ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ଶ୍ରୀ ଭକ୍ତ ଚରଣ ଦାସ ଆଜି ରାଜ୍ୟର ବିଦ୍ୟାଳୟ ଶିକ୍ଷା କ୍ଷେତ୍ରରେ ସରକାରଙ୍କ ସମ୍ପୂର୍ଣ୍ଣ ବିଫଳତାକୁ ନେଇ କଡ଼ା ସମାଲୋଚନା କରିଛନ୍ତି। ସେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ତୁରନ୍ତ ଇସ୍ତଫା ଦାବି କରି କଂଗ୍ରେସ ଦଳର ଆଭିମୁଖ୍ୟକୁ ଦୋହରାଇଛନ୍ତି। ଶ୍ରୀ ଦାସ କହିଛନ୍ତି ଯେ ଓଡ଼ିଶାର ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତକୁ ଗଣଶିକ୍ଷା ବିଭାଗର ଅପରାଧିକ ଉଦାସୀନତା ଯୋଗୁଁ ବ୍ୟବସ୍ଥିତ ଭାବେ ବିପନ୍ନ କରାଯାଇଛି, ଯାହାଫଳରେ ଆଶ୍ଚର୍ଯ୍ୟଜନକ ଭାବେ ୧,୭୩୧ ଟି ତ୍ରୁଟିରେ ଭରପୂର ଥିବା ପାଠ୍ୟପୁସ୍ତକଗୁଡ଼ିକୁ ମୁଦ୍ରଣ ଏବଂ ବିତରଣ କରିବାକୁ ଅନୁମତି ଦିଆଗଲା। ମାସ ମାସ ଧରି ପ୍ରତିକୂଳ ପରିସ୍ଥିତିରେ ରାଜପଥରେ ଆନ୍ଦୋଳନ କରି ଅନ୍ଧକାର ମଧ୍ୟରେ କାଳାତିପାତ କରୁଥିବା ହଜାର ହଜାର ସ୍କୁଲ ଶିକ୍ଷକଙ୍କ ଚାଲିଥିବା ଅଭିଯୋଗର ସମାଧାନ କରିବାରେ ମନ୍ତ୍ରୀଙ୍କ ସମ୍ପୂର୍ଣ୍ଣ ବିଫଳତାକୁ ସେ ଆହୁରି ନିନ୍ଦା କରିଛନ୍ତି। ଶ୍ରୀ ଦାସ କହିଛନ୍ତି, “ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଅପାରଗତା ଓଡ଼ିଶାର ବିଦ୍ୟାଳୟ ଶିକ୍ଷା ବ୍ୟବସ୍ଥାକୁ ପଙ୍ଗୁ କରିଦେଇଛି। ଯଦି ସେ ନୈତିକତା ଆଧାରରେ ତୁରନ୍ତ ନିଜର ଇସ୍ତଫା ପତ୍ର ଦାଖଲ ନକରନ୍ତି, ତେବେ ରାଜ୍ୟରେ ଶାସନ ଏବଂ ଉତ୍ତରଦାୟିତ୍ୱ ପୁନଃପ୍ରତିଷ୍ଠା କରିବା ପାଇଁ ମୁଖ୍ୟମନ୍ତ୍ରୀ ବିନା ବିଳମ୍ବରେ ତାଙ୍କୁ କ୍ୟାବିନେଟ୍ରୁ ବାଦ୍ ଦେବା ଉଚିତ୍।” ବିଜୁ ଜନତା ଦଳକୁ ମଧ୍ୟ ସମାଲୋଚନା କରି ପିସିସି ମୁଖ୍ୟ ରାଜ୍ୟର ମୁଖ୍ୟ ବିରୋଧୀ ଦଳ, ଶାସକ ଦଳ ପ୍ରତି ନରମ ଆାଭିମୁଖ୍ୟ ଆପଣାଉଥିବା ନେଇ ଅଭିଯୋଗ କରିଛନ୍ତି। ପର୍ଯ୍ୟାପ୍ତ ସଂଖ୍ୟା ଥାଇ ମଧ୍ୟ ମନ୍ତ୍ରୀ ଗଣ୍ଡଙ୍କୁ ବହିଷ୍କାର କରିବାରେ ବିଜେଡିର ସମ୍ପୂର୍ଣ୍ଣ ବିଫଳତାକୁ ଶ୍ରୀ ଦାସ ସମାଲୋଚନା କରିଛନ୍ତି।
ସେ ସୂଚାଇ ଦେଇଛନ୍ତି ଯେ ନିଜର ପୂର୍ବ ମେଣ୍ଟର ଅଂଶୀଦାର ଦଳ ବିଜେପି ବିରୋଧରେ ବିଜେଡିର ସାମ୍ପ୍ରତିକ ପ୍ରତିକାତ୍ମକ ପ୍ରତିବାଦରେ କୌଣସି ପ୍ରକୃତ ଆନ୍ତରିକତା ନାହିଁ। କାରଣ ସେମାନେ ସରକାରଙ୍କୁ ଦାୟୀ କରିବା ଭଳି କୌଣସି ନିରନ୍ତର ଧର୍ମଘଟ ଆୟୋଜନ କରିବାରେ ବିଫଳ ହୋଇଛନ୍ତି, ଯାହାଫଳରେ ଓଡ଼ିଶାର ଛାତ୍ରଛାତ୍ରୀ ଏବଂ ଶିକ୍ଷକମାନଙ୍କ ବିଶ୍ୱାସ ପ୍ରତି ବିଶ୍ୱାସଘାତକତା କରାଯାଇଛି। ତେବେ ବିଜେଡିର ନରମ ଆଭିମୁଖ୍ୟ ପାଇଁ ଗଣଶିକ୍ଷାମନ୍ତ୍ରୀ ପାର୍ ପାଇଯିବେ ବୋଲି ଯଦି ବିଜେପି ସରକାରର ମୁଣ୍ଡିଆଳମାନେ ଭାବୁଥା’ନ୍ତି, ତାହା ଭୁଲ୍ ବୋଲି ଶ୍ରୀ ଦାସ ଚେତାଇଦେଇଛନ୍ତି। ପିସିସି ସଭାପତି ଘୋଷଣା କରିଛନ୍ତି ଯେ କଂଗ୍ରେସ ଦଳ ଏହି ପ୍ରଶାସନିକ ପକ୍ଷାଘାତ ପ୍ରତି ନିରବ ଦ୍ରଷ୍ଟା ସାଜି ରହିବ ନାହିଁ। ଶ୍ରୀ ଦାସ କହିଛନ୍ତି ଯେ କଂଗ୍ରେସ ରାଜ୍ୟବ୍ୟାପୀ ଏକ ଆକ୍ରମଣାତ୍ମକ ତଥା ସାଲିସହୀନ ଆନ୍ଦୋଳନ ଆରମ୍ଭ କରିବ। ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଇସ୍ତଫା ନଦେବା କିମ୍ବା ମନ୍ତ୍ରୀମଣ୍ଡଳରୁ ବହିଷ୍କୃତ ନହେବା ପର୍ଯ୍ୟନ୍ତ ଓଡ଼ିଶାର ପ୍ରତ୍ୟେକ ବ୍ଲକ ଏବଂ ଜିଲ୍ଲାରେ ଏହି ଆନ୍ଦୋଳନ ଆହୁରି ତୀବ୍ର ହେବାରେ ଲାଗିବ। ସମଗ୍ର ଦେଶରେ ପରିବର୍ତ୍ତନର ହାଓ୍ବା ବହିବା ଆରମ୍ଭ ହୋଇଥିବା ବେଳେ ନିର୍ଦ୍ଦିଷ୍ଟ ଭାବେ ଓଡ଼ିଶାରେ ଏମଏମଡିଆର ସଂଶୋଧନ ଅଧିନିୟମ ଓ ୟୁପିଆଇ ଟିକସ ନିଷ୍ପତ୍ତି ପ୍ରତ୍ୟାହାର ଏବଂ ଗଣଶିକ୍ଷାମନ୍ତ୍ରୀଙ୍କ ଇସ୍ତଫା ଦାବିରେ ସାରା ରାଜ୍ୟରେ ଚାଲିଥିବା ପରିବର୍ତ୍ତନ ରାଲି ଆଗକୁ ବିଜେପି ସରକାରର ନିଦ ଆହୁରି ହଜାଇଦେବ ବୋଲି ସେ ସତର୍କ କରାଇଦେଇଥିଲେ।
