ଲକ୍ଷ୍ନୌ: ଉତ୍ତରପ୍ରଦେଶର ମୁରାଦାବାଦ ସହରରେ ଦେଖିବାକୁ ମିଳିଛି ଏକ ନିଆରା ଘଟଣା । ଯେଉଁଠାରେ ଜଣେ ପତି ତାଙ୍କ ପତ୍ନୀଙ୍କୁ ତାଙ୍କ ପ୍ରେମିକଙ୍କ ସହ ବିବାହ କରାଇ ଦେଇଛନ୍ତି । ଚଳିତମାସ ୧୦ ତାରିଖରେ ସିଭିଲ୍ ଲାଇନ୍ ଥାନାର ଅଗବାନପୁରରେ ବଡ଼ ଧୁମ୍ଧାମ୍ରେ ହୋଇଥିଲା ବିବାହ । ତା’ପରଦିନ, ଅକ୍ଟୋବର ୧୧ ତାରିଖରେ ଝିଅ ବିଦା ହୋଇଥିଲା । କନ୍ୟା ଯାଇ ତାଙ୍କ ଶଶୁରଘରେ ପହଞ୍ଚିଲେ । ସବୁ କିଛି ଠିକ୍ ଚାଲିଥିଲା । ସ୍ୱାମୀ ବି ନବବିବାହିତା ପତ୍ନୀଙ୍କୁ ପାଇ ବେଶ୍ ଖୁସି ଥିଲେ । ହେଲେ ବିବାହର ୪ର୍ଥ ଦିନରେ ନବବଧୂଙ୍କ ପେଟରେ ଅଚାନକ ଯନ୍ତ୍ରଣା ହୋଇଥିଲା । ତାଙ୍କ ସ୍ୱାମୀ ଖୁବ୍ ବିବ୍ରତ ହୋଇପଡ଼ିଲେ । ତା’ପରେ ସେ ଯାଇ ଏବିଷୟରେ ତାଙ୍କ ବାପାମାଆଙ୍କୁ ଜଣାଇଲେ ।
ପୁଣି ସେ କନ୍ୟାଙ୍କୁ ନେଇ ହସ୍ପିଟାଲ୍ରେ ପହଞ୍ଚିଲେ । ତା’ପରେ ଯାଇ ଜଣାପଡ଼ିଲା ଯେ ନବବଧୂ ଗର୍ଭବତୀ ଅଛନ୍ତି ଓ ତାଙ୍କର ଲେବର ପେନ୍ ହେଉଛି । ଡାକ୍ତର ଯେତେବେଳେ ଏପରି ଏକ ଖବର ଶୁଣାଇଲେ ତ ପରିବାରର ସଭିଙ୍କ ମୁହଁ ଲାଜରେ କଳା ପଡ଼ି ଯାଇଥିଲା । ତା’ପରେ ଶଶୁରଘର ଲୋକ କନ୍ୟାର ବାପାଙ୍କୁ ଘରକୁ ଡାକି ସବୁ କଥା କହିଥିଲେ । ଅକ୍ଟୋବର ୧୬ ତାରିଖରେ ପ୍ରସୂତୀ ହସ୍ପିଟାଲ୍ରୁ ଡିସ୍ଚାର୍ଜ ହେବା ପରେ ସମସ୍ତେ ଘରେ ପହଞ୍ଚିଥିଲେ । ସେତେବେଳେ କନ୍ୟାଙ୍କ ବାପା ବି ଆସି ଘରେ ଥାଆନ୍ତି । ସବୁ କଥା ସ୍ପଷ୍ଟ ହୋଇଗଲା ପରେ ଯୁବକ ଜଣକ ତାଙ୍କ ନବବିବାହିତା ପତ୍ନୀଙ୍କୁ ତିନ୍ ତଲାକ୍ ଦେଇ ତାଙ୍କ ବାପାଙ୍କୁ କନ୍ୟାକୁ ନେଇ ଚାଲିଯିବାକୁ କହିଲେ । ତା’ପରେ କନ୍ୟା ଜଣକ ସମସ୍ତଙ୍କ ସମ୍ମୁଖରେ ନିଜ ପିଲାର ପ୍ରକୃତ ବାପା ବିଷୟରେ ଖୋଲିକି କହିବା ପରେ ଗାଁରେ ପଞ୍ଚାୟତ ବସିଲା । ଶେଷରେ କନ୍ୟାଙ୍କୁ ତାଙ୍କ ପ୍ରେମୀଙ୍କ ସହ ବାହାଘର କରି ଦିଆଯାଇଛି ।
