ରାସ୍ତା ଅବରୋଧ ହଟି ନଥିଲା । ପରିବାର ପକ୍ଷରୁ କ୍ଷତିପୂରଣ ନ ମିଳିବା ପର୍ଯ୍ୟନ୍ତ ଆମେ ଶବକୁ ଛାଡିବୁ ନାହିଁ ବୋଲି ପ୍ରକାଶ କରିଥିଲେ ।