ରିୟାଦ୍ : ସାଉଦି ପ୍ରୋ-ଲିଗ୍ ମ୍ୟାଚ୍ରେ ଆପତ୍ତିଜନକ ଇଙ୍ଗିତ କରିଥିବା ମହାନ୍ ଫୁଟ୍ବଲର୍ କ୍ରିଷ୍ଟିଆନୋ ରୋନାଲ୍ଡୋଙ୍କୁ ଗୋଟିଏ ମ୍ୟାଚ୍ରୁ ବ୍ୟାନ୍ କରାଯାଇଛି । ସେ ଏବେ ଅଲ୍ ହଜମ୍ ବିପକ୍ଷ ମ୍ୟାଚ୍ରେ ଅଲ୍ ନାସର ଟିମ୍ରୁ ଖେଳିପାରିବେ ନାହିଁ । ଗୁରୁବାର ସାଉଦି ଆରବ ଫୁଟ୍ବଲ୍ ମହାସଂଘର ଶୃଙ୍ଖଳା ଏବଂ ନୈତିକତା କମିଟି (ଡିସିପ୍ଲିନ୍ ଆଣ୍ଡ୍ ଏଥିକ୍ସ କମିଟି) ରୋନାଲ୍ଡୋଙ୍କ ନିଲମ୍ବନ ଘୋଷଣା କରିଛି । ସେହିପରି ଏହି ଘୋଷଣା ଅନୁସାରେ ରୋନାଲ୍ଡୋଙ୍କୁ ଏବେ ଅଲ୍ ଶବାବ୍କୁ ପ୍ରାୟ ୫ ହଜାର ଡଲାର ଏବଂ ମହାସଂଘକୁ ଏହାର ଅଧା ରାଶି ଜୋରିମାନା ଭାବେ ଦେବାକୁ ପଡ଼ିବ । ଏହି ନିଷ୍ପତ୍ତି ବିରୋଧରେ ଅପିଲ୍ ମଧ୍ୟ କରାଯାଇ ପାରିବନାହିଁ ।
ଅଲ୍ ନାସର୍ ଖେଳାଳି ରୋନାଲ୍ଡୋ ରବିବାର ସାଉଦି ପ୍ରୋ-ଲିଗ୍ ମ୍ୟାଚ୍ ଅବସରରେ ଆପତ୍ତିଜନକ ଇଙ୍ଗିତ କରି ଅଲ୍ ଶବାବ୍ ସମର୍ଥକଙ୍କୁ ଚିଡ଼ାଉଥିବା ଦେଖିବାକୁ ମିଳିଥିଲା । ମ୍ୟାଚ୍ ବେଳେ ସମର୍ଥକ ମେସି ମେସି ନାରା ଲଗାଇଥିଲେ । ଏହାର ପ୍ରତିକ୍ରିୟାରେ ପର୍ତ୍ତୁଗାଲ୍ ଖେଳାଳି ବିପକ୍ଷ ଟିମ୍ର ସମର୍ଥକଙ୍କ ପ୍ରତି ଅଭଦ୍ର ଇଙ୍ଗିତ କରିଥିଲେ । ଏହାକୁ ନେଇ ବିବାଦ ଦେଖାଦେବାରୁ ସାଉଦି ଆରବ ଫୁଟ୍ବଲ୍ ମହାଂସଘର ଶୃଙ୍ଖଳା ଏବଂ ନୈତିକତା କମିଟି ଏହାର ଯାଞ୍ଚ କରିଥିଲା ।
